Jharkhand Election : કોંગ્રેસ-JMM ગઠબંધનમાં સીટ વહેંચણીનો મુદ્દો ગરમાયો! જાણો CM હેમંત સોરેને શું કહ્યું

• ઝારખંડમાં મહાગઠબંધનનો દબદબો!
• 70 બેઠકો પર કોંગ્રેસ-JMM ની સહમતી!
• કોને કઇ સીટ મળશે તેના પર હજું સવાલ

Jharkhand Election : ઝારખંડમાં આગામી ચૂંટણી માટે કોંગ્રેસ અને ઝારખંડ મુક્તિ મોરચા (Congress and JMM) વચ્ચે ગઠબંધનની સીટ વહેંચણી માટેની ચર્ચા પૂરી થઈ ગઈ છે. શનિવારે મુખ્યમંત્રી હેમંત સોરેન અને ઝારખંડ કોંગ્રેસ પ્રભારી ગુલામ અહેમદ મીરે સંયુક્ત પત્રકાર પરિષદમાં આ માહિતી આપી હતી. તેમણે જણાવ્યું કે, કોંગ્રેસ અને JMM સાથે મળી 81 માંથી 70 બેઠકો પર ચૂંટણી લડશે. બાકીની 11 બેઠકો ડાબેરી મોરચા અને RJD વચ્ચે વહેંચવામાં આવશે.

JMM-કોંગ્રેસની બેઠકો

જો કે, મુખ્યમંત્રી હેમંત સોરેને સ્પષ્ટ રૂપે જાહેર કર્યું નથી કે JMM કેટલા સીટો પર લડશે અને કોંગ્રેસ કેટલા સીટો પર. આ મુદ્દે તેમણે માત્ર એટલું જણાવ્યું કે બંને પાર્ટીઓ સંયુક્ત રીતે 70 બેઠકો પર ચૂંટણી લડશે. કઈ પાર્ટી કઈ બેઠક પર લડશે તે હજુ નક્કી કરવામાં આવ્યું નથી, પરંતુ આ માહિતી નજીકના સમયમાં જાહેર કરવામાં આવશે. બાકીની 11 બેઠકોમાં ડાબેરી મોરચા અને RJD ને સ્થાન આપવામાં આવ્યું છે. આ ગઠબંધન ઝારખંડમાં શક્તિશાળી બની રહ્યું છે અને આગામી વિધાનસભા ચૂંટણી માટે જનતામાં તેની અસર જોવા મળી શકે છે.

સીટ વહેંચણી પર અટકળો

ઝારખંડમાં મહાગઠબંધનમાં સીટ વહેંચણીનો મુદ્દો સંપૂર્ણ રીતે હલ નથી થયો. હેમંત સોરેનના નિવેદન પ્રમાણે, RJD અને ડાબેરી મોરચાને કેટલી કેટલી બેઠકો પર ઉમેદવારો ઉતારવા મળશે તે હજી જાહેર નથી કર્યું. આથી, સીટ વહેંચણીનો મુદ્દો થોડો અટવાયો છે, કારણ કે કેટલીક બેઠકો પર કોંગ્રેસ અને JMM બંને પાર્ટીઓ પોતાનો દાવો કરી રહી છે. જમુઆ સીટ એ આવી જ એક વિવાદાસ્પદ બેઠક છે. આ સીટ પર JMM અને કોંગ્રેસ બંને પાર્ટીઓનો દાવો છે. JMM ખાસ કરીને આ સીટ પર ભારે દબાણમાં છે, કારણ કે BJP ના ધારાસભ્ય કેદાર હઝરા, જેઓ તાજેતરમાં જ JMM માં જોડાયા છે, તેઓ આ બેઠક પરથી જ લડશે. આ બેઠક પર કોને ટિકિટ મળશે તે મુદ્દો ગઠબંધન માટે મહત્વપૂર્ણ છે. ગઠબંધનમાં 2019માં જમુઆ સીટ કોંગ્રેસના ફાળે ગઈ હતી. પરંતુ કેદાર હઝરા જેએમએમમાં ​​જોડાયા બાદ હવે JMM કોંગ્રેસ પાસે આ સીટની માંગ કરી રહ્યું છે. તેવી જ રીતે કેટલીક અન્ય બેઠકો પણ છે જેના પર મામલો હજુ અટવાયેલો છે.

NDA માં સીટ વિતરણ અંતિમ

જણાવી દઈએ કે, ઝારખંડમાં 13 અને 20 નવેમ્બરે બે તબક્કામાં વિધાનસભા ચૂંટણી યોજાશે. 23 નવેમ્બરે મતગણતરી હાથ ધરાશે. NDA માં સીટ વહેંચણીને અંતિમ સ્વરૂપ આપવામાં આવ્યું છે. રાજ્યમાં ભાજપ 68 બેઠકો પર ચૂંટણી લડશે જ્યારે (AJSU) 10 પર, જનતા દળ (યુનાઇટેડ) બે અને લોક જનશક્તિ પાર્ટી (રામવિલાસ) એક બેઠક પર ચૂંટણી લડશે. AJSU સિલ્લી, રામગઢ, ગોમિયા, ઈચ્છાગઢ, માંડુ, જુગસલાઈ, ડુમરી, પાકુર, લોહરદગા અને મનોહરપુરથી ચૂંટણી લડશે. તેમણે કહ્યું કે JD(U) જમશેદપુર પશ્ચિમ અને તામરથી ચૂંટણી લડશે, જ્યારે એલજેપી (રામ વિલાસ) ચતરાથી ચૂંટણી લડશે.

આ પણ વાંચો:  Maharashtra Election : પિતાના રસ્તે રાજનીતિમાં પ્રવેશ, રાજ ઠાકરેના પુત્ર અમિત ઠાકરે લડશે ચૂંટણી!