સુકેશે મારી લાગણીઓ સાથે રમત રમી, જાણો જેક્લિને સુકેશ પર લગાવ્યા બીજા કયા સંગીન આરોપ

બોલિવૂડ અભિનેત્રી જેકલીન ફર્નાન્ડિસ છેલ્લા કેટલાક મહિનાઓથી સુકેશ ચંદ્રશેખર સાથે સંકળાયેલા રૂ.200 કરોડના મની લોન્ડરિંગ કેસને કારણે ચર્ચામાં છે. આ કેસમાં EDએ તેને સહ આરોપી બનાવી છે. તાજેતરમાં, અભિનેત્રી દિલ્હીની પટિયાલા હાઉસ કોર્ટમાં હાજર થઈ હતી અને આ દરમિયાન તેણે કેટલાક ચોંકાવનારા નિવેદનો આપ્યા હતા. 15 નવેમ્બર 2022ના રોજ જેકલીનને મની લોન્ડરિંગ કેસમાં જામીન મળી ગયા હતા. ચાલો જાણીએ કે અભિનેત્રીએ કોર્ટમાં કયા ચોંકાવનારા નિવેદનો આપ્યા છે.

જેક્લિને દિલ્હીની પટિયાલા હાઉસ કોર્ટમાં કહ્યું હતું કે સુકેશ ચંદ્રશેખરે મારી લાગણીઓ સાથે રમત રમી અને મારું જીવન નર્ક બનાવી દીધું, તેણે આગળ કહ્યું સુકેશે મને ગેરમાર્ગે દોરી મારી કારકિર્દી અને મારી આજીવિકા બરબાદ કરી નાંખી. અભિનેત્રી સાથે સુકેશનો પરિચય એક સરકારી અધિકારી તરીકે થયો હતો. જેકલીન ફર્નાન્ડિસે દાવો કર્યો હતો કે તેને કહેવામાં આવ્યું હતું કે સુકેશ ચંદ્રશેખર સરકારી અધિકારી છે. પિંકી ઈરાની કે જેણે અભિનેત્રીનો સુકેશ સાથે પરિચય કરાવ્યો હતો તે  તેને તેના મેક-અપ આર્ટિસ્ટ શાન મુથાથિલને કહ્યું હતું કે તે ગૃહ મંત્રાલયમાં અધિકારી છે.

જેકલીને  બીજો દાવો કર્યો હતો કે  ચંદ્રશેખરે સન ટીવીના માલિક તરીકે પોતાનો પરિચય આપ્યો હતો અને દાવો કર્યો હતો કે જે જયલલિતા તેની કાકી છે. ચંદ્રશેખરે કહ્યું કે હું તમારો મોટો ફેન છું અને મારે દક્ષિણ ભારતની ફિલ્મો કરવી જોઇએ.જેક્લિને ખુલાસો કર્યો કે તે અને સુકેશ દિવસમાં ઓછામાં ઓછા ત્રણ વખત કોલ અને વીડિયો કોલ પર વાત કરતા હતા. અભિનેત્રીએ કહ્યું, 'તે મારા શૂટ પહેલા સવારે,દિવસ દરમિયાન અને ક્યારેક રાત્રે સૂતા પહેલા ફોન કરતો હતો. તેણે ક્યારેય કહ્યું નહોતું કે તે જેલમાંથી ફોન કરી રહ્યો છે. તે પડદા પાછળ એક ખૂણામાંથી ફોન કરતો હતો અને બેકગ્રાઉન્ડમાં એક સોફા હતો.

અહેવાલ મુજબ અભિનેત્રીએ દાવો કર્યો હતો કે તેના અને સુકેશ વચ્ચે છેલ્લે 8 ઓગસ્ટ, 2021ના રોજ એક કોલ પર વાત થઈ હતી અને તે દિવસ પછી તેણે તેનો સંપર્ક કર્યો ન હતો. જેક્લિને કહ્યું મને પાછળથી ખબર પડી કે ગૃહ મંત્રાલય અને કાયદા મંત્રાલયના વરિષ્ઠ સરકારી અધિકારીઓની નકલ કરવાના આરોપમાં તેની ધરપકડ કરવામાં આવી હતી.જેક્લિને ખુલાસો કર્યો હતો કે જ્યારે તેને કેરળ જવાનું હતું ત્યારે સુકેશે તેને તેનું પ્રાઈવેટ જેટ વાપરવાનું કહ્યું હતું. તેણે કેરળમાં તેના માટે હેલિકોપ્ટર રાઈડનું પણ આયોજન કર્યું હતું. તેણીએ કહ્યું, 'બે પ્રસંગોએ જ્યારે હું તેને ચેન્નાઈમાં મળી ત્યારે મેં તેના પ્રાઈવેટ જેટમાં મુસાફરી કરી હતી.

આ પણ વાંચોઃ  ડોન દાઉદ ઇબ્રાહિમે પાકિસ્તાની મહિલા સાથે કર્યું બીજુ લગ્ન, ભાણીયાએ જ ખોલી પોલ