ટીમના સતત ખરાબ પ્રદર્શન બાદ આખરે જો રૂટે લીધો સૌથી મોટો નિર્ણય

દેશમાં IPL ટૂર્નામેન્ટ ચાલી રહી છે, જેના કારણે ફેન્સ આંતરરાષ્ટ્રીય ક્રિકેટથી થોડા અજાણ છે. તાજેતરમાં મળી રહેલી માહિતી અનુસાર, ઈંગ્લેન્ડના ટેસ્ટ કેપ્ટન જો રૂટે આ પદ પરથી રાજીનામું આપી દીધું છે. 

જો રૂટે શુક્રવારે અચાનક ઈંગ્લેન્ડના ટેસ્ટ કેપ્ટન પદેથી રાજીનામું આપીને ક્રિકેટ જગતને ચોંકાવી દીધું છે. પાંચ વર્ષ સુધી ઈંગ્લેન્ડની ટેસ્ટ ટીમનું નેતૃત્વ કર્યા બાદ જો રૂટે શુક્રવારે રાજીનામું આપી દીધું છે. તાજેતરમાં જ વેસ્ટ ઈન્ડિઝના હાથે ઈંગ્લેન્ડની ટેસ્ટ શ્રેણીમાં 0-1થી પરાજય થયો હતો, ત્યારબાદ રૂટે ટેસ્ટ કેપ્ટન પદેથી રાજીનામું આપવાનો નિર્ણય કર્યો હતો. રૂટે 64 ટેસ્ટમાં ઈંગ્લેન્ડનું નેતૃત્વ કર્યું, જે એક રેકોર્ડ છે. આ પહેલા કોઈ કેપ્ટને આટલી ટેસ્ટમાં ઈંગ્લેન્ડનું નેતૃત્વ કર્યું ન હતું. રૂટે 64 ટેસ્ટમાં ઈંગ્લેન્ડની ટેસ્ટ ટીમની કેપ્ટનશિપ કરી હતી, જેમાંથી 27માં જીત મેળવી હતી. આ પણ એક રેકોર્ડ છે. ઈંગ્લેન્ડે આટલી ટેસ્ટ જીત અન્ય કોઈ કેપ્ટન હેઠળ નોંધાવી નથી. જો કે ગયા વર્ષે રુટનું કેપ્ટનપદનું પ્રદર્શન ખરાબ રહ્યું હતું અને તેની ટીમને 11 હાર મળી હતી. છેલ્લી 17 ટેસ્ટમાં ઈંગ્લેન્ડ માત્ર એક જ ટેસ્ટ જીતી શક્યું હતું. ઈંગ્લેન્ડે ભારત, ન્યૂઝીલેન્ડ, ઓસ્ટ્રેલિયા અને વેસ્ટ ઈન્ડિઝ સામે ટેસ્ટ શ્રેણી ગુમાવી હતી. વર્લ્ડ ટેસ્ટ ચેમ્પિયનશિપ પોઈન્ટ ટેબલમાં ઈંગ્લેન્ડની ટીમ છેલ્લા સ્થાને સરકી ગઈ છે.