દિગ્ગજ ઓસ્ટ્રેલિયન ક્રિકેટર શેન વૉર્નનું નિધન, થાઇલેન્ડમાં શંકાસ્પદ હાલતમાં હાર્ટ એટેક

ક્રિકેટ જગતમાંથી ખૂબ જ દુઃખદ સમાચાર સામે આવ્યા છે. ઓસ્ટ્રેલિયાના
દિગ્ગજ સ્પિન બોલર શેન વોર્નનું 52 વર્ષની વયે અવસાન થયું છે. તેની અચાનક
દુનિયામાંથી વિદાયના કારણે ક્રિકેટ જગતમાં ખળભળાટ મચી ગયો છે. દિગ્ગજ ક્રિકેટર શેન
વોર્નનું મૃત્યુ હાર્ટ એટેકથી થયું હતું. જો કે એવા અહવાલ પણ મળી રહ્યા છે કે તેમનો મૃતદેહ શંકાસ્પદ સ્થિતિમાં મળ્યો છે. દિગ્ગજના અચાનક નિધનથી દુનિયાભરના
લોકોમાં દુઃખની લહેર ફેલાઈ ગઈ છે. આજે સવારે ઓસ્ટ્રેલિયાના મહાન વિકેટકીપર રોડ
માર્સ ના નિધન પર શેન વોર્ને ટ્વીટ કર્યું હતું. 24 કલાકની અંદર ઓસ્ટ્રેલિયાએ બે
મહાન ક્રિકેટરને ગુમાવ્યા છે.

ભૂતપૂર્વ ઓસ્ટ્રેલિયન ક્રિકેટર કે જેને રમતના ઇતિહાસમાં સર્વશ્રેષ્ઠ
બોલરોમાંના એક તરીકે ગણવામાં આવે છે. વોર્ને તેની પ્રથમ ટેસ્ટ મેચ 1992માં રમી હતી
અને તે શ્રીલંકાના મુથૈયા મુરલીધરન પછી 1000 આંતરરાષ્ટ્રીય વિકેટ લેનાર બીજો બોલર
બન્યો હતો. વોર્ન લોઅર ઓર્ડરનો ઉપયોગી બેટ્સમેન પણ હતો. તે એકમાત્ર એવો ખેલાડી છે
જેણે 3000 ટેસ્ટ રન બનાવ્યા છે પરંતુ ક્યારેય સદી ફટકારી નથી. તેની કારકિર્દી
મેદાનની બહાર વિવાદોથી ઘેરાયેલી હતી.

ઈંગ્લેન્ડ સામે ઓસ્ટ્રેલિયાની 5-0 એશિઝ જીતના અંતે જાન્યુઆરી 2007માં
તેણે આંતરરાષ્ટ્રીય ક્રિકેટમાંથી નિવૃત્તિ લીધી. અન્ય ત્રણ ખેલાડીઓ કે જેઓ તે સમયે
ઓસ્ટ્રેલિયન ટીમના અભિન્ન અંગ હતા તેઓ પણ નિવૃત્ત થયા - ગ્લેન મેકગ્રા, ડેમિયન માર્ટિન
અને જસ્ટિન લેંગર. આંતરરાષ્ટ્રીય ક્રિકેટમાંથી નિવૃત્તિ લીધા પછી, વોર્ને
હેમ્પશાયર કાઉન્ટી ક્રિકેટ ક્લબ માટે ફર્સ્ટ-ક્લાસ ક્રિકેટ રમી હતી. 2008માં IPL ટીમ રાજસ્થાન
રોયલ્સના કોચ અને કેપ્ટનની ભૂમિકા ભજવી અને ટીમને જીત તરફ દોરી ગઈ. એકંદરે, તેણે 1992 થી
2007 સુધી 145 ટેસ્ટ મેચ રમી જેમાં તેણે 25.41ની બોલિંગ એવરેજથી 708 વિકેટ લીધી.
1993 થી 2005 સુધીમાં તેણે 194 વન-ડે ઈન્ટરનેશનલમાં 293 વિકેટ લીધી હતી. 1999ના ક્રિકેટ
વર્લ્ડ કપની વિજેતા ટીમમાં તેણે મહત્વની ભૂમિકા ભજવી હતી.