છત્તીસગઢના નવા ચૂંટાયેલા ધારાસભ્યોમાં 17 કલંકિત, 90માંથી 72 ધારાસભ્યો કરોડપતિ
છત્તીસગઢ વિધાનસભા ચૂંટણીમાં જીતેલા 90 ધારાસભ્યોમાંથી 17 વિરૂદ્ધ ગુનાહિત કેસ નોંધાયેલા છે. જેમાંથી છ સામે ગંભીર ગુનાહિત કેસ છે. છત્તીસગઢ ઇલેક્શન વોચ એન્ડ ડેમોક્રેટિક રિફોર્મ એસોસિએશનના રિપોર્ટ અનુસાર, 2018માં 24 એટલે કે 27 ટકા ધારાસભ્યો સામે ફોજદારી કેસ નોંધાયા હતા. આ રીતે ગત વખતની સરખામણીમાં આ વખતે કલંકિત ધારાસભ્યોની સંખ્યામાં ઘટાડો થયો છે. આ 17 ધારાસભ્યોમાંથી 12 ભારતીય જનતા પાર્ટીના છે જ્યારે 5 કોંગ્રેસના છે. તેવી જ રીતે ગંભીર ગુનાહિત કેસોનો સામનો કરનારાઓમાં ભાજપના ચાર અને કોંગ્રેસના બે ધારાસભ્યોનો સમાવેશ થાય છે. રિપોર્ટ અનુસાર, કોંગ્રેસના નેતા અને પૂર્વ મુખ્યમંત્રી ભૂપેશ બઘેલ, દેવેન્દ્ર યાદવ અને અટલ શ્રીવાસ્તવ કોંગ્રેસના મોટા ચહેરા છે, જેમની વિરુદ્ધ કેસ નોંધાયેલા છે.
72 MLA કરોડપતિ છત્તીસગઢમાં નવા ચૂંટાયેલા 90માંથી 72 ધારાસભ્યો કરોડપતિ છે. ગત વિધાનસભાની સરખામણીમાં આ યાદીમાં ચાર વધુ ધારાસભ્યો છે. રાજ્યમાં કરોડપતિ ધારાસભ્યોમાં ભાજપ ટોચ પર છે. તાજેતરમાં યોજાયેલી ચૂંટણીમાં જંગી જીત મેળવનાર ભાજપના 43 ધારાસભ્યો કરોડપતિ છે. કોંગ્રેસ 29 કરોડપતિ ધારાસભ્યો સાથે બીજા સ્થાને છે. તાજેતરમાં યોજાયેલી ચૂંટણીમાં 90 બેઠકોમાંથી ભાજપે 54 અને કોંગ્રેસે 35 બેઠકો જીતી હતી. કરોડપતિઓમાં આ છે ટોચ પર એસોસિએશન ફોર ડેમોક્રેટિક રિફોર્મ્સ (એડીઆર) અને છત્તીસગઢ ઇલેક્શન વોચ દ્વારા હાથ ધરાયેલા વિશ્લેષણ મુજબ, ભાજપના 80 ટકા ધારાસભ્યો અને કોંગ્રેસના 83 ટકા ધારાસભ્યો કરોડપતિ છે. આ વખતે રાજ્યની વિધાનસભા ચૂંટણીમાં વિજેતા ઉમેદવાર દીઠ સરેરાશ સંપત્તિ રૂ. 5.25 કરોડ છે, જ્યારે 2018ની વિધાનસભા ચૂંટણીમાં તે રૂ. 11.63 કરોડ હતી. 33.86 કરોડની સંપત્તિ સાથે ભાજપના પ્રથમ વખત ધારાસભ્ય બનેલા ભવન બોહરા (પાંડારિયા બેઠક) કરોડપતિ ધારાસભ્યોની યાદીમાં ટોચ પર છે, ત્યારબાદ 33.38 કરોડની સંપત્તિ સાથે વિદાય લેતા મુખ્ય પ્રધાન અને કોંગ્રેસના નેતા ભૂપેશ બઘેલ (પાટણ બેઠક) છે.આ પણ વાંચો -ચેન્નાઈમાં ચક્રવાત મિચોંગના કારણે તબાહી, શાળા-કોલેજો બંધ, પરીક્ષાઓ પણ મોકૂફ