યશવંત સિંહાનો 'અંતરાત્મા' ઊંધો પડ્યો, NCP ધારાસભ્યએ દ્રૌપદી મૂર્મુને આપ્યો મત

ઝારખંડમાં રાષ્ટ્રવાદી કોંગ્રેસ પાર્ટી (NCP)ના ધારાસભ્ય કમલેશ સિંહે સોમવારે પાર્ટીના આદેશનું ઉલ્લંઘન કરીને
રાષ્ટ્રપતિની ચૂંટણીમાં NDAના દ્રૌપદી મૂર્મુને મત આપ્યો, જ્યારે NCPના વડા શરદ પવારે યશવંત સિંહાને
મેદાનમાં ઉતારવામાં મહત્વની ભૂમિકા ભજવી હતી. યશવંત સિંહા હઝારીબાગથી ભાજપના
ભૂતપૂર્વ સાંસદ છે અને વિપક્ષી દળોએ તેમને રાષ્ટ્રપતિની ચૂંટણીમાં પોતાના ઉમેદવાર
બનાવ્યા છે. ઓડિશામાં જન્મેલી દ્રૌપદી મૂર્મુ
ઝારખંડની ભૂતપૂર્વ ગવર્નર છે અને આદિવાસી સમુદાયમાંથી આવે છે. ઝારખંડમાં મોટી
આદિવાસી વસ્તી છે અને આ કારણોસર કોંગ્રેસ સાથે સરકાર ચલાવી રહેલા ઝારખંડ મુક્તિ
મોરચાએ મૂર્મુને મત આપવાની જાહેરાત કરી હતી.

યશવંત સિંહાએ અંતરાત્માનો અવાજ
સાંભળવાની અપીલ કરી હતી

યશવંત સિંહાએ એનડીએના ધારાસભ્યો અને
સાંસદોને તેમના અંતરાત્માની વાત સાંભળવા અને તેમની તરફેણમાં મતદાન કરવાની અપીલ કરી
હતી. મૂર્મુને વોટ આપ્યા બાદ એનસીપીના ધારાસભ્યએ પણ એવી જ દલીલ કરી હતી અને કહ્યું
હતું કે તેણે પોતાના અંતરાત્માની વાત સાંભળીને દ્રૌપદી મૂર્મુને મત આપ્યો છે.
ઝારખંડના 81 ધારાસભ્યોએ વિધાનસભાના ટ્રિબ્યુનલ હોલમાં પોતાનો મત આપ્યો.

ભાજપનો દાવો - કોંગ્રેસના ધારાસભ્યોએ
પણ કર્યું ક્રોસ વોટિંગ

AJSUના બે ધારાસભ્યો સહિત NDAના 28 ધારાસભ્યો એક બસમાં મતદાન કરવા પહોંચ્યા હતા. પૂર્વ ધારાસભ્ય
બાબુલાલ મરાંડી અને AJSU પાર્ટીના વડા સુદેશ મહતોએ વિજય ચિહ્ન
દર્શાવ્યું હતું. નેતાઓએ ખુશી વ્યક્ત કરી કે આદિવાસી મહિલા દ્રૌપદી મૂર્મુ દેશના
સર્વોચ્ચ પદ પર બેસવા જઈ રહી છે. બીજેપી ધારાસભ્ય બિરાંચી નારાયણે દાવો કર્યો કે, NDA ઉમેદવાર દ્રૌપદી મુર્મુને ઝારખંડમાં ઓછામાં ઓછા
65 ધારાસભ્યોના વોટ મળશે, કારણ કે કોંગ્રેસના ઘણા ધારાસભ્યો પણ
તેમના અંતરાત્માની વાત સાંભળીને મૂર્મુને મત આપવા જઈ રહ્યા છે.