દિલ્હીના કર્તવ્યપથ પર આ વર્ષે જોવા મળશે ગુજરાતની "ક્લિન-ગ્રીન ઉર્જાયુક્ત ગુજરાત" વિષયને આવરી લેતી ઝાંખી

ભારત 15 ઑગસ્ટ, 1947ના રોજ અંગ્રેજોની ગુલામીમાંથી સ્વતંત્ર થયું અને 26 જાન્યુઆરી, 1950ના રોજ બંધારણને આત્મસાત કરવામાં આવ્યું, જે અંતર્ગત ભારતને લોકશાહી, સર્વભૌમ અને પ્રજાસત્તાક દેશ તરીકે જાહેર કરવામાં આવ્યો. માટે દર વર્ષે 26 જાન્યુઆરી પ્રજાસત્તાક દિવસ તરીકે ઊજવવામાં આવે છે. પ્રજાસત્તાક દિન નજીક આવી રહ્યો છે ત્યારે તેની તૈયારીઓ શરૂ થઇ ગઇ છે. આ વર્ષે આપણે 74મો પ્રજાસત્તાક દિવસની ઉજવણી કરવાના છીએ. ત્યારે દર વર્ષની જેમ આ વર્ષે પણ દેશમાં તેની ધામધૂમથી ઉજવણી થવાની છે. 

આપને જણાવી દઇએ કે, આ વર્ષે પણ તેનું આયોજન દિલ્હીના કર્તવ્યપથ પર થવાનું છે. જણાવી દઇએ કે, ગુજરાત રાજ્ય તેના સતત નવતર પ્રયોગો અને પ્રયાસો કરીને રાષ્ટ્રને નવી દિશા આપવાનું કાર્ય કરતું આવ્યું છે, જે ઉપક્રમને બરકરાર રાખીને 26 જામ્યુઆરી, 2023ના રોજ નવી દિલ્હીના કર્તવ્યપથ પર આયોજીત થનારી પ્રજાસત્તાક દિનની રાષ્ટ્રીય પરેડમાં ગુજરાત "ક્લિન-ગ્રીન ઉર્જાયુક્ત ગુજરાત" વિષયને આવરી લેતી ઝાંખી રજૂ કરશે. જે દેશ અને દુનિયાને પુનઃ પ્રાપ્ય ઉર્જાસ્ત્રોતોના પ્રયોગથી હરિત અને શુદ્ધ ઉર્જાનું નિર્માણ કરીને આત્મનિર્ભર બનવાનો સંદેશ આપશે.

સમગ્ર વિશ્વ આજે પરંપરાગત ઊર્જાસ્ત્રોતોની કટોકટીનો સામનો કરી રહ્યું છે . આ સ્ત્રોતો કાળક્રમે ક્ષીણ થઇ રહ્યા છે, તો બીજી તરફ આ ઊર્જાસ્ત્રોને લીધે પ્રદુષણ વધતા સમગ્ર પૃથ્વી ઉપરનું તાપમાન વધી રહ્યું છે, જેના લીધે દુનિયાના સંખ્યાબંધ દેશો " ક્લાઈમેટ ચૅન્જ " ના કારણે પૂર, ભૂસ્ખલન, ત્સુનામી, ભૂકંપ જેવી કુદરતી આપદાઓનો સામનો કરી રહ્યા છે, જેની ગંભીર ચિંતા ચાલુ વર્ષે United Nations Climate Change Conference or Conference of the parties of the UNFCCC દ્વારા કરવામાં આવી છે. 

આ વિપરીત પરિસ્થતિનો મુકાબલો કરવા, પૃથ્વીના વાતાવરણને શુદ્ધ અને હરિયાળું રાખવા તથા UN Sustainable Development Goals (SDG)ની Affordable and Clean Energy ના લક્ષ્યાંકોને સિદ્ધ કરવા માટે પુનઃ પ્રાપ્ય અને બિનપરંપરાગત ઊર્જાના સંસાધનોનો ઉપયોગ કરવાનું ગુજરાતે બીડું ઝડપ્યું છે. ગુજરાતે વર્ષ -2009 માં " ક્લાઈમેટ ચૅન્જ " નો એક અલાયદો વિભાગ બનાવીને બિનપરંપરાગત ઊર્જા સ્ત્રોત : પવન ઊર્જા, સૌર ઊર્જા, જૈવિક ઊર્જા, હાઈડ્રો પાવર દ્વારા સંચાલિત વિવિધ પ્રોજેક્ટ્સ શરુ કર્યા છે. આજે દેશમાં ગુજરાત બિનપરંપરાગત ઊર્જાના ઉત્પાદનમાં અગ્રેસર છે.

પ્રસ્તુત ઝાંખીના પ્રથમ ભાગમાં ગુજરાતના કચ્છના ખાવડા ખાતે આકાર લઇ રહેલા દુનિયાના સૌથી વિશાળ હાઈબ્રીડ ( સોલાર અને વિન્ડ ) રિન્યુએબલ એનર્જી પાર્કનું નિદર્શન છે. બિનપરંપરાગત ઊર્જાના અખૂટ સ્ત્રોત સ્વરૂપ સૂર્ય અને પવનને પ્રતીકાત્મક રીતે હાથમાં ધારણ કરેલી એક ખુશહાલ કન્યાને કચ્છના ભાતીગળ પહેરવેશમાં દર્શાવી છે. અત્રે ઉલ્લેખનીય છે કે , વર્ષ -2011 થી ગુજરાતના પાટણ જિલ્લાના ચારણકા ગામમાં રાજ્યનો સૌ પ્રથમ સોલાર પાર્ક કાર્યરત છે જ ! 

જયારે ઝાંખીના પૃષ્ઠભાગમાં ગુજરાતનું જાણીતું સૂર્યમંદિર જ્યાં આવેલું છે; તે મોઢેરા ગામ BESS (Battery Energy Storage System) મારફતે દેશનું સૌ પ્રથમ 24 ×7 સોલાર ઊર્જા મેળવતું ગામ બન્યું છે. તાજેતરમાં જ યુનાઇટેડ નેશન્સ (UN) ના સેક્ટરી - જનરલ અન્ટોનિઓ ગુટરસે (Antonio Guterres) સૌરઊર્જાથી આત્મનિર્ભર બનેલા મોઢેરાની મુલાકાત લઈને ગુજરાતના આ કાર્યની ખૂબ પ્રસંશા કરી હતી. 

આ સાથે PM KUSUM (Pradhan Mantri Kisan Urja Suraksha evam Utthan Mahabhiyan) યોજના મારફત સોલાર રૂફટોપથી ખેતીમાં સિંચાઈ, કેનાલ રૂફટોપથી ઊર્જા ઉપ્તાદન, અન્ય અસ્કયામતો ઉપર પવન - સૂર્ય ઊર્જાથી ક્લિન - ગ્રીન ઊર્જા ઉત્પાદન કરીને આ ક્ષેત્રે આત્મનિર્ભરતા તેમજ આર્થિક ઉપાર્જનથી રાજ્યમાં થયેલી સુખદ ઊર્જાક્રાંતિને પ્રદર્શિત કરવામાં આવી છે . આ ઉપરાંત , કચ્છના સફેદ રણ, પારંપરિક રહેઠાણ ભૂંગા, કચ્છી પરિવેશમાં સજ્જ રણના વાહન ઊંટને દોરી જતી ગ્રામીણ કચ્છી મહિલા સહિતના ઘણા આકર્ષણો વિન્ડફાર્મ અને સોલાર પેનલ્સ સાથે આ ઝાંખીમાં રજૂ કરવામાં આવ્યા છે.

આ પણ વાંચો - પ્રજાસત્તાક દિવસની પરેડ રાજપથ પર નહીં, કર્તવ્ય પથ પર યોજાશે, પરેડમાં સામેલ થશે ઈજિપ્તના નેતાઓ