ચાર રાજ્યોની 16 રાજ્યસભા બેઠકો પર આજે થશે મતદાન

રાજ્યસભાની ચૂંટણીને હવે ગણતરીના જ કલાકો બાકી રહ્યા છે. રાજ્યસભાની આ ચૂંટણીઓ માટે 15 રાજ્યોમાં કુલ 57 બેઠકો યોજાવાની હતી. જેમાં ઉમેદવારી પત્રો પરત ખેંચવાના અંતિમ દિવસે 41 સભ્યો બિનહરીફ ચૂંટાયા હતા. હવે માત્ર ચાર રાજ્યોમાં 16 બેઠકો પર આજે મતદાન થવાનું છે. 

રાજ્યસભાની આ ચૂંટણીઓ મહારાષ્ટ્ર, રાજસ્થાન, હરિયાણા અને કર્ણાટકમાં યોજાઈ રહી છે. ચારેય રાજ્યોમાં આ મુકાબલો ઉગ્ર બનવાની સંભાવના છે કારણ કે દરેક જગ્યાએ પક્ષોએ વિધાનસભામાં તેમની વિધાનસભાની સંખ્યા કરતા વધુ ઉમેદવારો ઉભા રાખ્યા છે. આ ચાર રાજ્યોમાં ચૂંટણી હવે રસપ્રદ બની છે. તમામ પક્ષો દ્વારા હોર્સ ટ્રેડિંગ અને ક્રોસ વોટિંગની પણ આશંકા વ્યક્ત કરવામાં આવી રહી છે. જણાવવામાં આવી રહ્યું છે કે ઉમેદવારોની જોડતોડની રાજનીતિ જોરમાં છે. તેનાથી બચવા માટે તમામ પાર્ટીઓએ પોતાના ધારાસભ્યોને રિસોર્ટમાં છુપાવી દીધા છે. ધારાસભ્યો અહીં-તહીં ન ફરે તે માટે પણ કડક તકેદારી રાખવામાં આવી રહી છે. મહત્વનું છે કે, મહારાષ્ટ્રમાં રાજ્યસભાની 6 બેઠક, રાજસ્થાનમાં 4 બેઠક, કર્ણાટકમાં 4 બેઠક અને હરિયાણામાં 2 બેઠક માટે ચૂંટણી થવાની છે. 

રાજસ્થાનમાં રાજ્યસભાની ચાર બેઠકો માટે મતદાન થવાનું છે. કોંગ્રેસે મુકુલ વાસનિક, રણદીપ સુરજેવાલા અને પ્રમોદ તિવારીને મેદાનમાં ઉતાર્યા છે જ્યારે ભાજપે પૂર્વ મંત્રી ઘનશ્યામ તિવારીને પસંદ કર્યા છે. કોંગ્રેસ 2 અને ભાજપ એક બેઠક આરામથી જીતશે. મીડિયા બિઝનેસમેન સુભાષ ચંદ્રાએ ભાજપ સમર્થિત અપક્ષ ઉમેદવાર તરીકે મેદાનમાં ઉતરીને સ્પર્ધાને રસપ્રદ બનાવી છે. સુભાષ ચંદ્રાએ દાવો કરીને કોંગ્રેસની ચિંતા વધારી કે આઠ ધારાસભ્યો તેમની તરફેણમાં ક્રોસ વોટ કરશે અને તેઓ જીતશે.