ભાજપના વાવાઝોડામાં અડિખમ રહ્યા અર્જુન મોઢવાડીયા

ગુજરાત વિધાનસભાની ચૂંટણી (Gujarat Assembly Election)ના પરિણામો જાહેર થઇ ગયા છે. રાજ્યમાં ભાજપનું વાવાઝોડું ફૂંકાયું છે. જો કે  પોરબંદર જિલ્લામાં ભાજપને પરાજય ખમવો પડ્યો છે અને કુતિયાણામાં સમાજવાદી પાર્ટીના કાંધલ જાડેજા તો પોરબંદરમાં કોંગ્રેસના દિગ્ગજ નેતા અર્જુનભાઇ મોઢવાડિયા (Arjun Modhwadia)એ તેમના નજીકના ભાજપના પ્રતિસ્પર્ધીઓને પરાજય આપ્યો છે. 

પોરબંદર બેઠકનો ચૂંટણી જંગ આ વખતે ખૂબજ ચર્ચામાં રહ્યો હતો. ભાજપ દ્વારા ઉમેદવારની પસંદગી મામલે લગભગ છેક સુધી જળવાઇ રહેલું રહસ્ય ખુલતા આખરે બાબુભાઇ બોખીરિયા પર જ ફરી એકવાર પસંદગીનો કળશ ઢોળવામાં આવ્યો હતો તો કોંગ્રેસે ફરી એકવાર અર્જુનભાઇ મોઢવાડિયા પર વિશ્વાસ દર્શાવ્યો હતો અને આ વિશ્વાસને સાર્થક કરતા અર્જુનભાઇ મોઢવાડિયાએ પોરબંદર સીટ પર 8181 મતે વિજય હાંસલ કર્યો છે. 

પોરબંદરની બેઠક પણ કુતિયાણાની જેમ જ ગુજરાતના રાજકારણમાં હંમેશા ચર્ચાના સ્થાને રહે છે. પોરબંદર વિધાનસભા બેઠક પર આ વખતે ચૂંટણી જંગમાં ઉતરેલા બાબુભાઇ બોખીરિયા અને અર્જુનભાઇ મોઢવાડિયા આ પહેલા ૪ વખત એક-બીજા સામે ટકરાઇ ચૂક્યા હતા જેમાં ત્રણ વિજય સાથે બાબુભાઇનું પલડુ ભારે હતું. આ વખતે ફરી એકવાર ભાજપે અર્જુનભાઇ સામે બાબુભાઇને ટીકીટ આપી હતી. પરંતુ તેઓ જીતની હેટ્રીક સર્જી શક્યા ન હતા. ઉલ્લેખનીય છે કે પોરબંદર બેઠકના ઇતિહાસમાં અગાઉ ક્યારેય પણ કોઇ ઉમેદવાર સતત ત્રણ વખત વિજેતા થયો નથી, જેમાં હવે બાબુભાઇ બોખીરિયાનું નામ પણ ફરી એકવાર ઉમેરાયું છે. 

પોરબંદર સરકારી પોલીટેકનીક કોલેજ ખાતે શરૂ થયેલી મત ગણતરીના પ્રારંભથી જ અર્જુનભાઇ અને બાબુભાઇ વચ્ચે રસાકસીની હરીફાઇ જામેલી જોવા મળી હતી. ક્યારેક અર્જુનભાઇનું તો ક્યારેક બાબુભાઇનું પલડુ જોવા મળી રહ્યું હતું. પરંતુ ૧૦માં રાઉન્ડ બાદ અર્જુનભાઇ મોઢવાડિયાએ પકડી લીધેલી સ્પીડને રોકવામાં બાબુભાઇ બોખીરિયા નિષ્ફળ રહ્યાં હતા અને ૧૯માં રાઉન્ડના અંતે તેમણે 8181 મતોથી પરાજય ખમવો પડ્યો હતો. પોરબંદર બેઠકની વાત કરીએ તો અહીં વિજેતા થયેલા અર્જુનભાઇ મોઢવાડિયાને 82056,બાબુભાઇ બોખીરિયાને 73875 તથા આમ આદમી પાર્ટીના જીવનભાઇ જુંગીને 5319મત મળ્યા છે.  પોરબંદર બેઠક પર ગત ચૂંટણીમાં પણ 2769જેટલા નોટા નોંધાયા હતા.

આ પણ વાંચો--આ વખતે કોંગ્રેસની ખામ સામે ભાજપની PODA થીયરી સફળ