પોરબંદરમાં યુવા મતદાન મથકે લોકોમાં આકર્ષણ જમાવ્યું

ગુજરાત વિધાનસભાની ચૂંટણી (Gujarat Assembly Election) દરમિયાન પોરબંદર (Porbandar) જિલ્લામાં પોરબંદર અને કુતિયાણા વિધાનસભાની બેઠક પર શાંતિપૂર્ણ રીતે મતદાન પૂર્ણ થયું હતું. પોરબંદર જિલ્લાના 494 મતદાન મથકો પર મતદાનની કામગીરી કરવામાં આવી હતી. જિલ્લાના 246 મતદાન મથક પર વેબ કાસ્ટિંગ કરવામાં આવ્યું હતું. લોકો નિષ્પક્ષ અને નિર્ભય રીતે મતદાન કરી શકે અને ભારતના ચૂંટણી પંચની માર્ગદર્શિકા અનુસાર મતદાનની કામગીરી સુપેરે પાર પડે તે માટે જિલ્લા ચૂંટણી તંત્ર દ્વારા તૈયારીઓ કરવામાં આવી હતી.

પોરબંદર જિલ્લાનાં ૪૯૪ મતદાન મથકો પર મતદાન પ્રક્રિયા હાથ ધરાઇ હતી. જે પૈકી પોરબંદર જિલ્લામાં ૨૧ વિશિષ્ટ મતદાન મથકો ચૂંટણીપંચ દ્રારા ઉભા કરવામાં આવ્યા હતા. જેમા મતદારોએ મતદાન કર્યુ હતું. આ વિશિષ્ટ મતદાન મથકો પૈકી દિવ્યાંગ કર્મચારીઓ સંચાલિત ૨ મતદાન મથકો હતા. જેમા ૧ સુરૂચી બાલ મંદિર ખાપટ તથા ધરમપુર પ્રાથમીક શાળા તથા ૨ મોડેલ મતદાન મથકો જેમા ૧ કે.એચ. માધવાણી કોલેજ તથા રાંઘાવાવ પ્રાથમીક શાળા ખાતે, તેમજ ૨ ગ્રીન મતદાન મથકો જેમા ગવર્મેન્ટ પોલીટેકનીક પોરબંદર તથા બાલોચ ખાતે ગ્રીન મતદાન મથક ઉભુ કરાયુ હતુ. આ ઉપરાંત યુવા કર્મચારીઓ સંચાલિત એમ.ડી. સાયન્સ કોલેજ ખાતે ૧ યુવા મતદાન મથક બનાવાયુ હતુ. આ ઉપરાંત જિલ્લામાં જુદી-જુદી ૧૪ જગ્યાએ મહિલા કર્મચારીઓ સંચાલિત સખી મતદાન મથકો શરૂ કરાયા હતા. આમ પોરબંદર જિલ્લામાં કુલ ૨૧ વિશિષ્ટ મતદાન મથકો આકર્ષણનુ કેન્દ્ર બન્યા હતા.

ચૂંટણીપંચે શરૂ કરેલ યુવા મતદાન બુથમાં યુવા કર્મચારીઓમાં ખુબ જ ઉત્સાહ જોવા મળ્યો હતો. પોરબંદરની એમ.ડી. સાયન્સ કોલેજ ખાતે આવેલા યુવા મતદાન બુથ યુવા કર્મચારીઓ સંચાલિત હતુ. સરકારી હાઇસ્કુલ નાગકાના શિક્ષક અને પ્રિસાઇડીંગ ઓફિસર હમીરભાઇ મોઢવાડીયાએ કહ્યુ કે, અમે યુવા કર્મચારીઓ આપસમાં સહકારથી સારી રીતે ફરજ બજાવી હતી તથા મતદારોનો પણ ખુબ જ સારો સહકાર મળ્યો હતો.

 મતદાનના દિવસે મોટી ઉંમરના સિનીયર સિટીઝન તેમજ બિમાર નાગરીકોની મદદે પોરબંદર પોલીસ જવાનો આવ્યા હતા. પોરબંદર પોલીસ પ્રજાના મિત્ર બની મતદાનના દિવસે અલગ અલગ બુથ પર મતદાતાઓને મદદરૂપ થઇ પોલીસે એમની માનવતાને ઉજાગર કરી હતી. શહેરના વી. જે. મદ્રેસા ગર્લ્સ સ્કૂલ ખાતે બપોરના સમયે લીલાબેન નામના વૃદ્ધા મતદાન કરવા માટે આવ્યા હતા અને તેમની તબિયત લથડતા પોલીસ તથા બી.એસ.એફ.ના જવાનો મદદે આવ્યા હતા. ખુરશી ઉપર બેઠાડી વૃદ્ધાને પાણી પીવડાવ્યું હતું. પરંતુ તેમની તબિયત વધુ લથડતા તાત્કાલીક સ્થાનીક સહાયકોની મદદથી રીક્ષા બોલાવવામાં આવી હતી. પોલીસ જવાન તથા બી.એસ.એફ.ના જવાને વૃદ્ધાને રીક્ષા સુધી પહોંચાડી વૃદ્ધાને સારવાર માટે હોસ્પિટલ તરફ રવાના કર્યા હતા. 

આ પણ વાંચો---પોરબંદરમાં 59.91 ટકા મતદાન, બંને પક્ષોના જીતવાના દાવા