મુખ્યમંત્રીએ તમામ મંત્રીઓને આપ્યું લક્ષ્ય, 100 દિવસમાં કરો આ કામ

ગુજરાત (Gujarat)માં ભૂપેન્દ્ર પટેલ (Bhupendra Patel)ની નવી સરકાર સત્તારૂઢ થઇ ગઇ છે અને નવા મંત્રીમંડળે શપથ પણ લઇ પોતાની કામગિરી શરુ કરી દીધી છે ત્યારે મુથ્યમંત્રીશ્રી ભૂપેન્દ્ર પટેલે તમામ મંત્રીઓને પોતાના વિભાગના 100 દિવસમાં નવી યોજનાઓ તથા હયાત યોજનાના અમલીકરણ પર ભાર મુકવા લક્ષ્ય આપ્યું છે. બીજી તરફ વિધાનસભાના નવા ચૂંટાયેલા ધારાસભ્યોને શપથ લેવડાવવા માટે પ્રોટેમ સ્પીકર તરીકે વડોદરાની માંજલપુર બેઠકના ધારાસભ્ય યોગેશ પટેલની વરણી કરાઇ છે. 

ગુજરાતમાં 156 બેઠકો સાથેની પ્રચંડ અને ભવ્ય જીત સાથે ભાજપની ભૂપેન્દ્ર સરકાર સત્તાના સિંહાસન પર બિરાજી ચુકી છે ત્યારે લોકોની અપેક્ષા પૂર્ણ કરવી હવે તેટલી જ જરુરી બની ગઇ છે. ગુજરાતની જનતાએ ફરી એક વાર ભાજપ પર અતૂટ ભરોસો મુક્યો છે જેથી  સરકાર માટે પ્રજાલક્ષી કાર્યો કરીને લોકોની અપેક્ષા પુરી કરવી પડશે. 

લોકોની અપેક્ષા પુરી કરવા માટે મુખ્યમંત્રીશ્રી ભુપેન્દ્ર પટેલ સરકારનું નવુ લક્ષ્ય છે જેથી મુખ્યમંત્રીશ્રી ભુપેન્દ્ર પટેલે તમામ મંત્રીઓને વિશેષ કામગીરી સોંપી છે. તમામ મંત્રીઓને પોતાના વિભાગના પ્રથમ 100 દિવસની કામગીરીનું લક્ષ્ય અપાયું છે.  

પ્રથમ 100 દિવસમાં મંત્રીઓને પોતાના વિભાગમાં નવી યોજનાઓ અને  હયાત યોજનાઓના અમલીકરણ પર ભાર મુકવા મુખ્યમંત્રીએ સૂચન કર્યું છે અને  વિઝન ડોક્યુમેન્ટ સંદર્ભે પણ જે તે મંત્રી ને વિભાગમાં કામગીરી શરૂ કરવા તાકીદ કરી છે. 

બીજી તરફ વડોદરાની માંજલપુર બેઠકના ધારાસભ્ય યોગેશ પટેલને નવા પ્રોટેમ સ્પીકર બનાવાયા છે.  પ્રોટેમ સ્પીકર તરીકે યોગેશ પટેલને સત્તાવાર જાણ કરાઇ છે. યોગેશ પટેલ પ્રોટેમ સ્પીકર તરીકે નવા ચૂંટાયેલા ધારાસભ્યોને શપથ લેવડાવશે અને કાયમી સ્પીકરની ચૂંટણી પ્રક્રિયા પણ તેઓ જ  હાથ ધરશે. 

આ પણ વાંચો--રાજ્ય સરકારના આ મંત્રી મુલાકાતે આવેલા લોકોએ આપેલો પુષ્પગુચ્છ નથી સ્વિકારતા, જાણો કારણ