યુયુ લલિતે ભારતના 49માં મુખ્ય ન્યાયાધીશ તરીકે લીધા શપથ

જસ્ટિસ ઉદય ઉમેશ લલિતે (Justice Uday Umesh Lalit) આજે ભારતના 49મા મુખ્ય ન્યાયાધીશ (Chief Justice) તરીકે શપથ લીધા. રાષ્ટ્રપતિ દ્રૌપદી મૂર્મુએ  ( Droupadi Murmu) રાષ્ટ્રપતિ ભવનમાં જસ્ટિસ ઉદય ઉમેશ લલિતને ભારતના મુખ્ય ન્યાયાધીશના શપથ લેવડાવડાવ્યા હતા. CJI NV રમન્ના  26 ઓગસ્ટે નિવૃત્ત થયા બાદ જસ્ટિસ ઉદય રમેશને ભારતના મુખ્ય ન્યાયાધીશ તરીકે નિયુક્ત કરવામાં આવ્યા છે. નવા ચીફ જસ્ટિસ ઉદય ઉમેશ લલિતનો કાર્યકાળ ત્રણ મહિના કરતાં ઓછો રહેશે અને તેઓ 8 નવેમ્બરે તેમના પદ પરથી નિવૃત્ત થશે.

જસ્ટિસ યુયુ લલિતનો સીજેઆઈ તરીકેનો કાર્યકાળ માત્ર 75 દિવસનો રહેશે. 

ભારતના નવા મુખ્ય ન્યાયાધીશ ઉદય ઉમેશ લલિતનો જન્મ 9 નવેમ્બર 1957ના રોજ મહારાષ્ટ્રના સોલાપુરમાં થયો હતો. તેઓ જૂન 1983માં મહારાષ્ટ્ર અને ગોવા બાર કાઉન્સિલમાં વકીલ તરીકે દાખલ થયા હતા. આ પછી, જાન્યુઆરી 1986માં દિલ્હી આવ્યા પહેલા તેમણે ડિસેમ્બર 1985 સુધી બોમ્બે હાઈકોર્ટ (Bombay High Court)માં પ્રેક્ટિસ કરી.

ભારતના નવા મુખ્ય ન્યાયાધીશ લલિત ફોજદારી કાયદાના નિષ્ણાત છે. તેમણે 2જી કેસમાં સીબીઆઈના વિશેષ સરકારી વકીલ તરીકે કામ કર્યું છે. તેઓ સતત બે ટર્મ સુધી સુપ્રીમ કોર્ટની કાનૂની સેવા સમિતિના સભ્ય પણ રહી ચૂક્યા છે. ખૂબ જ નમ્ર સ્વભાવ ધરાવતા ઉમેશ લલિત ભારતના ઈતિહાસમાં બીજા એવા ચીફ જસ્ટિસ છે જેઓ સુપ્રીમ કોર્ટના જજ બન્યા પહેલા કોઈ હાઈકોર્ટમાં જજ બન્યા નથી. તેઓ વકીલથી સીધા આ પદ સુધી પહોંચ્યા છે. તેમના પહેલા દેશના 13મા મુખ્ય ન્યાયાધીશ એસએમ સિકરીએ 1971માં આ સિદ્ધિ મેળવી હતી.

10 જાન્યુઆરી 2019ના રોજ, જસ્ટિસ ઉદય ઉમેશ લલિતે અયોધ્યા કેસની સુનાવણી કરી રહેલી 5 જજની બેન્ચથી પોતાને અલગ કરીને હેડલાઇન્સ બનાવી. તેમણે દલીલ કરી હતી કે લગભગ 20 વર્ષ પહેલા તે અયોધ્યા વિવાદ સંબંધિત એક અપરાધિક કેસમાં યુપીના પૂર્વ સીએમ કલ્યાણ સિંહના વકીલ હતા.

ભારતના નવા મુખ્ય ન્યાયાધીશ લલિતે સુપ્રીમ કોર્ટના ન્યાયાધીશ તરીકે ઘણા મહત્વપૂર્ણ નિર્ણયો આપ્યા છે. તેમાંથી સૌથી મહત્વપૂર્ણ ટ્રિપલ તલાક, કેરળના પદ્મનાભસ્વામી મંદિર પર ત્રાવણકોર શાહી પરિવારનો દાવો અને POCSO સંબંધિત કાયદા પર તેમણે નિર્ણયો લીધા હતા.