મુંબઈની મહિલા ડ્રગઝ ડિલરો ગુજરાતમાં ડ્રગઝ પેડલરોની ચેઇન ચલાવી રહી છે

રામોલના જનતાનગરમાંથી વધુ એક વાર ડ્રગ્સ ઝડપાયુ છે. માત્ર વધુ નાણા કમાવવાની લાલચમાં અને પોતાના ડ્રગ્સના ખર્ચા પૂર્ણ કરવા બે પેડલરો એક વર્ષથી લોકોને ડ્રગ્સ આપતા હતા. SOGએ બાતમી આધારે બંને આરોપીઓને 12 લાખના 124 ગ્રામ MD ડ્રગ્સ સાથે ઝડપી પાડી વધુ તપાસ હાથ ધરી છે.

મુંબઇની એક મહિલા પાસેથી ડ્રગ્સ લાવી ડબલથી વધુ ભાવે લોકોને વેચાણ કરતા આરોપી અલ્લારખા ઉર્ફે અડુ શેખ અને ઇકબાલખાન પઠાણ મુળ રીક્ષા ડ્રાઇવીંગનું કામ કરે છે પણ છેલ્લા એકાદ વર્ષથી રીક્ષા ડ્રાઇવીંગના ધંધામાં વધુ કમાણી ન થતા તેઓએ ડ્રગ્સ વેચવાનું શરૂ કર્યું. આરોપીઓ રામોલના જનતાનગર, દાણીલીમડા અને સારંગપુર પાણીની ટાંકી તથા રિવરફ્રન્ટ પાસે લોકોને ડ્રગ્સ વેચતા હતા. આરોપીઓ પાસેથી SOGએ 12 લાખનું MD ડ્રગ્ઝ કબજે કર્યું છે, જે ડ્રગ્સનો જથ્થો મુબઇના માંડવીની અમરીનખાન પાસેથી લાવતા અને અમદાવાદના અલગ અલગ વિસ્તારમાં વેચતા હતા.

મુંબઇની અમરીન પહેલા અમદાવાદના (Ahmedabad) કોટ વિસ્તારમાં સાસરે રહેતી હતી પણ તેને સાસરામાં કોઇ અણબનાવ બનતા તે મુંબઇ જતી રહી હોવાનું પ્રાથમિક તપાસમાં સામે આવ્યું છે ત્યારે આરોપી અલ્લારખા મારામારી, પ્રોહિબિશન, જુગાર અને બોગસ કોલ સેન્ટરના ગુનામાં અગાઉ ઝડપાઇ ચૂક્યો છે. જ્યારે આરોપી ઇકબાલખાન પઠાણ મારામારી અને પ્રોહિબિશનના ગુનામાં પણ ઝડપાઇ ચૂક્યો છે. આરોપીઓ એક હજારનું ડ્રગ્સ બે હજાર 2500માં વેચતા હોવાથી માત્ર પૈસા માટે અને પોતાના નશાના ખર્ચને પહોંચી વળવા જ એક વર્ષથી પેડલર બન્યા હોવાનું સામે આવ્યું છે..

અનેક યુવાધન બરબાદ કરવાનું કામ પણ ડ્રગ્સ પેડલરોની સાથે સ્થાનિક પોલીસ (Police) કરી રહી હોવાનું કહેવું અયોગ્ય નથી ત્યારે સ્થાનિક અધિકારીઓ સામે શહેર પોલીસ કમિશનર કોઇ પગલાં લે છે કે માત્ર તમાશો જોએ રાખે છે તે સવાલ છે.

આ પણ વાંચો - બોલો લ્યો.... વિશ્વ લાંચ વિરોધી દિવસે જ સુરતના આ અધિકારી લાંચ લેતા ઝડપાયા