• જાતીય શોષણ કે દુષ્કર્મ? Allahabad High Court નો મહત્વપૂર્ણ ચુકાદો
• પાયજામાની દોરી તોડવી દુષ્કર્મ નહીં, 354(B) હેઠળ આવશે : Allahabad High Court
• છોકરીના કપડાં ઉતારવાનો પ્રયાસ દુષ્કર્મ ગણાશે નહીં : Allahabad High Court
• દોષિતો પર દુષ્કર્મનો આરોપ નહીં, POCSO અને IPC 354(B) લાગુ : Allahabad High Court

Important decision of Allahabad High Court : અલ્હાબાદ હાઈકોર્ટે તાજેતરમાં એક જાતીય અપરાધના કેસની સુનાવણી દરમિયાન એક નોંધપાત્ર ચુકાદો આપ્યો છે. કોર્ટે સ્પષ્ટ કર્યું કે, કોઈ છોકરીના ગુપ્તાંગને હાથ લગાડવો અને તેના પાયજામાની દોરી તોડવાની ઘટના ભારતીય દંડ સંહિતા (IPC)ની કલમ 376 હેઠળ દુષ્કર્મનો કેસ નથી ગણાતી. તેના બદલે, આવી ઘટના કલમ 354 (B) હેઠળ આવે છે, જે મહિલાને કપડાં ઉતારવાના ઈરાદાથી હુમલો કરવાના ગુનાને વ્યાખ્યાયિત કરે છે. આ નિર્ણય ન્યાયાધીશ રામ મનોહર નારાયણ મિશ્રાએ 17 માર્ચના રોજ આપ્યો હતો. આ કેસમાં બે આરોપીઓ, પવન અને આકાશે, કાસગંજની સ્પેશિયલ જજની કોર્ટના આદેશને પડકારતી સમીક્ષા અરજી દાખલ કરી હતી, જેના પર આ ચુકાદો આવ્યો.

કેસની વિગત

આ કેસની શરૂઆત 10 નવેમ્બર, 2021ના રોજ થઈ હતી. ફરિયાદી મહિલાએ જણાવ્યું હતું કે, તે સાંજે લગભગ 5 વાગ્યે તેની 14 વર્ષની પુત્રી સાથે ભાભીના ઘરેથી પોતાના ગામ તરફ પરત ફરી રહી હતી. રસ્તામાં તેના ગામના ત્રણ રહેવાસીઓ - પવન, આકાશ અને અશોક - તેમને મળ્યા. આરોપીઓએ મહિલાને પૂછ્યું કે તે ક્યાંથી આવી રહી છે. જ્યારે મહિલાએ જણાવ્યું કે તે ભાભીના ઘરેથી પરત ફરી રહી છે, ત્યારે આરોપીઓએ તેની પુત્રીને મોટરસાઈકલ પર ઘરે મૂકવાની ઓફર કરી. મહિલાએ આ ઓફર સ્વીકારી અને પોતાની પુત્રીને તેમની સાથે મોકલી દીધી.

આરોપોની વિગતો

ફરિયાદમાં દર્શાવવામાં આવ્યું હતું કે, આરોપીઓએ રસ્તામાં મોટરસાઈકલ રોકી અને પવને છોકરીના ગુપ્ત ભાગને હાથ લગાડ્યો. ત્યારબાદ આકાશે છોકરીને નાળા તરફ ખેંચી અને તેના પાયજામાની દોરી તોડી નાખી. છોકરીએ ચીસો પાડી તો નજીકમાંથી પસાર થતા બે વ્યક્તિઓ ત્યાં પહોંચી ગયા. આ દરમિયાન આરોપીઓએ તેમને પિસ્તોલ બતાવીને જાનથી મારી નાખવાની ધમકી આપી અને ઘટનાસ્થળ પરથી ભાગી ગયા. આ ઘટના બાદ પીડિત છોકરી અને સાક્ષીઓના નિવેદનો નોંધાયા, જેના આધારે નીચલી કોર્ટે આરોપીઓને દુષ્કર્મના આરોપ હેઠળ સમન્સ જારી કર્યા હતા.

નીચલી કોર્ટનો નિર્ણય અને સમીક્ષા

કાસગંજની સ્પેશિયલ જજ (POCSO act) ની કોર્ટમાં આ કેસની શરૂઆત થઈ હતી. નીચલી કોર્ટે આરોપીઓ પર IPCની કલમ 376 હેઠળ દુષ્કર્મનો ગુનો નોંધ્યો અને તેમની સામે કાર્યવાહી શરૂ કરી. જોકે, આરોપીઓએ આ આદેશને Allahabad High Court માં પડકાર્યો અને સમીક્ષા અરજી દાખલ કરી. તેમનું કહેવું હતું કે ઘટનાના તથ્યો દુષ્કર્મનો કેસ બનાવતા નથી અને નીચલી કોર્ટનો નિર્ણય ખોટો છે.

હાઈકોર્ટનું વિશ્લેષણ

હાઈકોર્ટે કેસની તમામ હકીકતોની ઝીણવટભરી તપાસ કરી. કોર્ટે જણાવ્યું કે આરોપી પવન અને આકાશ પર છોકરીના ગુપ્ત ભાગને હાથ લગાડવાનો અને તેના કપડાં ઉતારવાનો પ્રયાસ કરવાનો આરોપ છે. જોકે, સાક્ષીઓના હસ્તક્ષેપને કારણે તેઓ પોતાના ઈરાદામાં સફળ થઈ શક્યા નહીં અને ઘટનાસ્થળેથી ભાગી ગયા. કોર્ટે એ પણ નોંધ્યું કે આરોપીઓએ દુષ્કર્મ કરવાનો સ્પષ્ટ ઈરાદો રાખ્યો હતો તેવું માનવા માટે પૂરતા પુરાવા નથી. આકાશે છોકરીને નાળા તરફ ખેંચવાનો પ્રયાસ કર્યો અને તેના પાયજામાની દોરી તોડી, પરંતુ આ ઘટના દુષ્કર્મની શ્રેણીમાં નથી આવતી.

કોર્ટનો અંતિમ ચુકાદો

અલ્હાબાદ હાઈકોર્ટે સ્પષ્ટ કર્યું કે, આરોપીઓ પર દુષ્કર્મનો કોઈ સીધો આરોપ નથી. ઘટનાના તથ્યોને ધ્યાનમાં લેતા, આ કેસ IPCની કલમ 376 હેઠળ નહીં, પરંતુ કલમ 354 (B) હેઠળ ગણાય છે. આ ઉપરાંત, પીડિત સગીર હોવાથી, POCSO એક્ટની કલમ 9 હેઠળ પણ આરોપીઓ સામે કાર્યવાહી થઈ શકે છે, જે સગીરો સામે જાતીય ગુનાઓ માટે સજાની જોગવાઈ કરે છે. આ ચુકાદાએ નીચલી કોર્ટના આદેશને રદ કરીને આરોપીઓ વિરુદ્ધ યોગ્ય કલમો હેઠળ સમન્સ જારી કરવાનો આદેશ આપ્યો.

આ પણ વાંચો :   Welcome Back Crew9! ધરતીએ તમને યાદ કર્યા : PM મોદી