ડોનાલ્ડ ટ્રમ્પની કમલા હેરિસ પર વ્યક્તિગત ટીકા, કહ્યું - હું તેમના કરતા વધુ સુંદર છું

• કમલા હેરિસ પર ડોનાલ્ડ ટ્રમ્પની વ્યક્તિગત ટિપ્પણીઓ
• ટ્રમ્પે કમલા હેરિસના હાસ્યને પાગલ જેવું ગણાવ્યું
• કમલા હેરિસની મજાક ઉડાવતાં ટ્રમ્પે કહ્યું, "હું કમલા હેરિસ કરતા વધુ સુંદર છું"

Donald Trump Controversial Statement : અમેરિકાના પૂર્વ રાષ્ટ્રપતિ અને રિપબ્લિકન પાર્ટીના ઉમેદવાર ડોનાલ્ડ ટ્રમ્પ (Donald Trump) ફરીવાર તેમના વિવાદાસ્પદ નિવેદનોને લઈને ચર્ચામાં આવ્યા છે. તેમણે અમેરિકાની વર્તમાન ઉપરાષ્ટ્રપતિ કમલા હેરિસ (Vice President of the United States Kamala Harris) ના શારીરિક દેખાવ અને બુદ્ધિમત્તા પર વ્યક્તિગત ટિપ્પણીઓ કરી છે. આ ટિપ્પણીઓ તેમણે પેન્સિલવેનિયામાં યોજાયેલી રેલીમાં તેમના સમર્થકો સામે કરી હતી, જ્યાં તેમણે કમલા હેરિસની મજાક ઉડાવતાં કહ્યું હતું કે, "હું કમલા હેરિસ કરતા વધુ સુંદર છું."

ટ્રમ્પના વિવાદાસ્પદ નિવેદનો અને 2024ની ચૂંટણીની તૈયારીઓ

અમેરિકામાં આવતા નવેમ્બર મહિનામાં રાષ્ટ્રપતિની ચૂંટણી યોજાવા જઈ રહી છે, અને ડેમોક્રેટિક પાર્ટી તરફથી ઉપરાષ્ટ્રપતિ કમલા હેરિસને ઉમેદવાર તરીકે પ્રોજેક્ટ કરવામાં આવી છે. હાલમાં વહીવટ સંભાળી રહેલા જો બાઈડેન રાષ્ટ્રપતિપદની રેસમાંથી બહાર થયા બાદ, હેરિસ રિપબ્લિકન ઉમેદવાર ડોનાલ્ડ ટ્રમ્પ (Donald Trump) સામે ચૂંટણી મેદાનમાં છે. ટ્રમ્પે આ સ્પર્ધાને ધ્યાનમાં રાખીને હેરિસ પર કટાક્ષ કરવાનું શરુ કરી દીધું છે અને કહ્યું કે, "જો બાઈડેન કરતા કમલા હેરિસને હરાવવું વધુ સરળ છે." ટ્રમ્પે પોતાના બેબાક અંદાજને લઇને સૌથી વધુ જાણીતા છે. તેમણે 2020ની રાષ્ટ્રપતિ ચૂંટણીને છેતરપિંડીયુક્ત ગણાવી હતી અને ફરીવાર આ મુદ્દાને ઉઠાવ્યો હતો. રેલીમાં તેમણે કમલા હેરિસના હાસ્યને "પાગલ જેવું" ગણાવી તેમનો મજાક ઉડાવ્યો હતો. તેમણે જણાવ્યું કે, "શું તમે ક્યારેય તેમને (કમલા હેરિસને) હસતા જોયા છે? તેમનું હાસ્ય પાગલ વ્યક્તિ જેવું છે."

ટ્રમ્પના હેરિસ સામેના ગંભીર આરોપો

કમલા હેરિસને લઈ ટ્રમ્પના નિવેદનોમાં તેમણે આક્રમકતા પણ દર્શાવી હતી. તેમણે જણાવ્યું કે, "મને તેમના માટે કોઈ માન નથી. આ સાથે તેમની બુદ્ધિ માટે પણ મને માન નથી. હું માનું છું કે તે એક ખરાબ રાષ્ટ્રપતિ બનશે." ટ્રમ્પે આ નિવેદનો સાથે તેમના અને તેમના સમર્થકોના મતને મજબૂત કરવાની કોશિશ કરી છે. ટ્રમ્પના પક્ષના સભ્યોએ તેમને હેરિસ પર વ્યક્તિગત હુમલા ન કરવાની સલાહ આપી છે, પરંતુ ટ્રમ્પે આ અંગે પોતાના મજબૂત મંતવ્યો દર્શાવ્યા છે. તેમણે જણાવ્યું કે, "હું કમલા હેરિસના કારણે ખૂબ જ ગુસ્સે છું. તેમણે ન્યાય પ્રણાલીને હથિયાર બનાવી મારી અને અન્યોની સામે ઉપયોગ કર્યો છે." આ નિવેદનો એ દર્શાવે છે કે 2024ની ચૂંટણીમાં ડોનાલ્ડ ટ્રમ્પ (Donald Trump) કમલા હેરિસને મજબૂત વિરોધી તરીકે જોઈ રહ્યા છે અને આ સંજોગોમાં તેઓ પોતાના સમર્થકોના મનોમૂલ્યને મજબૂત બનાવવા માટે આ પ્રકારના વિવાદાસ્પદ નિવેદનો કરી રહ્યા છે.

આ પણ વાંચો:  US: ટ્રમ્પે કમલાને હરાવવા આ હિન્દુ મહિલા નેતાની લીધી મદદ.....!