સિદ્ધૂ કહેવા શું માગે છે? પંજાબ CMને 'કઠપૂતળી' કહ્યા બાદ ગણાવ્યા 'પ્રામાણિક'

પંજાબ કોંગ્રેસમાં ઘણા આંતરિક વિવાદો હોય તેવું ઘણી વખત સામે આવી ચુક્યું છે. ખાસ કરીને નવજોત સિંદ્ધુને લઇને પાર્ટીમાં નેતાઓના અલગ-અલગ મંતવ્ય છે. તાજેતરમાં સિદ્ધુએ પોતાના જ એક નિવેદનથી પલટી મારી છે. જોકે, આવું ઘણીવાર બની ચુક્યું છે કે તે આજે શું બોલે અને કાલે શું? આજ કારણ છે કે કોંગ્રેસ પાર્ટીમાં પણ હવે તેમને લઇને અલગ-અલગ મંતવ્ય સામે આવી રહ્યા છે. 

કોંગ્રેસના નેતા નવજોત સિંહ સિદ્ધુએ ભગવંત માનની "પ્રામાણિક" તરીકે પ્રશંસા કરી અને કહ્યું કે, તેઓ પાર્ટીની રેખાઓથી ઉપર ઉઠશે અને રાજ્યમાં માફિયાઓનો સામનો કરવા માટે પંજાબના મુખ્યમંત્રીને ટેકો આપશે. પૂર્વ આમ આદમી પાર્ટી (AAP) નેતાઓ કુમાર વિશ્વાસ અને અલકા લાંબા વિરુદ્ધ પોલીસ કાર્યવાહી અંગે પંજાબ સરકારની ટીકા કર્યાના એક દિવસ બાદ સિદ્ધુની આ પ્રશંસા સામે આવી છે. સિદ્ધુએ પંજાબ CM પર દિલ્હીના મુખ્યમંત્રી અને AAP કન્વીનર અરવિંદ કેજરીવાલની કઠપૂતળીની જેમ કામ કરવાનો આરોપ લગાવ્યો હતો. મીડિયા સાથેની તેમની વાતચીતની એક ક્લિપમાં, જેને તેમણે ટ્વિટર પર પોસ્ટ કરી, સિદ્ધુ કહે છે કે કોંગ્રેસને સત્તામાં પાછા આવવા માટે પંજાબમાં પોતાને "પુનઃજીવિત" કરવાની જરૂર છે. તે પછી તે કહે છે કે રાજ્ય માફિયાઓ અને પ્રામાણિક લોકો વચ્ચેની લડાઈને જોઇ રહ્યું છે. 

વિશ્વાસ અને કોંગ્રેસ નેતા અલકા લાંબા પર પંજાબ પોલીસે કેજરીવાલ વિરુદ્ધ કરેલી ટિપ્પણી પર કાર્યવાહી કરી છે. આ એક પગલું છે જેણે રાજકીય બદલો લેવાના આરોપોને જન્મ આપ્યો છે. પંજાબમાં AAPની જોરદાર જીત પછી તુરંત જ, ભગવંત માને લોકોને ખાતરી આપી હતી કે તેઓ સરહદી રાજ્યમાં ખાણકામ અને નાર્કોટિક્સ જેવા વિસ્તારોમાં કાર્યરત માફિયાઓ વિરુદ્ધ કાર્યવાહી કરશે.