સબમરિન INS Vagir નૌકા દળમાં સામેલ, જાણો વિશેષતા

ભારતીય નૌકાદળ (Indian Navy)ની તાકાત દિવસેને દિવસે વધી રહી છે. રશિયા અને અમેરિકા જેવી વિશ્વ શક્તિઓ પણ ભારતીય સેનાના વખાણ કરતા થાકતા નથી. હવે વધુ એક શક્તિશાળી સબમરીન ભારતીય નૌકાદળમાં સામેલ થઈ ગઈ છે. આજે, કલવરી વર્ગની સબમરીનની પાંચમી સબમરીન INS વાગીર (INS Vagir)ને ભારતીય નૌકાદળમાં સામેલ કરવામાં આવી છે. INS વાગીર નૌકાદળમાં જોડાવાથી તેની તાકાતમાં અભૂતપૂર્વ વધારો થશે. INS વાગીરનું નિર્માણ 'મઝગાંવ ડોક શિપબિલ્ડર્સ લિમિટેડ (MDL)' દ્વારા ફ્રાન્સના 'મેસર્સ નેવલ ગ્રુપ'ના સહયોગથી કરવામાં આવ્યું છે.

INS વાગીરને નૌકાદળના વડા એડમિરલ આર હરિ કુમારની હાજરીમાં નૌકાદળમાં સામેલ કરવામાં આવ્યું હતું. ભારતીય નૌકાદળના જણાવ્યા અનુસાર, “સબમરીન દુશ્મનને અટકાવવા માટે ભારતીય નૌકાદળની ક્ષમતામાં વધારો કરીને ભારતના દરિયાઈ હિતોને આગળ વધારશે. તે કટોકટીના સમયે નિર્ણાયક પ્રહારો કરવા માટે ગુપ્તચર, સર્વેલન્સ અને રિકોનિસન્સ (ISR) ઓપરેશન ચલાવવામાં પણ મદદરૂપ સાબિત થશે.” આ દરમિયાન, નૌકાદળના વડાએ કહ્યું કે વાગીર એક ભયંકર હથિયાર પેકેજ સાથે ઘાતક સબમરીન છે. 24 મહિનાના ગાળામાં નેવીમાં સામેલ થનારી આ ત્રીજી સબમરીન છે. જટિલ પ્લેટફોર્મ બનાવવામાં અમારા શિપયાર્ડની કુશળતા માટે તે એક પ્રભાવશાળી પ્રમાણપત્ર પણ છે.

નૌકાદળના મતે, 'વાગીર' નો અર્થ 'સેન્ડ શાર્ક' થાય છે, જે તત્પરતા અને નિર્ભયતાની ભાવના દર્શાવે છે. નેવીએ કહ્યું કે 'INS વાગીર' વિશ્વના કેટલાક શ્રેષ્ઠ 'સેન્સર' અને શસ્ત્રોથી સજ્જ છે, જેમાં 'વાયર ગાઈડેડ ટોર્પિડો' અને સપાટીથી સપાટી પરની મિસાઈલોનો સમાવેશ થાય છે, જે દુશ્મનના મોટા કાફલાને બેઅસર કરી શકે છે.

નૌકાદળના જણાવ્યા અનુસાર, સબમરીન ખાસ ઓપરેશન માટે મરીન કમાન્ડોને ઉતારવાની ક્ષમતા ધરાવે છે, જ્યારે તેના શક્તિશાળી ડીઝલ એન્જિન 'બેટરી'ને ખૂબ જ ઝડપથી ચાર્જ કરી શકે છે. સ્વરક્ષણ માટે તેમાં અત્યાધુનિક 'ટોર્પિડો ડિકોય સિસ્ટમ' લગાવવામાં આવી છે. હિંદ મહાસાગરમાં ચીનની નૌકાદળની વધતી હાજરી વચ્ચે 'INS વાગીર'ને ભારતીય નૌકાદળમાં સામેલ કરવામાં આવી છે.

આ પણ વાંચો--PM MODIની અનોખી ભેટ, આંદામાન નિકોબારના 21 ટાપુ પરમવીર ચક્ર વિજેતાના નામે ઓળખાશે