આજે 74મો પ્રજાસત્તાક દિવસ ઉજવી રહ્યો છે દેશ, PMએ દેશવાસીઓને પાઠવી શુભકામનાઓ

દેશવાસીઓ આજે 74મો પ્રજાસત્તાક દિવસ ઉજવી રહ્યા છે. આ અવસર પર દિલ્હી સ્થિત કર્તવ્યપથ પર પરેડનું આયોજન કરવામાં આવ્યું છે. જે સવારે 10.30 કલાકે શરૂ થશે. ઇજિપ્તના રાષ્ટ્રપતિ અબ્દુલ ફતાહ અલ સીસી આ વર્ષના પ્રજાસત્તાક દિવસની ઉજવણીમાં મુખ્ય અતિથિ છે. પ્રજાસત્તાક દિવસની પરેડમાં દેશની લશ્કરી ક્ષમતા, સાંસ્કૃતિક વિવિધતા, આત્મનિર્ભરતા, મહિલા સશક્તિકરણ અને નવા ભારતના ઉદયને પ્રદર્શિત કરવામાં આવશે.

આજનો દિવસ દરેક ભારતીય માટે અલૌકિક-પવિત્ર અને ગર્વનો છે, આ શુભ અવસર પર પહેલીવાર 'કર્તવ્યપથ' પર પરેડ યોજાવા જઈ રહી છે, પહેલા આ સ્થળ રાજપથ તરીકે જાણીતું હતું, આજે આ પથ પર 'તમે' 'ન્યૂ ઈન્ડિયા'ની ઝલક જોવા મળશે અને સાથે જ તમને પરેડમાં દેશની સૈન્ય શક્તિ અને મહિલા શક્તિ પણ જોવા મળશે. રાષ્ટ્રપતિ દ્રૌપદી મૂર્મુ રાષ્ટ્રનું કર્તવ્યપથથી નેતૃત્વ કરશે.  

74માં પ્રજાસત્તાક દિવસના ખાસ અવસર પર દેશના વડાપ્રધાન મોદીએ દેશવાસીઓને શુભકામનાઓ પાઠવી છે. તેમણે ટ્વીટ કરતા લખ્યું કે, પ્રજાસત્તાક દિવસની ખૂબ ખૂબ શુભેચ્છાઓ. આ વખતે આ પ્રસંગ એટલા માટે પણ ખાસ છે કારણ કે આપણે આઝાદીના અમૃત મહોત્સવ દરમિયાન તેની ઉજવણી કરી રહ્યા છીએ. દેશના મહાન સ્વાતંત્ર્ય સેનાનીઓના સપનાને સાકાર કરવા માટે આપણે એકજૂથ થઈને આગળ વધીએ, તે જ કામના છે.

આ પણ વાંચો - આજે આખી દુનિયા દિલ્હીના કર્તવ્ય પથ પરથી આત્મનિર્ભર ભારતની ઝલક જોશે