આજે 'દાદા'ની તિજોરી ખુલશે, ગુજરાતીઓની બજેટ પર નજર

ગુજરાત વિધાનસભાના બજેટ સત્રનો પ્રારંભ થયો છે ત્યારે સત્રના બીજા દિવસે આજે શુક્રવારે ભૂપેન્દ્ર પટેલ સરકારનું  બજેટ નાણાં મંત્રી કનુભાઇ દેસાઇ ગૃહમાં રજૂ કરશે. આજના બજેટ તરફ ગુજરાતવાસીઓ મીટ માંડીને બેઠા છે.  ભૂપેન્દ્ર પટેલ સરકાર બીજી વાર ચૂંટાયા બાદ આ પહેલું બજેટ છે. 

વિધાનસભા બજેટ સત્રના બીજા દિવસે રાજ્ય સરકાર વર્ષ 2023-24 નું બજેટ રજૂ કરશે. શુક્રવારે સત્રની શરૂઆત સવારે 10 વાગ્યે થશે. સત્રની શરૂઆત પ્રશ્નોતરી સાથે થશે.સામાન્ય વહીવટ, મહેસુલ, ગૃહ નિર્માણ,માર્ગ મકાન વિભાગોના પ્રશ્નો આવતી કાલે પ્રશ્નોતરી કાળમાં ચર્ચાશે..ત્યારબાદ 11.30 વાગ્યે રાજ્ય સરકારનું બજેટ નાણા મંત્રી કનુભાઈ દેસાઈ રજૂ કરશે

નાણામંત્રી કનુભાઇ દેસાઇ બીજી વખત અને નવી સરકારનું પહેલું બજેટ રજૂ કરશે. આ વખતે બજેટના કદમાં માતબર વધારાની શક્યતા છે. ગત વર્ષે 2.43 લાખ કરોડ રૂપિયાનું બજેટ રજૂ કરવામાં આવ્યું હતું જ્યારે આગામી વર્ષ 2023-24 માટે બજેટના કદમાં 10 થી 20 ટકાનો વધારો કરાય તેવી શક્યતા છે જેથી બજેટનું કદ 2.90 લાખ કરોડ આસપાસ રહેવાની ધારણા છે..આગામી 15 એપ્રિલથી જંત્રીના નવા દરો લાગુ પડનાર હોવાથી આગામી નાણાકીય વર્ષમાં સ્ટેમ્પ ડ્યુટીની આવકમાં પણ માતબર વધારો થવાનો અંદાજ છે. 

બીજી તરફ રાજ્ય સરકાર કરકસરના પગલાં પણ લઇ રહી છે. જેથી મોટું આર્થિક ભારણ હોય તેવી અનેક યોજનાઓ બંધ કરવામાં આવશે અથવા તો તેનો વ્યાપ ઓછો કરવામાં આવશે. નવા બજેટમાં આરોગ્ય, શિક્ષણ અને સામાજિક ક્ષેત્રોમાં મહત્તમ બજેટ ફાળવવામાં આવે તેવી શક્યતા છે.બજેટમાં સરકાર વેટમાં વધારો કરે તેવી શક્યતા છે. 

આ પણ વાંચો--વડોદરામાં ગમખ્વાર અકસ્માત, એક જ પરિવારના 5ના મોત