• ખ્રિસ્તી ધર્મગુરુ પોપ ફ્રાન્સિસનું નિધન
• 88 વર્ષની વયે વેટિકનમાં લીધા અંતિમ શ્વાસ
• વેટિકન કેમરલેન્ગો કાર્ડિનલમાં નિધન
• ફેફસામાં ઈન્ફેક્શન બાદ બીમાર હતા

Pope Francis passes away : રોમન કેથોલિક ચર્ચના વડા પોપ ફ્રાન્સિસ (Pope Francis), જે લાંબા સમયથી બીમાર હતા, તેમનું નિધન થયું છે. સોમવારે વેટિકન ચર્ચ (Vatican Church) દ્વારા જારી કરાયેલા એક વીડિયો નિવેદનમાં આ માહિતી આપવામાં આવી હતી. તેમણે 88 વર્ષની ઉંમરે અંતિમ શ્વાસ લીધા.

પોપ ફ્રાન્સિસનું નિધન, એક યુગનો અંત

આજે વેટિકનના પોપ ફ્રાન્સિસનું 88 વર્ષની વયે તેમના નિવાસસ્થાન, કાસા સાન્ટા માર્ટા ખાતે નિધન થયું. વેટિકન દ્વારા જારી કરાયેલા સત્તાવાર નિવેદનમાં આ દુઃખદ સમાચારની પુષ્ટિ કરવામાં આવી હતી. પોપ ફ્રાન્સિસ ફેફસાના ગંભીર ચેપથી પીડાતા હતા, જેના કારણે તેમની કિડની પણ ખરાબ થવાના પ્રારંભિક તબક્કામાં પહોંચી હતી. તેમને તાજેતરમાં રોમની જેમેલી હોસ્પિટલમાં દાખલ કરવામાં આવ્યા હતા, જ્યાં તેમની સ્થિતિ નાજુક બની ગઈ હતી. આ પહેલાં 2021માં પણ તેમને આ જ હોસ્પિટલમાં 10 દિવસ સુધી સારવાર માટે દાખલ કરવામાં આવ્યા હતા. તેમના નિધનથી વિશ્વભરના કેથોલિક સમુદાયમાં શોકનું મોજું ફરી વળ્યું છે.

સાદગી અને માનવતાનું પ્રતીક

પોપ ફ્રાન્સિસ તેમના સાદા જીવન, દયાળુ સ્વભાવ અને ગરીબો તેમજ હાંસિયામાં ધકેલાયેલા લોકો પ્રત્યેની સહાનુભૂતિ માટે વિશ્વભરમાં પ્રખ્યાત હતા. તેમણે પોતાના જીવન દ્વારા સાદગી અને નમ્રતાનું ઉદાહરણ પૂરું પાડ્યું. પોપ તરીકે ચૂંટાયા પછી, તેમણે વૈભવી જીવનને બદલે સાદું જીવન જીવવાનું પસંદ કર્યું. તેઓ ઘણીવાર સામાજિક ન્યાય, પર્યાવરણનું સંરક્ષણ, શરણાર્થીઓના અધિકારો અને ધાર્મિક સહિષ્ણુતા જેવા મહત્વના વૈશ્વિક મુદ્દાઓ પર નીડરતાથી પોતાના વિચારો વ્યક્ત કરતા હતા. તેમના આ વલણથી તેઓ લોકોના હૃદયમાં ખાસ સ્થાન બનાવી શક્યા હતા.

ચર્ચમાં સુધારાના પ્રણેતા

પોપ ફ્રાન્સિસે કેથોલિક ચર્ચમાં પારદર્શિતા અને આધુનિકીકરણ લાવવા માટે અનેક પગલાં ભર્યા. તેમનું માનવું હતું કે ચર્ચે ફક્ત પરંપરાઓને જ નહીં, પરંતુ આધુનિક યુગના પડકારોને પણ સ્વીકારવા જોઈએ. તેમણે ચર્ચની આર્થિક વ્યવસ્થામાં સુધારા, દુર્વ્યવહારના કેસોની તપાસ અને વધુ સમાવેશી અભિગમને પ્રોત્સાહન આપ્યું. આ ઉપરાંત, તેમણે લિંગ સમાનતા, આબોહવા પરિવર્તન અને ગરીબી નાબૂદી જેવા વિષયો પર વૈશ્વિક સ્તરે ચર્ચની ભૂમિકાને મજબૂત કરી. તેમના આ સુધારાઓએ ચર્ચને આધુનિક વિશ્વ સાથે વધુ સુસંગત બનાવવામાં મહત્વની ભૂમિકા ભજવી.

ઈસ્ટરનો અંતિમ સંદેશ

પોપ ફ્રાન્સિસે તેમના જીવનના અંતિમ દિવસોમાં પણ લોકો સાથે જોડાયેલા રહેવાનું ચાલુ રાખ્યું. ઈસ્ટર રવિવારના દિવસે તેઓ સેન્ટ પીટર્સ સ્ક્વેરમાં હજારો લોકોને આશીર્વાદ આપવા માટે જાહેરમાં દેખાયા હતા. આ પ્રસંગે લોકોએ તેમનું તાળીઓના ગડગડાટ સાથે ઉષ્માભર્યું સ્વાગત કર્યું. પોપ ફ્રાન્સિસે લોકોને ઈસ્ટરની શુભેચ્છા પાઠવતાં કહ્યું, “ભાઈઓ અને બહેનો, હેપ્પી ઈસ્ટર!” આ જ દિવસે તેમણે અમેરિકાના ઉપરાષ્ટ્રપતિ જેડી વાન્સ સાથે પણ મુલાકાત કરી, જે તેમની અંતિમ જાહેર મુલાકાતોમાંની એક હતી.

આ પણ વાંચો :  અમેરિકામાં રાહુલ ગાંધીના નિવેદન પર ભાજપનો વળતો જવાબ