સુરત ક્રાઇમબ્રાંચે ઓરિસ્સા પહોંચી, પથ્થરમારાનો સામનો કરી, સુરતમાં ગાંજો સપ્લાય કરતા બે આરોપીઓને દબોચી લીધા

સુરત શહેર ક્રાઈમ બ્રાન્ચ દ્વારા ઓરિસ્સાના ગંજામ જિલ્લામાં દિલધડક ઓપરેશન કરીને ગાંજો સપ્લાય કરતા બે આરોપીઓની ધરપકડ કરી સુરત ખાતે લઈ જવામાં આવ્યા છે. સુરત પોલીસ ઉપર ઓરિસ્સાના ગંજામમાં પથ્થરમારો થયો હોવા છતાં પોલીસે બહાદુરીપૂર્વક આ મિશન પાર પાડ્યુ હતું. 

બંને શાતિર આરોપીઓ ગુજરાતના સુરત શહેરમાં ગાંજો સપ્લાય કરવાનું કામ કરે છે.ઓરિસ્સાના ગંજામ શહેરથી તેઓ ગાંજો મોકલાવતા હતા.ગાંજો ટ્રેન અને  ટ્રાન્સપોર્ટના અન્ય માધ્યમ મારફતે મોકલવવામાં આવતો હતો... ગાંજો ગુજરાત આવ્યા પછી જો ઝડપાઈ જાય તો પણ આ બંને શાતિર આરોપીઓના નામ ગાંજો લઈને આવનાર બોલતા નહોતા... પરંતુ આખરે પોલીસ ઉંડી તપાસ કરી આ બન્ને આરોપીઓ સુધી પહોંચી ગઇ 

બન્ને આરોપીઓ જે ઘરમાં છુપાયા હતા તેની બાતમી મળી હતી 

ક્રાઈમ બ્રાન્ચની ટીમ બંને આરોપીને ઝડપી પાડવા માટે ઓરિસ્સાના ગંજામ પહોંચી હતી.ગંજામમાં આ બંને આરોપીઓ જે ઘરમાં છુપાયા હતા તેની માહિતી પણ પોલીસને મળી હતી.જેના આધારે ક્રાઇમ બ્રાંચની ટીમ સ્થાનિક પોલીસની મદદથી આરોપીઓ સુધી પહોંચી હતી... પોલીસે ગંજામથી ચિત્રા ઉર્ફે ચિત્રસેન વૃંદાવન પરીડા અને ગુડ્ડી વૃંદાવન પરીડાની ધરપકડ કરી.આરોપીઓની ધરપકડ કરતાની સાથે ગામ લોકો ભેગા થયા અને પોલીસ ઉપર પથ્થરમારો કરવાનો શરૂ કરી દીધો.જો કે પોલીસ સમય સૂચકતા વાપરીને તુરત જ ત્યાંથી આરોપીઓને લઈ રવાના થઈ ગઇ હતી.

સુરત શહેર ક્રાઈમ બ્રાન્ચની ટીમ પોતાનો જીવ બચાવી આરોપીને લઈને સુરત આવી પહોંચી હતી.  આ બંને આરોપીઓ ઉપર પોલીસ દ્વારા ઈનામ પણ જાહેર કરવામાં આવ્યું હતું.આરોપી ચિત્રા ઉર્ફે ચિત્રસેન પર 20 હજાર અને ગુડ્ડી ઉપર 10 હજારનું ઈનામ હતું. બંને આરોપીઓના નામ પુણા ગામમાં 51 કિલો, કતારગામ પોલીસ સ્ટેશનમાં 49 કિલો અને ઓલપાડ પોલીસ સ્ટેશનમાં 600 કિલો ગાંજાનો જથ્થો સપ્લાય કરવામાં  ખુલ્યા હતા. આ ઉપરાંત બંને આરોપીઓ વિરૂદ્ધ ભુવનેશ્વર એસટીએફ દ્વારા 1 હજાર કિલો ગાંજાનો ગુનો દાખલ કરાયો છે.

આ પણ વાંચોઃ  અમદાવાદ શહેર પોલીસ નાના-છૂટક વેપારીઓને લોન અપાવવામાં કરશે સહાય, 3 દિવસનો કાર્યક્રમ યોજાશે