મેચ બાદ પાકિસ્તાની કેપ્ટનની દીકરી સાથે ભારતીય ખેલાડીઓની મસ્તીનો વીડિયો વાયરલ

ભારતીય મહિલા ટીમે શાનદાર જીત સાથે આઇસીસી વૂમન્સ વર્લ્ડ કપની શરુઆત કરી છે. મહિલા વર્લ્ડ કપ માટેની આ પહેલી મેચ ભારત અને પાકિસ્તાન વચ્ચે હતી. જેમાં ભારતીય મહિલા ટીમે પાકિસ્તાની ટીમને 107 રનથી હરાવી છે. વર્લ્ડ કપના એક પણ મેચમાં ભારતીય મહિલા ટીમ પાકિસ્તાની ટીમ સામે હારી નથી. તેવામાં આજની મેચનો એક વીડિયો સોશિયલ મીડિયા પર વાયરલ થયો છ, જેણે અનેક લોકોના દિલ જિત્યા છે. ખાસ વાત એ છે કે આ વીડિયો ક્રિકેટના મેદાનનો નથી પરંતુ પેવેલિયનનો છે.

પાકિસ્તાન મહિલા ક્રિકેટ ટીમની કેપ્ટન બિસ્માહ મારુક પોતાની 6 મહિનાની દીકરીને સાથે લઇને વર્લ્ડ કપ રમવા માટે ન્યૂઝીલેન્ડ પહોંચી છે. આજે ભારત સમેની મેચ દરમિયાન પણ તેની દીકરી પેવેલિયનમાં જ હતી. તેવામાં પાકિસ્તાની ટીમને હરાવ્યા બાદ ભારતીય ખેલાડી એકતા બિષ્ટ ડ્રેસિંગ રુમની અંદર પાકિસ્તાની કેપ્ટન બિસ્માહ મારુકની  દીકરી સાથે મસ્તી કરતા જોવા મળી છે. જેનો વીડિયો ત્યારે સોશિયલ મીડિયા પર વાયરલ થઇ રહ્યો છે.  ઉલ્લેખનીય છે કે એકતા બિષ્ટને વર્લ્ડ કપ માટેની જે મુખ્ય ભારતીય ટીમ છે તેમાં સ્થાન નથી મળ્યું, પરંતુ તે રિઝર્વ ખેલાડી તરીકે આ ટૂર્નામેન્ટમાં છે.

ભારતીય ટીમની જીત બાદ જ્યારે એકતા ડ્રેસિંગ રુમ પાસે પહોંચી તો તયાં બિસ્માહ મારુકની દીકરી તેની કેરટેકર પાસે હતી. બિસ્માહ હજુ પમ મેદાનમાં જ હતી. આ સમયે એકતા આ નાનકડી બાળકી સાથ મસ્તી કરતી જોવા મળી રહી છે. ત્યારબાદ આખી ભારતીય ટીમ બાળકીને રમાડવા પહોંચે છે. બધા તેની સાથે મસ્તી કરે છે અને બાદમાં સેલ્ફી પણ લે છે. આઇસીસી દ્વારા પોતાના ટ્વિટર હેન્ડલ પરથી આ સેલ્ફી પોસ્ટ પમ કરવામાં આવી છે.