ઉમેદવારો જ્યોતિષશાસ્ત્રના માર્ગે, કોઈએ ચા પીવાની બાધા લીધી તો કોઈએ શરૂ કરાવ્યા જાપ

ગુજરાત વિધાનસભાની ચૂંટણી (Gujarat Elections 2022) આડે હવે આંગળીના ટેરવે ગણી શકાય એટલા દિવસો જ બચ્યા છે. રાજકીય પક્ષોએ લોકશાહીના આ પર્વમાં પોતાના મુરતિયાઓ જાહેર કરી દીધાં છે. જેને ટિકિટ મળી છે તે ખુશખુશાલ છે, તો જેને ટિકિટ નથી મળી તે ખુશ રહેવાનો પ્રયાસ કરે છે. કહી ખુશી, કહી ગમનો માહોલ છે અને ક્યાંક રોષ છે. આ બધા વચ્ચે જે ઉમેદવારોએ ટિકિટ માટે હાઈકમાન્ડ પાસે લોબિંગ શરૂ કર્યું હતું અને ટિકિટ મળી ગઈ છે તે મુરતિયાઓ હવે જ્યોતિષીઓ (Astrologers) પાસે પોતાનું લોબિંગ શરૂ કરી દીધું છે એટલે કે ઉમેદવારો હવે જ્યોતિષીઓ પાસે જીતનો મંત્ર મેળવવા પહોંચી રહ્યાં છે.

ચૂંટણી લડવા માટે ઉત્સુક ઉમેદવારો ટિકિટ મળ્યા પહેલા પણ જ્યોતિષીઓ પાસે જઈ આ વખતે પાર્ટી ટિકિટ આપશે કે કેમ? કોઈ વિધિ કરવી પડશે? જેવા પ્રશ્નો જ્યોતિષાચાર્યો પાસે મુક્યા હતા તો ટિકિટ મળી ગયા બાદ ક્યા શુભમૂહુર્તમાં ફોર્મ ભરવું, કયા રંગના કપડા પહેરીને ફોર્મ ભરવું તેવી સલાહ પણ જ્યોતિષીઓ પાસે ઉમેદવારોએ લીધી છે. એ સિવાય ઉમેદવાર પોતાના ગુરૂ, સંતો મહંતોના આશિર્વાદ લઈને આગળ વધ્યા છે. અમારા સુત્રો જણાવે છે કે, કેટલાક ઉમેદવારોએ તો જાપ પણ શરૂ કરાવી દીધાં છે. 

ટિકિટ મળી ગયા પછી વિધાનસભાના દ્વારેથી કોઈ પણ સંજોગોમાં પરત નથી ફરવું અને જીત મેળવવી છે તેવા મક્કમ નિર્ધાર સાથે ઉમેદવારો કોઈ પણ કચાશ છોડવા નથી માંગતા ત્યારે બાધા-માનતાનો સહારો પણ ઉમેદવારોએ લઈ લીધો છે. કોઈ ઉમેદવારોએ ચૂંટણી પરિણામ સુધી ચા નહી પિવાની બાધા લીધી છે તો કોઈએ કુળદેવી માતાએ ચાલીને જવાની બાધા લીધી છે. એ સિવાય નાની-મોટી મનાતાઓ તો દરેક ઉમેદવારોએ રાખી હોવાનું જાણવા મળ્યું છે.

આ પણ વાંચો - ગુજરાતની આ બેઠકોનો ઈતિહાસ રહ્યો છે રસપ્રદ, આ વખતે જામશે ખરાખરીનો ખેલ