• ધોનીનું વિવાદિત LBW, ચાહકોમાં રોષ
• DRS લીધા છતાં ધોની આઉટ, ન્યાય થયો કે અન્યાય?
• અલ્ટ્રા એજમાં સ્પાઈક હોવા છતાં ધોની આઉટ!
• CSKની સતત પાંચમી હાર, ચેપોકમાં ત્રીજો પરાજય
• ચેન્નઈ માટે IPL 2025 બન્યુ ખરાબ સ્વપ્ન!
• ચેન્નઈની હાલત સૌથી ખરાબ: રેકોર્ડબ્રેક હાર

CSK vs KKR : ઈન્ડિયન પ્રીમિયર લીગ (IPL) 2025ની 25મી મેચ 11 એપ્રિલ, 2025ના રોજ ચેન્નાઈના એમએ ચિદમ્બરમ સ્ટેડિયમ ખાતે ચેન્નાઈ સુપર કિંગ્સ (CSK) અને કોલકાતા નાઈટ રાઈડર્સ (KKR) વચ્ચે રમાઈ હતી. આ મેચમાં ચેન્નાઈએ 8 વિકેટે અને 58 બોલ બાકી રહેતાં શરમજનક હારનો સામનો કરવો પડ્યો. આ હાર ચેન્નાઈની આ સિઝનની સતત પાંચમી હાર હતી, જેના કારણે ટીમ પોઈન્ટ ટેબલમાં નવમા સ્થાને ખસી ગઈ છે. આ મેચમાં ચેન્નાઈના ચાહકોનું ધ્યાન મહેન્દ્ર સિંહ ધોની પર કેન્દ્રિત હતું, જેણે ઈજાગ્રસ્ત રુતુરાજ ગાયકવાડની ગેરહાજરીમાં કેપ્ટનશિપ સંભાળી હતી. પરંતુ ધોનીનો LBW નિર્ણય આ મેચનો સૌથી વિવાદાસ્પદ મુદ્દો બની રહ્યો.

ધોનીનું મેદાન પર આગમન અને ચાહકોનો ઉત્સાહ

જ્યારે ચેન્નાઈની ટીમ 7 વિકેટ ગુમાવીને 72 રન પર સંઘર્ષ કરી રહી હતી, ત્યારે ‘થાલા’ ધોની નવમા નંબરે બેટિંગ માટે મેદાનમાં ઉતર્યો. તેના આગમન સાથે ચેપોક સ્ટેડિયમમાં 120 ડેસિબલનો ગગનભેદી અવાજ ગુંજી ઉઠ્યો. ચાહકોને આશા હતી કે ધોની શિવમ દુબે સાથે મળીને ટીમને મુશ્કેલીમાંથી બહાર કાઢશે. પરંતુ આ આશા ટૂંક સમયમાં જ નિરાશામાં ફેરવાઈ ગઈ. મેચની 16મી ઓવરમાં સુનીલ નારાયણના બોલ પર ધોનીને મેદાન પરના અમ્પાયરે LBW (Leg before Wicket) આઉટ જાહેર કર્યો. ધોનીને લાગ્યું કે બોલ બેટની અંદરની ધારને અડીને આવ્યો હશે, અને તેણે તરત જ ડિસિઝન રિવ્યૂ સિસ્ટમ (DRS)નો વિકલ્પ પસંદ કર્યો. DRS દરમિયાન અલ્ટ્રાએજ ટેક્નોલોજીમાં બોલ બેટ પાસેથી પસાર થતી વખતે થોડો સ્પાઈક (ઉછાળો) જોવા મળ્યો, જેના કારણે ચાહકો અને નિષ્ણાતોમાં ચર્ચા શરૂ થઈ. લાંબી ચર્ચા અને વિશ્લેષણ પછી, ત્રીજા અમ્પાયરે નિર્ણય આપ્યો કે બોલ બેટને અડ્યો ન હતો અને બોલ-ટ્રેકરે ત્રણ લાલ દર્શાવ્યા, જેના આધારે ધોનીને આઉટ જાહેર કરવામાં આવ્યો. આ નિર્ણયથી ચેપોકના દર્શકો સ્તબ્ધ થઈ ગયા, અને સોશિયલ મીડિયા પર ચાહકોના મંતવ્યો બે ભાગમાં વહેંચાઈ ગયા. કેટલાક ચાહકોએ અમ્પાયરના નિર્ણયને ખોટો ગણાવ્યો, જ્યારે અન્ય લોકોએ તેને ટેક્નોલોજીના આધારે યોગ્ય ગણાવ્યો.

નિષ્ણાતોના મિશ્ર પ્રતિભાવો

સ્ટાર સ્પોર્ટ્સ પર ચર્ચા દરમિયાન, ભૂતપૂર્વ ક્રિકેટર પિયુષ ચાવલાએ આ નિર્ણય અંગે અલગ દૃષ્ટિકોણ રજૂ કર્યો. તેમણે જણાવ્યું કે, સ્પાઈક હોવા છતાં બોલ અને બેટ વચ્ચે સ્પષ્ટ અંતર હતું, જેના કારણે નિર્ણય આઉટ તરફ ગયો. બીજી તરફ, સોશિયલ મીડિયા પર કેટલાક ચાહકો અને નિષ્ણાતોએ દલીલ કરી કે અલ્ટ્રાએજમાં દેખાયેલો સ્પાઈક બેટના સંપર્કનો પુરાવો હતો, અને ધોનીને નોટઆઉટ આપવો જોઈએ. આ વિવાદે DRSની ચોકસાઈ અને ટેક્નોલોજીના ઉપયોગ પર ફરી એકવાર પ્રશ્નો ઉભા કર્યા. ધોની આ મેચમાં માત્ર 4 બોલમાં 1 રન બનાવીને પેવેલિયન પરત ફર્યો. તેની નવમા નંબરે બેટિંગ કરવાની રણનીતિ પણ ચાહકો માટે આશ્ચર્યજનક હતી, કારણ કે તેઓ ધોનીને વહેલો બેટિંગ કરતો જોવા ઈચ્છતા હતા. ચેન્નાઈની બેટિંગ આખી ઈનિંગ દરમિયાન સંઘર્ષ કરતી રહી, અને ટીમે 20 ઓવરમાં માત્ર 103/9 રન બનાવ્યા, જે તેમનો ચેપોક ખાતેનો અત્યાર સુધીનો સૌથી ઓછો સ્કોર હતો. આ સ્કોર IPL ઈતિહાસમાં ચેન્નાઈનો ત્રીજો સૌથી ઓછો સ્કોર પણ છે. શિવમ દુબે (31 અણનમ) અને વિજય શંકર (29) સિવાય કોઈ બેટ્સમેન નોંધપાત્ર યોગદાન આપી શક્યું નહીં.

KKRનો દબદબો અને નારાયણનું ઓલરાઉન્ડ પ્રદર્શન

સુનીલ નારાયણે આ મેચમાં ઓલરાઉન્ડ પ્રદર્શન કર્યું. તેણે 4 ઓવરમાં માત્ર 13 રન આપીને 3 મહત્વની વિકેટ (રાહુલ ત્રિપાઠી, રવિન્દ્ર જાડેજા અને ધોની) ઝડપી. બેટિંગમાં પણ તેણે 18 બોલમાં 44 રનની તોફાની ઈનિંગ રમી, જેમાં 5 સિક્સર અને 2 ફોર સામેલ હતી. KKRએ 104 રનનો લક્ષ્યાંક માત્ર 10.1 ઓવરમાં 2 વિકેટ ગુમાવીને હાંસલ કરી લીધો. અજિંક્ય રહાણે (20 અણનમ) અને રિંકુ સિંગ (15 અણનમ)એ વિજયને સરળ બનાવ્યો. ઉલ્લેખનીય છે કે, આ મેચ ચેન્નાઈ માટે દુઃસ્વપ્ન સમાન રહી. ચેપોક ખાતે તેમનો સતત ત્રીજો પરાજય IPL ના ઈતિહાસમાં પ્રથમવાર જોવા મળ્યો હતો, અને આ સિઝનની સતત પાંચમી હારે ટીમનું મનોબળ તોડી નાખ્યું. 103/9નો સ્કોર ચેન્નાઈના ઘરઆંગણે અત્યાર સુધીનો સૌથી ઓછો હતો, અને આ નબળા પ્રદર્શનથી ચાહકોમાં નિરાશા ફેલાઈ હતી.

આ પણ વાંચો :  CSK vs KKR : કોલકાતા નાઇટ રાઇડર્સની એક તરફી જીત