કોરોનાને હળવો ના સમજતા, કોઈ બિમારી નહીં, વેક્સિનના 2 ડોઝ લીધા તો પણ યુવતીનું મોત

તામિલનાડુમાં બુધવારે એક 18 વર્ષની છોકરીનું કોરોના વાયરસથી મોત થયું હતું. યુવતીને કોરોનાની બંને રસી મળી ગઈ હતી અને તેને પહેલા કોઈ બીમારી નહોતી. રાજ્યમાં 90 દિવસ બાદ કોરોનાના મોતના સમાચાર સામે આવ્યા છે. આ સાથે, તમિલનાડુમાં કોરોનાથી મૃત્યુ પામેલા લોકોની કુલ સંખ્યા 38,026 થઈ ગઈ છે, જ્યારે તાજા કોવિડ -19 કેસમાં 43%નો ઉછાળો જોવા મળ્યો છે. હકીકતમાં, બુધવારે રાજ્યમાં 476 નવા કેસ નોંધાયા હતા, જે મંગળવારે નોંધાયેલા 332 કરતા વધુ છે.

મૃતક છોકરી વિશે વાત કરીએ તો મંગળવારે સવારે 7.15 વાગ્યે તેને તાવ અને ઉધરસની ફરિયાદ સાથે તંજાવુર મેડિકલ કોલેજ હોસ્પિટલમાં દાખલ કરવામાં આવી હતી. તપાસમાં જાણવા મળ્યું કે તેને કોરોના થયો છે. કોરોનાનો તેના ફેફસામાં ચેપ લાગ્યો હતો. જો કે સારવાર ચાલુ હતી ત્યાં જ બપોરે 2.30 કલાકે તેને મૃત જાહેર કરવામાં આવી હતી.

રાજ્યના આરોગ્ય સચિવ સેંથિલ કુમારે જણાવ્યું હતું કે, ડોક્ટરોને મૃત્યુના કારણનો વિગતવાર અભ્યાસ કરવા માટે કહેવામાં આવ્યું છે. છોકરીને રસી આપવામાં આવી હતી અને તેને કોઈ રોગ નહોતો. તેણે માત્ર લાંબી ઉધરસની ફરિયાદ કરી હતી. તેમણે કહ્યું કે દર્દી પાસેથી લેવામાં આવેલા સેમ્પલ આખા જીનોમ સિક્વન્સિંગ માટે મોકલવામાં આવશે.

તાજા કેસ 27 ફેબ્રુઆરી પછી 400-આંકને વટાવી ગયા છે. જાહેર આરોગ્ય નિયામક ડૉ. ટી.એસ. સેલ્વાવિનાયગમે જણાવ્યું હતું કે આ વખતે ઓમિક્રોનના ba4 અને dba5 વેરિઅન્ટ્સ ઝડપથી ફેલાવાનું કારણ બની રહ્યા છે. તેમણે કહ્યું, સંક્રમણને રોકવાનો એકમાત્ર રસ્તો માસ્ક પહેરવાનો અને સામાજિક અંતર જાળવવાનો છે. વરિષ્ઠ નાગરિકો અને લાંબી માંદગી ધરાવતા લોકોએ તરત જ રસી લેવી જોઈએ.