લો બોલો! શરૂઆતી વરસાદમાં જ રોડ ધોવાઇ ગયો, તંત્ર પર ઉઠ્યા સવાલ

વરસાદના કારણે શહેરના ઘણા વિસ્તારોમાં રોડ-રસ્તાઓ પૂરી રીતે ધોવાઇ ગયા છે. અમદાવાદના રાજપથ ક્લબ નજીકમાં આવેલો એક આખોય રોડ આ વરસાદના કારણે ધોવાઇ ગયો હતો. ફોટાથી તમે સ્પષ્ટ રીતે સમજી શકો છે કે અહીં કેવી કામગીરી કોર્પોરેશન દ્વારા કરવામાં આવી હશે. દર વર્ષે ચોમાસાએ રાજ્યના કેટલાંક વિસ્તારોમાં પ્રથમ વરસાદમાં જ તંત્રની પોલ ખુલી જતી હોય છે. ત્યારે આ વર્ષે ફરી તંત્રની વધુ એક બેદરકારી સામે આવી છે. કોર્પોરેશન વિભાગ દ્વારા વરસાદ પહેલા આ રોડનું પેચવર્ક કરવામાં આવ્યું હતું. તેમ છતા હાલત કેવી તે તમે જોઇ શકો છો. અમદાવાદવાસીઓ ગરમીથી રાહત મળે અને જલ્દી જ વરસાદ આવે તેવી મનોકામનાઓ કરી રહ્યા હતા. જોકે, વરસાદ પડ્યો પણ એવો પડ્યો કે શહેરના અલગ-અલગ વિસ્તારોમાં કેડસમા પાણી ભરાઇ ગયા હતા.