સેનામાં 'અગ્નિપથ યોજના' હેઠળ જવાનોની ભરતી કરવાની કેન્દ્ર સરકારની જાહેરાત

રક્ષા મંત્રી રાજનાથ સિંહે 'અગ્નિપથ યોજના'ની જાહેરાત કરી છે.  રાજનાથ સિંહે મંગળવારે ત્રણેય સેના પ્રમુખો સાથે પ્રેસ કોન્ફરન્સ દરમિયાન જાહેરાત કરી હતી. આ પ્રસંગે તેમણે કહ્યું કે ભારતીય દળોને વિશ્વની શ્રેષ્ઠ સેના બનાવવાની દિશામાં આજે સંસદીય સુરક્ષા સમિતિએ ઐતિહાસિક નિર્ણય લીધો છે.

રાજનાથ સિંહે કહ્યું કે આજે અમે 'અગ્નિપથ' નામની પરિવર્તનકારી યોજના લાવી રહ્યા છીએ, જે આપણા સશસ્ત્ર દળોમાં પરિવર્તનકારી પરિવર્તન લાવશે અને તેમને સંપૂર્ણ આધુનિક અને શસ્ત્રોથી વધુ સજ્જ બનાવશે. દેશના યુવાનો માટે ચાર વર્ષની ભરતીની યોજના છે. આ યુવાનોને 'અગ્નિવીર' કહેવામાં આવશે.

તેમણે કહ્યું કે 'અગ્નિપથ' યોજના હેઠળ ભારતીય યુવાનોને 'અગ્નિવીર' તરીકે સશસ્ત્ર દળોમાં સેવા કરવાની તક પૂરી પાડવામાં આવશે. આ યોજના દેશની સુરક્ષાને મજબૂત કરવા અને આપણા યુવાનોને સૈન્ય સેવાની તક આપવા માટે લાવવામાં આવી છે. રક્ષા મંત્રીએ કહ્યું કે  સમગ્ર રાષ્ટ્ર, ખાસ કરીને આપણા યુવાનો સશસ્ત્ર દળો સાથે સન્માનપૂર્વક વર્તે છે. દરેક બાળક પોતાના જીવનના અમુક તબક્કે આર્મી યુનિફોર્મ પહેરવાની ઈચ્છા રાખે છે. ચાર વર્ષની સેવા દરમિયાન સારો પગાર અને સુવિધાઓ આપવામાં આવશે. ત્રણેય સેનાના વડાઓએ બે અઠવાડિયા પહેલા વડાપ્રધાન નરેન્દ્ર મોદીને સૈનિકોની ભરતી માટે અગ્નિપથ યોજના વિશે માહિતી આપી હતી.

તેમણે કહ્યું કે યુવાનો નવી ટેક્નોલોજી માટે સરળતાથી પ્રશિક્ષિત થઈ શકશે અને તેમનું સ્વાસ્થ્ય અને ફિટનેસ લેવલ પણ સારું રહેશે. 

 આ યોજના મુજબ સેનામાં ભરતી ચાર વર્ષ માટે જ રહેશે. ચાર વર્ષના સૈનિકોને 'અગ્નિવીર' નામ આપવામાં આવશે. ચાર વર્ષ પછી જવાનોની સેવાઓની સમીક્ષા કરવામાં આવશે. સમીક્ષા પછી, કેટલાક સૈનિકોની સેવાઓ વધારી શકાય છે. બાકીના નિવૃત્ત થશે.ચાર વર્ષની નોકરીમાં છ-નવ મહિનાની તાલીમ પણ સામેલ હશે. આ ઉપરાંત નિવૃત્તિ પછી પેન્શન મળશે નહીં, પરંતુ એક સામટી રકમ આપવામાં આવશે.

ખાસ વાત એ હશે કે હવે સેનાની રેજિમેન્ટમાં જાતિ, ધર્મ અને ક્ષેત્રના હિસાબે ભરતી નહીં થાય, પરંતુ દેશવાસીના રૂપમાં થશે. એટલે કે, કોઈપણ જાતિ, ધર્મ અને પ્રદેશના યુવાનો કોઈપણ રેજિમેન્ટ માટે અરજી કરી શકે છે. ઉલ્લેખનીય છે કે સેનામાં શીખ, જાટ, રાજપૂત, ગોરખા, ડોગરા, કુમાઉ, ગઢવાલ, બિહાર, નાગા, રાજપુતાના-રાઇફલ્સ (રાજરિફ), જમ્મુ અને કાશ્મીર લાઇટ ઇન્ફન્ટ્રી, જમ્મુ-કાશ્મીર રાઇફલ્સ વગેરે રેજિમેન્ટ હોય છે. જે  જાતિ, વર્ગ, ધર્મ અને પ્રદેશના આધારે તૈયાર કરવામાં આવે છે. હવે દેશનો કોઈપણ યુવક કોઈપણ રેજિમેન્ટ માટે અરજી કરી શકે છે. આઝાદી બાદથી તેને સંરક્ષણ ક્ષેત્રમાં એક મોટા સંરક્ષણ સુધારા તરીકે ગણવામાં આવે છે.

યોજનાને લીલી ઝંડી મળ્યા બાદ ઓગસ્ટ મહિનાથી આર્મી, નેવી અને એરફોર્સમાં ભરતી શરૂ થશે.