ભારત સાથેના સંબંધોને વધુ ગાઢ બનાવવા વડાપ્રધાનશ્રીએ UAEના રાષ્ટ્રપતિને લખ્યો પત્ર

વડાપ્રધાનશ્રી  નરેન્દ્ર મોદીએ (PM Modi) સંયુક્ત આરબ અમીરાત (UAE)ના રાષ્ટ્રપતિ શેખ મોહમ્મદ બિન ઝાયેદ અલ નાહયાનને (Sheikh Mohamed Bin Zayed) પત્ર લખીને બંને દેશો વચ્ચેના વ્યૂહાત્મક સંબંધોને મજબૂત કરવા અને સામાન્ય હિતોની સેવા કરવા માટે તેમને વિકસાવવાની શક્યતાઓ શોધવા પર ભાર મૂક્યો છે. UAEના સત્તાવાર મીડિયાએ આ માહિતી આપી છે. વડાપ્રધાનશ્રી  નરેન્દ્ર મોદીનો આ પત્ર વિદેશ મંત્રી એસ. જયશંકરે યુએઈના રાષ્ટ્રપતિને સોંપ્યો હતો, જ્યારે તેઓ શુક્રવારે ગલ્ફ દેશની મુલાકાત દરમિયાન દુબઈમાં તેમને મળ્યા હતા.

જયશંકર આ અઠવાડિયે UAE-ભારત સંયુક્ત સમિતિના 14મા સત્રની બેઠકો અને UAE-ભારત વ્યૂહાત્મક સંવાદના ત્રીજા સત્રમાં ભાગ લેવા માટે UAEમાં હતા. UAEની સત્તાવાર સમાચાર એજન્સી WAMએ અહેવાલ આપ્યો છે કે આ પત્ર બંને દેશો વચ્ચેના વ્યૂહાત્મક સંબંધોને મજબૂત કરવા અને સામાન્ય હિતોની સેવા કરવા માટે તેમને વિકસાવવા માટેની શક્યતાઓની શોધ સાથે સંબંધિત છે. WAM અનુસાર બેઠક દરમિયાન બંને પક્ષોએ દ્વિપક્ષીય સંબંધોના વિવિધ પાસાઓ અને વ્યાપક વ્યૂહાત્મક ભાગીદારી અને UAE-ભારત વ્યાપક આર્થિક ભાગીદારી કરાર (CEPA)ના માળખામાં પરસ્પર સંબંધોને આગળ વધારવા માટે સહકારના મહત્વ પર ચર્ચા કરી. આ ઉપરાંત તેઓએ પરસ્પર ચિંતાના ઘણા ક્ષેત્રીય અને આંતરરાષ્ટ્રીય મુદ્દાઓ પર પણ ચર્ચા કરી.

જયશંકરે શુક્રવારે એક ટ્વીટમાં કહ્યું ‘મારા આતિથ્ય માટે રાષ્ટ્રપતિ શેખ મોહમ્મદ બિન ઝાયેદ અલ નાહયાનનો આભાર. રાષ્ટ્રપતિને વડાપ્રધાન નરેન્દ્ર મોદીના અંગત અભિવાદન અને ઉષ્માભર્યા શુભેચ્છાઓથી માહિતગાર કરવામાં આવ્યા હતા. અમે અમારી વ્યાપક વ્યૂહાત્મક ભાગીદારીને વધુ ઊંચાઈએ લઈ જવા માટે તેમના માર્ગદર્શનને ખૂબ મહત્વ આપીએ છીએ.’ નાણાકીય વર્ષ 2021-22માં બંને દેશો વચ્ચેનો દ્વિપક્ષીય વેપાર લગભગ US$ 72 બિલિયન હતો. UAEએ ભારતનું ત્રીજું સૌથી મોટું વેપારી ભાગીદાર અને બીજું સૌથી મોટું નિકાસ સ્થળ છે. UAEથી ભારતમાં પ્રત્યક્ષ વિદેશી રોકાણ (FDI) વર્ષોથી સતત વધ્યું છે અને હાલમાં તે US$12 બિલિયનથી વધુ છે.

ભારતીય વિદેશી સમુદાય યુએઈમાં સૌથી મોટો વંશીય સમુદાય છે, જે દેશની વસ્તીના લગભગ 35 ટકા હિસ્સો ધરાવે છે. UAE વર્ષ 2020-21 માટે લગભગ USD 16 બિલિયનની રકમ સાથે (યુએસ અને ચીન પછી) ભારતનું ત્રીજું સૌથી મોટું નિકાસ સ્થળ હતું. UAE ના સંદર્ભમાં ભારત વર્ષ 2020માં લગભગ US$ 27.93 બિલિયનના નોન-ઓઈલ વેપાર સાથે ત્રીજા સૌથી મોટા વેપાર ભાગીદાર દેશ તરીકે ઉભરી આવ્યું છે.