પાકિસ્તાને કહ્યું ભારતની જેમ અમને પણ સસ્તા ભાવે ક્રૂડ ઓઇલ આપો, રશિયાએ કરી દીધો ઇન્કાર

રશિયા પાસેથી ભારતની જેમ સસ્તા ભાવે ક્રૂડ ઓઇલ મેળવવાનચી અપેક્ષા સાથે રશિયા ગયેલા પાકિસ્તાની પ્રતિનિધિમંડળને મોટો ઝટકો લાગ્યો છે. ધ ન્યૂઝ ઈન્ટરનેશનલના રિપોર્ટ અનુસાર રશિયાએ પાકિસ્તાનને ક્રૂડ ઓઈલ પર 30-40 ટકા ડિસ્કાઉન્ટ આપવાનો ઈન્કાર કરી દીધો છે. રશિયાએ સ્પષ્ટ કહ્યું છે કે આવી છૂટ આપવામાં આવશે નહીં, જે પછી પાકિસ્તાની પ્રતિનિધિમંડળને નિરાશ થઇને પરત ફરવું પડ્યું છે. 

મીડિયા રિપોર્ટ્સ અનુસાર, પાકિસ્તાનના પેટ્રોલિયમ રાજ્ય મંત્રી મુસાદિક મલિકના નેતૃત્વમાં એક પ્રતિનિધિમંડળ 29 નવેમ્બરે રશિયા ગયું હતું. આ પ્રતિનિધિમંડળે 30 નવેમ્બરે રશિયન અધિકારીઓ સાથે વાતચીત કરી અને સસ્તા તેલ માટે વિનંતી કરી. પાકિસ્તાની અધિકારીઓએ કહ્યું કે તેમને પણ ભારતની જેમ કિંમત પર 30-40 ટકા ડિસ્કાઉન્ટ સાથે તેલ આપવામાં આવે. રશિયન અધિકારીઓએ પાકિસ્તાની પ્રતિનિધિમંડળની વાત ધ્યાનથી સાંભળી હતી પરંતુ સ્પષ્ટ જવાબ આપ્યો ન હતો.

સૂત્રોના જણાવ્યા અનુસાર રશિયા પહેલા તેના એવા મોટા ગ્રાહક દેશોને ક્રૂડ ઓઈલ ઓફર કરી શકે છે જે વિશ્વસનીય અને મજબૂત અર્થવ્યવસ્થા ધરાવે છે.રશિયન અધિકારીઓએ પાકિસ્તાની પ્રતિનિધિમંડળને જણાવ્યું હતું કે તમામ વોલ્યુમ હાલમાં મોટા ખરીદદારો સાથે પ્રતિબદ્ધ છે. અમે આગળ વિચારણા કરીશું પરંતુ હાલમાં તે શક્ય નથી.રશિયન પક્ષે પાકિસ્તાનને કરાચીથી લાહોર, પંજાબ સુધીની પાકિસ્તાન સ્ટ્રીમ ગેસ પાઈપલાઈનના ફ્લેગશિપ પ્રોજેક્ટ માટે તેની પ્રતિબદ્ધતાનું સન્માન કરવા પણ સૂચવ્યું 

આ પહેલા 13 નવેમ્બરે પાકિસ્તાનના નાણા મંત્રી ઈશાક ડારે કહ્યું હતું કે અમેરિકા પાકિસ્તાનને રશિયન તેલ ખરીદવાથી રોકી શકે નહીં અને તે જલ્દી જ શક્ય બનશે. એક્સપ્રેસ ટ્રિબ્યુન અખબારે અહેવાલ આપ્યો છે કે ઇશાક ડારે દુબઈમાં પાકિસ્તાન મુસ્લિમ લીગ-નવાઝ (પીએમએલ-એન) કાર્યકરોને સંબોધિત કરતી વખતે આ ટિપ્પણી કરી હતી. ગયા મહિને અમેરિકાની મુલાકાત દરમિયાન ડારે અમેરિકી વિદેશ વિભાગના અધિકારીઓ સાથે બેઠક યોજી હતી જેમાં રશિયા પાસેથી તેલની ખરીદીના મુદ્દા પર ચર્ચા કરવામાં આવી હતી. પાકિસ્તાની મંત્રીએ કહ્યું કે મંત્રાલય સમાન શરતો પર રશિયા પાસેથી તેલ ખરીદવાનો પ્રયાસ કરશે.

આ પણ વાંચો -  'ભારતને નાટોમાં શામેલ કરવા માંગે છે અમેરિકા' રશિયાના વિદેશ મંત્રીનું મોટુ નિવેદન