આજે બીજી વખત ભૂપેન્દ્ર પટેલ લેશે મુખ્યમંત્રી પદના શપથ, કેબિનેટમાં અનુભવી ચહેરાઓની સાથે યુવાઓને મળી શકે છે તક

ગુજરાતની વિધાનસભા ચૂંટણીમાં(Gujarat assembly elections) ભારતીય જનતા પાર્ટીએ તમામ સમીકરણોને પાછળ છોડીને રેકોર્ડ જીત નોંધાવી છે. આવી સ્થિતિમાં ગુજરાતની ઐતિહાસિક જીત બાદ ભૂપેન્દ્ર પટેલ (Bhupendra Patel) આજે એટલે કે સોમવારે બીજી વખત રાજ્યના મુખ્યમંત્રી તરીકે શપથ (Oath) લેશે. આવી સ્થિતિમાં હવે ભૂપેન્દ્ર પટેલના મંત્રીમંડળને લઈને અટકળો લગાવવામાં આવી રહી છે. કહેવામાં આવી રહ્યું છે કે આ વખતે કેબિનેટમાં અનુભવી ચહેરાઓની સાથે યુવાઓને પણ તક મળી શકે છે. આજે બીજી વખત ભૂપેન્દ્ર પટેલ મુખ્યમંત્રી પદના શપથ લેવાના છે. 

મહત્વનું છે કે, આજના શપથ ગ્રહણ સમારોહને મેગા શો બનાવવા માટે તમામ શક્ય પ્રયાસો કરવામાં આવી રહ્યા છે. આ શપથ ગ્રહણમાં હાજરી આપવા માટે વડાપ્રધાન નરેન્દ્ર મોદી રવિવારે સાંજે જ અમદાવાદ પહોંચી ગયા છે. આ ઉપરાંત ગૃહમંત્રી અમિત શાહ, સંરક્ષણ મંત્રી રાજનાથ સિંહ, ભાજપ અધ્યક્ષ જેપી નડ્ડા અને ભાજપ શાસિત રાજ્યોના મુખ્યમંત્રીઓ અને કેન્દ્રીય મંત્રીઓ પણ કાર્યક્રમમાં ભાગ લેશે. મહત્વનું છે કે, ભૂપેન્દ્ર પટેલ આજે સતત બીજી ટર્મ માટે ગુજરાતના મુખ્યમંત્રી તરીકે શપથ લેશે. ગાંધીનગરમાં નવા સચિવાલય પાસેના હેલિપેડ ગ્રાઉન્ડમાં બપોરે 2 વાગ્યે શપથ ગ્રહણ સમારોહ યોજાવાનો છે. ભૂપેન્દ્ર પટેલને રાજ્યપાલ આચાર્ય દેવવ્રત ગુજરાતના 18મા મુખ્યમંત્રી તરીકે શપથ લેવડાવશે. સૂત્રોના જણાવ્યા અનુસાર, ભૂપેન્દ્ર પટેલની સાથે 20 જેટલા કેબિનેટ મંત્રીઓ પણ આજે શપથ લેશે અને બીજા જ દિવસે પોતપોતાની ઓફિસનો ચાર્જ સંભાળશે. આ સમારોહમાં વડા પ્રધાન નરેન્દ્ર મોદી, સંરક્ષણ પ્રધાન રાજનાથ સિંહ, કેન્દ્રીય ગૃહમંત્રી અમિત શાહ અને ભાજપની આગેવાની હેઠળના રાજ્યોના લગભગ 20 મુખ્યમંત્રી હાજરી આપશે. 

આજે ભૂપેન્દ્રભાઈ પટેલની નવી સરકારનો શપથ ગ્રહણ સમારોહ યોજવા જઈ રહ્યો છે ત્યારે મોડાસાના ધારાસભ્ય ભીખુસિંહ પરમારનો રાજ્યના મંત્રી મંડળમાં સમાવેશ કારાયો છે. મોડી રાત્રે ભીખુસિંહ પરમારને મંત્રી મંડળમા શપથ લેવા આવવા આમંત્રણ અપાયું છે. ત્યારે જિલ્લાને મંત્રી મંડળમાં સ્થાન મળતા ભીખુસિંહના પરિવારજનોની સાથે સમર્થકોમાં ખુશીનો માહોલ વ્યાપ્યો છે. ગુજરાત ફર્સ્ટ સાથે વાત કરતા ભીખુસિંહ પરમારે પ્રદેશ અને કેન્દ્રીય નેતૃત્વનો આભાર વ્યક્ત કરતા જિલ્લામાં યુનિવર્સીટીની સ્થાપના થાય, સિવિલનું કામ બાકી કામો સત્વરે પૂર્ણ થાય તેમજ જિલ્લામાં નવા ઉદ્યોગો સ્થાપી લોકોને યુવાનોને રોજગારીની નવી તકો ઉભી થાય તેવા વિકાસ કામો કરવાની ખાત્રી આપી હતી. ભીખુસિંહ વહેલી સવારે તેઓના નિત્ય ક્રમ મુજબ પૂજા પાઠ કરી ગાંધીનગર જવા રવાના થયા હતા.

આ પણ વાંચો : વડાપ્રધાનશ્રી નરેન્દ્ર મોદીની ઉપસ્થિતિમાં ભુપેન્દ્ર દાદાની સરકાર લેશે શપથ