Surat : 'ગ્રીષ્મા હત્યાકાંડ' જેવી ઘટના! એક તરફી પ્રેમમાં પાગલ યુવકે યુવતી પર ચપ્પુથી હુમલો કર્યો અને પછી...

સુરત (Surat) શહેરના કાપોદ્રામાં (Kapodra) યુવતી અને લોકોની બહાદુરીને પગલે ગ્રીષ્મા હત્યાકાંડ જેવી ઘટનાને બનતા અટકાવાઇ હતી. યુવતીએ બૂમાબૂમ કરતા લોકોના ટોળાએ યુવતી પર ચપ્પુ વડે હુમલો કરનારા હુમલાખોર યુવકને ઝડપી લીધો હતો અને નરાધમને પોલીસને હવાલે કર્યો હતો. હુમલાખોર યુવક યુવતીના એક તરફી પ્રેમમાં પાગલ હતો. પહેલા યુવકે યુવતીને ધમકી આપી કે 'તું ફોન કેમ ઉપાડતી નથી. મને રિસ્પોન્સ આપવાનું કેમ બંધ કર્યુ છે.' એમ કહી ખિસ્સામાંથી ચપ્પુ કાઢી તેના પર હુમલો કર્યો હતો. જે બાદ ગ્રીષ્મ હત્યાકાંડ (Grishma Massacre) જેવી ગંધ આવતા પોલીસ દોડતી થઈ હતી.

કાપોદ્રાની (Kapodra) 19 વર્ષીય વિદ્યાર્થિની 6 તારીખે બપોરે કોલેજથી તેના મિત્ર સાથે બાઇક પર ઘરે આવી રહી હતી. તે વેળા કાપોદ્રા બુટભવાની મંદિરની આગળ ચાર રસ્તા પાસે રિક્ષામાં બેસીને હુમલાખોર રૂતિક વસાવા ઉર્ફે રોકી આવ્યો હતો. યુવતી જે બાઇક પર ઘરે જઈ રહી હતી તેને હુમલાખોરે લાત મારી હતી, જેના કારણે યુવતી સહિત બંને જણા બાઇક પરથી નીચે પટકાયા હતા. ત્યારે હુમલાખોર રૂતિક વસાવાએ પોતાની પાસેથી ચપ્પુ કાઢી યુવતી પર હુમલો કરી દીધો હતો. પોતાની પર જીવલેણ હુમલો થતાં જોઈ યુવતીએ બૂમબૂમ કરી હતી, જેથી તરત જ નજીકના લોકો ભેગા થઈ ગયા હતા. આ પહેલા હુમલાખોરે યુવતીને આંખના ભાગે, હાથ તેમ જ મોઢાના ભાગે ચપ્પુના ઘા ઝીંકી દેતા ગંભીર ઈજાઓ થઈ હતી. ટોળાએ હુમલાખોરને પકડી તેના હાથમાં ચપ્પુ છીનવી લીધું હતું. પછી પોલીસને જાણ કરતા કાપોદ્રા પોલીસ (Kapodra Police) ઘટના સ્થળે પહોંચી હતી અને આરોપીની ધરપકડ કરી પોલીસ સ્ટેશન લઈ ગઈ હતી.

આરોપી હીરાના કારખાના માં મજૂરી કરે છે

બીજી તરફ, લોહીલુહાણ હાલતમાં યુવતીને ખાનગી હોસ્પિટલમાં લઈ જવાઈ હતી. કાપોદ્રા પોલીસે (Surat) યુવતીની ફરિયાદના આધારે 24 વર્ષીય રૂતિક (Rutik Vasava) ઉર્ફે રોકી સુખદેવ વસાવા જે વરાછા (Varachha) સ્થિત જૂની આંબાવાડી ખાતે રહે છે, તેની સામે ગુનો નોંધી આગળની કાર્યવાહી હાથ ધરી છે. પોલીસ તપાસ મુજબ, આરોપી હીરાના કારખાના માં મજૂરી કરે છે. અગાઉ આરોપી યુવતી સાથે સ્કૂલમાં ભણતો હતો તે વખતે એકબીજાને ઓળખતા હતા. આ યુવક છેલ્લા ઘણા વખતથી યુવતીને હેરાન કરતો હતો. પરંતુ, તેણે આ વાત ઘરમાં કરી ન હતી. પીડિતા છેલ્લાં બે વર્ષથી કોલેજમાં અભ્યાસ કરે છે. માહિતી મુજબ, આરોપી રોકીએ યુવતીને આંખ પર ચપ્પુ મારતા તેને 4 ટાંકા આવ્યા છે. તેણે ગળા પર ચપ્પુ મારવાની કોશિશ કરતા તેણે પ્રતિકાર કરતા હાથમાં ઈજા થઈ હતી. આ મામલે પોલીસે આગળની કાર્યવાહી હાથ ધરી છે.

અહેવાલ : રાબિયા સાલેહ

આ પણ વાંચો - Oparetion અસુર : આ માખણ મારી નાખશે! ‘નકલી માખણ’ના ગોરખધંધાનો ગુજરાત ફર્સ્ટે કર્યો પર્દાફાશ