થર્ટી ફર્સ્ટનો પોલીસનો એક્શન પ્લાન, નવા વર્ષની ઉજવણીમાં પોલીસની રહેશે બાજ નજર

પોરબંદર જિલ્લા પોલીસ અધિક્ષક ડો.રવિ મોહન સૈની દ્વારા પોરબંદર જિલ્લાની જનતાને અપીલ કરવામાં આવે છે કે, આગામી 31 ડિસેમ્બરના તહેવારની અલગ- અલગ જગ્યાઓએ ઉજવણી કરવામાં આવનાર હોય જે અનુસંધાને પોરબંદર દ્વારા એકશન પ્લાન તૈયાર કરવામાં આવ્યો છે.

પોરબંદર જિલ્લામાં નશો કરીને નિકળનારાને ચેક કરવા બ્રેથ એનેલાઇઝર્સનો ઉપયોગ કરવામાં આવશે તેમજ નશો કર્યો હોવાની નાનકડી આશંકા પણ પડશે તો દરેક વ્યકિતને હોસ્પિટલમાં બ્લડ આલ્કોહોલ ટેસ્ટ માટે મોકલવામાં આવશે અને ત્યાં રિર્પોટ મુજબ જ આગળની કાર્યવાહી કરવામાં આવશે.

પોરબંદર શહેર તેમજ ગ્રામ્ય વિસ્તારોમાં આવેલા ફાર્મ હાઉસ, હોટલ, કલબ, કાફે તેમજ અન્ય જગ્યાઓ પર 31 ડિસેમ્બરની પાર્ટી કે ઉજવણી થવાની હોય ત્યાં સવારથી જ પોલીસને સ્ટેન્ડ ટુ ના આદેશ આપી દેવામાં આવ્યા છે. ઉપરાંત શહેરના સંવેદનશીલ વિસ્તારોમાં સઘન વાહન ચેકીંગ કરી આવારા તત્વોને કાયદાની ભાષામા સમજાવવામાં આવશે.

પોરબંદર જિલ્લામાં 11 જેટલી ચેક પોસ્ટો ઉભી કરવામાં આવનાર છે તથા પોરબંદર જિલ્લાના એન્ટ્રી અને એક્ઝિટ પોઇન્ટ પર ચેકપોસ્ટ ગોઠવી દેવામાં આવી છે. રાત્રીના બાર વાગ્યા બાદ આવશ્યક કારણો વગર લોકો અવર-જવર કરશે તો તેનું સઘન ચેકીંગ કરવામાં આવશે. 31 ડિસેમ્બરની પાર્ટી કે ઉજવણીવાળી જગ્યાઓ પર પોલીસ બાઇકથી પેટ્રોલીંગ કરીને વોચ રાખશે. ગ્રામ્ય વિસ્તારમાં ગ્રામ્ય ડિવાયએસપી તેમજ શહેર વિસ્તારમાં શહેર ડિવાયએસપી, એસઓજી, એલસીબીની ટીમો દ્વારા ખાસ ચકાસણી કરવામાં આવશે.

પોરબંદર પોલીસ દ્વારા નેત્રમ કમાન્ડ કંટ્રોલ સેન્ટર અંતર્ગત લગાડવામાં આવેલા CCTV કેમેરા દ્વારા પૂરતી વોચ રાખવામાં આવશે. જેથી અસામાજીક તત્વો દ્વારા ઉજવણી દરમિયાન કોઇપણ પ્રકારની ગેરકાયદેસર પ્રવૃત્તિ કરી તહેવારની ઉજવણીમાં ખલેલ ન પહોંચાડી શકે.

જિલ્લામાં ક્યાંય પણ આવારા કે અસામાજીક તત્વો દ્વારા કોઇ ગેરકાયદેસર કામગીરી કરવામાં આવે તો જિલ્લા પોલીસના કંટ્રોલ નંબર ૦૨૮૬-૨૨૪૦૯૨૨ તથા મો.૮૯૮૦૦૦૯૮૧૫ પર જાણ કરવા અનુરોધ કરાયો છે. જાણ કરનારની ઓળખ ગુપ્ત રાખવામાં આવશે.

આ પણ વાંચો - RBIગવર્નરશ્રીએ સ્મૃતિવન ભૂકંપ સ્મારક અને સંગ્રહાલયની મુલાકાત લીધી