કોઇની પાસે 6 બોરની રિવોલ્વર, તો કોઇની પાસે પિસ્તોલ, જાણો કેટલા ઉમેદવારો પાસે છે હથિયારનું લાયસન્સ

ગુજરાત વિધાનસભાની આ વખતની એટલે કે 2022ની ચૂંટણીમાં વિવિધ પક્ષોના જે કુલ ઉમેદવારો ઉભા છે.તેમાંથી 13 ઉમેદવારો પાસે હથિયારનું લાયસન્સ છે. જે 13 ઉમેદવારો પાસે હથિયારનું લાયન્સ છે,તેમાં  ભાજપના 6, કોંગ્રેસના 5, આમ આદમી પાર્ટીના એક અને એક અપક્ષ ઉમેદવારનો સમાવેશ થાય છે. ભાજપે આ વખતે મધુ શ્રીવાસ્તવને ટિકિટ આપી નથી, તેથી તેઓ વાઘોડિયાથી અપક્ષ ઉમેદવાર તરીકે લડી રહ્યા છે. વાઘોડિયાથી ભાજપના અશ્વિન પટેલ ઉમેદવાર છે. અશ્વિન પટેલ પાસે 12 બોરની સિંગલ બેરલ ગન પણ છે.

હથિયારનું લાયસન્સ ધરાવતા અન્ય વર્તમાન ધારાસભ્યોની વાત કરીએ તો  ધાનેરાના કોંગ્રેસના ઉમેદવાર નાથાભાઈ પટેલ, રાધનપુરના રઘુ દેસાઈ, ડાંગ અને નિકોલના ભાજપના ઉમેદવાર વિજયભાઇ પટેલ અને જગદીશભાઇ પંચાલનો સમાવેશ થાય છે. ધાનેરામાં ભાજપ અને કોંગ્રેસના બંને ઉમેદવારો હથિયારનું લાયસન્સ ધરાવે છે. 2017માં કોંગ્રેસના નાથાભાઈ પટેલે ભાજપના માવજી દેસાઈને 2,093 મતોના માર્જિનથી હરાવીને આ બેઠક જીતી હતી. આ વખતે ભાજપે દેસાઈની ટિકિટ કાપી છે, જે બાદ તેઓ અપક્ષ મેદાનમાં ઉતર્યા છે. પરંતુ અહીંથી ભાજપે જે ઉમેદવારને મેદાનમાં ઉતાર્યા છે તે છે ભગવાન ભાઇ પટેલ, જેમની પાસે 6 બોરની રિવોલ્વરનું લાયસન્સ  છે. 

બીજી તરફ થરાદ બેઠક પરથી ભાજપે  જેમને ટિકીટ આપી છે તે શંકરભાઇ ચૌધરી પાસે પણ હથિયારનું લાયસન્સ છે. 2017ની ચૂંટણીમાં તેઓ વાવ બેઠક પરથી ગેનીબેન ઠાકોર સામે શંકરભાઇ ચૂંટણી હારી ગયા હતા.આ તરફ તખ્ત સિંહ સોલંકી શહેરા સીટ પરથી આમ આદમી પાર્ટીના ઉમેદવાર છે.સોલંકી પાસે 0.32 ઇંચની MK-3 લાયસન્સવાળી રિવોલ્વર હોવાનું જાણવા મળ્યું છે. 

એ જ રીતે ડીસાના કોંગ્રેસના ઉમેદવાર સંજય રબારી પાસે પણ હથિયારનું લાયસન્સ છે. રાધનપુરના કોંગ્રેસના ઉમેદવાર રઘુ દેસાઈ પાસે પણ હથિયારનું લાયસન્સ છે. . અન્ય ઉમેદવારો જેમની પાસે લાયસન્સવાળી બંદૂકો છે તેમાં અકોટાના ભાજપના ઉમેદવાર ચૈતન્ય દેસાઈ, બોટાદના કોંગ્રેસના મનહર પટેલ અને ડભોઈના કોંગ્રેસના ઉમેદવાર બાલકૃષ્ણ પટેલનો સમાવેશ થાય છે.

આ પણ વાંચો  - માત્ર ઉમેદવાર હસમુખ પટેલને જીતાડવા નહિ, ભુપેન્દ્ર પટેલને CM બનાવવા મત આપો: ગૃહમંત્રીશ્રી