તેલંગાણામાં TRS કાર્યકરોએ લોકોને આકર્ષવા આ શું કર્યું? વિડીયો વાયરલ

રાષ્ટ્રીય રાજનીતિમાં સક્રિય બનવાનો પ્રયાસ કરી રહેલા તેલંગાણા (Telangana)ના મુખ્યમંત્રી કે ચંદ્રશેખર રાવ (K. Chandrasekhar Rao) બુધવારે પોતાની રાષ્ટ્રીય પાર્ટીની શરૂઆત કરવા જઈ રહ્યા છે. જેથી  પાર્ટીના કાર્યકરો ખૂબ જ ઉત્સાહિત છે. દરેક જગ્યાએ KCRના મોટા-મોટા પોસ્ટર લગાવવામાં આવ્યા છે. હવે સોશિયલ મીડિયા પર એક વિડીયો વાયરલ થઈ રહ્યો છે જેમાં TRSનો એક કાર્યકર લોકોમાં દારૂ અને ચિકન વહેંચી રહ્યો છે.

વિડીયોમાં જોવા મળે છે કે  ટીઆરએસ નેતા રાજનાલા શ્રીહરિ લોકોમાં ચિકન અને દારૂનું વિતરણ કરી રહ્યા છે. ઘણા મજૂરો કતારમાં ઉભા રહીને દારૂ અને ચિકન લઈ રહ્યા છે. લોકોને 200 જેટલી દારૂની બોટલો અને ચિકન આપવામાં આવ્યા છે. વિડીયોમાં KCRનું એક મોટું પોસ્ટર પણ દેખાઈ રહ્યું છે, જેને માળા પહેરાવવામાં આવી છે.  આ વિડીયો બહાર આવતાની સાથે જ એક વિવાદ પણ ઉભો થયો છે. લોકોને આકર્ષવા માટે, દારૂ અને ચિકનનો આશરો લેવો એ એક મોટો મુદ્દો બની ગયો છે. હજુ સુધી ટીઆરએસ કે ખુદ મુખ્યમંત્રીએ આ વિવાદ પર કોઈ પ્રતિક્રિયા આપી નથી.

ઉલ્લેખનીય છે કે આજે બુધવારે શુભ વિજય દશમી તહેવારના અવસર પર કેસીઆર તેમની રાષ્ટ્રીય પાર્ટીની જાહેરાત કરવા જઈ રહ્યા છે. કેસીઆર લાંબા સમયથી રાષ્ટ્રીય રાજનીતિમાં સક્રિય થવાનું સપનું જોઈ રહ્યા છે. અગાઉ તેઓ આગળ વધીને ત્રીજા મોરચાનો આગ્રહ રાખતા હતા. હવે  તે પોતાની રાષ્ટ્રીય પાર્ટી પણ લોન્ચ કરવા જઈ રહ્યો છે.  તે પોતાની પાર્ટીનું નામ પણ બદલી શકે છે, પરંતુ આ અંગે કોઈ ઔપચારિક જાહેરાત કરવામાં આવી નથી. આવતીકાલે રાષ્ટ્રીય પક્ષની જાહેરાત પહેલા મુખ્યમંત્રી તમામ સ્તરના ધારાસભ્યો, સાંસદોની મહત્વની બેઠક યોજવાના છે. તે બેઠકમાં જ તમામ મુદ્દાઓ પર ચર્ચા કરવામાં આવશે અને ત્યારબાદ નવા પક્ષની જાહેરાત કરવામાં આવશે.

વિપક્ષે 2024ની લોકસભા ચૂંટણીની તૈયારીઓ શરૂ કરી દીધી છે. વિવિધ મોરચા દ્વારા વિપક્ષી એકતા પર ફરીથી જોર આપવામાં આવી રહ્યું છે. એક તરફ નીતીશ કુમાર તેમની તરફથી પહેલ કરી રહ્યા છે, જ્યારે તેલંગાણામાં કેસીઆર પણ તેમની રાજનીતિને આગળ વધારવા માટે કામ કરી રહ્યા છે. દરેકનો એક જ ઉદ્દેશ્ય છે કે 2024માં ભાજપને સત્તા પરથી હટાવવામાં આવે.

આ પણ વાંચો-- માતૃશક્તિની ઉપેક્ષા ના કરી શકાય: મોહન ભાગવત