'તમને મારી કચરાની ટ્રક કેવી લાગી?' ટ્રમ્પે રાષ્ટ્રપતિ બાઈડેનને લઇને કર્યો કટાક્ષ
- અમેરિકામાં રાષ્ટ્રપતિની ચૂંટણી પૂર્વે ગાર્બેજ ટ્રકની એન્ટ્રી
- બાઈડેને ટ્રમ્પના સમર્થકોની તુલના 'કચરા' સાથે
- ટ્રમ્પે ગાર્બેજ ટ્રક ચલાવીને બાઈડેનને આપ્યો જડબાતોડ જવાબ
US Presidential Election : અમેરિકામાં રાષ્ટ્રપતિની ચૂંટણી હવે નજીક છે ત્યારે રાજકીય તાપમાન સતત ગરમ થતું જોવા મળી રહ્યું છે. ઉમેદવારો વચ્ચે શબ્દયુદ્ધ પણ તેજ બન્યું છે. અમેરિકાના રાષ્ટ્રપતિ જો બાઈડેને રિપબ્લિકન રાષ્ટ્રપતિ પદના ઉમેદવાર ડોનાલ્ડ ટ્રમ્પના સમર્થકોની તુલના 'કચરા' સાથે કરી હતી. હવે ટ્રમ્પે તેને ચૂંટણીનો મુદ્દો બનાવીને પોતાના અંદાજમાં બાઈડેનને જવાબ આપ્યો છે. આ દરમિયાન તેમણે 'મેક અમેરિકા ગ્રેટ' ના નારાનું પુનરાવર્તન પણ કર્યું.
ટ્રમ્પે શું આપ્યો જવાબ?
અમેરિકાના પૂર્વ રાષ્ટ્રપતિ ડોનાલ્ડ ટ્રમ્પ રેલી માટે ગાર્બેજ ટ્રક ચલાવીને વિસ્કોન્સિન પહોંચ્યા હતા. આ સમય દરમિયાન, તેમણે ચમકતા કન્સ્ટ્રક્શન જેકેટ પહેર્યું હતું અને ટ્રક પર સવારી દરમિયાન પત્રકારોના પ્રશ્નોના જવાબો આપ્યા હતા. તેમણે કહ્યું, "તમને મારી કચરાની ટ્રક કેવી લાગી? આ ટ્રક કમલા અને જો બાઈડેનના સન્માનમાં છે." ટ્રમ્પે વધુમાં કહ્યું કે, "જો બાઈડેનનું નિવેદન ખરેખર અપમાનજનક છે."
US રાષ્ટ્રપતિ જો બાઈડેને શું કહ્યું?
જો બાઈડેને ચૂંટણી પ્રચાર દરમિયાન કહ્યું હતું કે, "હું ત્યાં જે કચરો તરતો જોઉં છું તે તેના સમર્થકો છે." તેમણે કહ્યું હતું કે, "થોડા દિવસો પહેલા જ તેમની રેલીમાં એક વક્તાએ પ્યુર્ટો રિકોને "કચરાનો તરતો ટાપુ" કહ્યો હતો. સારું, હું તમને કંઈક કહેવા માંગુ છું. હું તે પ્યુર્ટો રિકન વાસીને નથી ઓળખતો. "હું જાણું છું તે પ્યુર્ટો રિકો મારા હોમ સ્ટેટ ડેલાવેરમાં છે અને ત્યાંના લોકો સારા, સંસ્કારી, આદરણીય છે."
રિપબ્લિકન્સે જવાબ આપ્યો
જો બાઈડેનના નિવેદન પર રિપબ્લિકન સેનેટર માર્કો રૂબિયોએ પેન્સિલવેનિયાના એલનટાઉનમાં હજારો ટ્રમ્પ સમર્થકોની સામે આ ટિપ્પણીનો મુદ્દો ઉઠાવ્યો હતો. પૂર્વ રાષ્ટ્રપતિ ટ્રમ્પે પણ તેની નિંદા કરી હતી. એલેન્ટાઉનમાં એક રેલી દરમિયાન, ટ્રમ્પે બાઈડેનની ટિપ્પણીઓને "ભયાનક" ગણાવી હતી અને તેમની તુલના 2016 માં હિલેરી ક્લિન્ટને કરેલી ટિપ્પણી સાથે કરી હતી, જ્યારે તેણીએ ટ્રમ્પના કેટલાક સમર્થકોને "દુઃખદાયક" કહ્યા હતા. ઉલ્લેખનીય છે કે, અમેરિકાના રાષ્ટ્રપતિ પદ માટે 5 નવેમ્બરે ચૂંટણી યોજાશે. આમાં 60 વર્ષીય હેરિસ 78 વર્ષના ટ્રમ્પ સામે ટક્કર આપી રહ્યા છે.
આ પણ વાંચો: US Presidential Election 2024 : ટ્રમ્પે ચૂંટણી મંચ પર પત્ની મેલાનિયા સાથે કર્યો ડાન્સ