બોક્સ ઓફિસ પર ફ્લોપ ફિલ્મોને લઈ વિકી કૌશલે આપ્યું મોટું નિવેદન, જાણો શું કહ્યું

આ દિવસોમાં વિકી કૌશલ (Vicky Kaushal) સાતમા આસમાન ઉપર છે કારણ કે તેની નવી આવેલી ફિલ્મ 'ગોવિંદા નામ મેરા' પ્રેક્ષકો તરફથી ઘણી પ્રશંસા મેળવી રહી છે. વિક્કીના ચાહકો તેને કોમેડી રોલમાં જોવા માટે ઉત્સુક હતા. આ પહેલા વિકી 'રાઝી', 'ઉરી', 'સરદાર ઉધમ' જેવી ગંભીર ફિલ્મોમાં જોવા મળ્યો હતો. આ દરમિયાન વિકી કૌશલે એક ઈન્ટરવ્યું આપ્યો હતો જેમાં તેણે બોક્સ ઓફિસ પર ફ્લોપ થયેલી ફિલ્મો પર પોતાનો અભિપ્રાય આપ્યો હતો.

હાલમાં જ વિકીને એક ઈન્ટરવ્યુંમાં પૂછવામાં આવ્યું હતું કે, 'આ વર્ષે ઘણી મોટી ફિલ્મો એવી હતી જે બોક્સ ઓફિસ પર ફ્લોપ રહી હતી. જેમાં લાલ સિંહ ચઢ્ઢા, રક્ષાબંધન, શમશેરા અને સમ્રાટ પૃથ્વીરાજ જેવી મોટી ફિલ્મોનો સમાવેશ થાય છે. આ બાબતે તમારો શું અભિપ્રાય છે? વિકીએ કહ્યું, 'મને લાગે છે કે સારી ફિલ્મો પર કામ થઈ રહ્યું છે. લોકોએ તેને ખૂબ જ સરળ બનાવી દીધી છે. જો તમે ગ્રાફ પર નજર નાખો તો, જો કોઈ ફિલ્મ સારી ચાલે છે તો દર્શકોને તેની ભાષા કે શૈલી વગેરે કેવું પણ કેમ ના હોય તેનાથી તેમને કોઈ ફર્ક પડતો નથી. ફિલ્મ દર્શકોનો ગમી એટલે તેઓ તેને ઘણો પ્રેમ આપશે. 

વિકીએ વધુમાં ઉમેર્યું હતું કે, અગાઉ હિન્દી ફિલ્મો માર્કેટિંગને કારણે બોક્સ ઓફિસ પર સફળ થતી હતી, પરંતુ હવે પરિસ્થિતિ બદલાઈ ગઈ છે. તેમણે વધુમાં ઉમેર્યું કે, "ભલે તમે ભૂલ ભુલૈયા (2), KGF (2) અથવા RRR, દૃષ્યમ (2) જુઓ, આમાંથી કોઈ પણ ફિલ્મ એક જ ભાષાની શૈલી અથવા સ્કેલમાં આવતી નથી, ન તો તેમની સમાન માર્કેટિંગ યોજના છે. ત્રણ વર્ષ પહેલા સુધી એવું થતું હતું કે તમે જેટલું માર્કેટિંગ કરશો તેટલી તમારી ફિલ્મ ચાલશે, પણ હવે એવું નથી. હવે જો લોકોને ફિલ્મ ગમી છે તો જ તમારી ફિલ્મ ચાલશે.

વર્ક ફ્રન્ટની વાત કરીએ તો, વિકી 2023માં મેઘના ગુલઝાર દ્વારા નિર્દેશિત ફિલ્મ 'સેમ માણેકશા'માં જોવા મળશે. આ ફિલ્મ ફિલ્ડ માર્શલ સેમ માણેકશા પર બાયોપિક છે. આ સિવાય વિકી લક્ષ્મણ ઉતેકરની આગામી ફિલ્મમાં પણ જોવા મળશે. વિકી હાલમાં તેની પત્ની કેટરિના સાથે રજાઓ માણી રહ્યો છે.