પાંચ રાજ્યોમાં હારથી ગુસ્સે ભરાયા સિબ્બલ, કહ્યું- હવે સમય આવી ગયો છે કે ગાંધી પરિવાર...

પાંચ રાજ્યોની વિધાનસભા ચૂંટણીમાં પાર્ટીના પરાજયના થોડા જ દિવસો બાદ અને કોંગ્રેસ વર્કિંગ કમિટી (CWC)એ સોનિયા ગાંધીના નેતૃત્વમાં વિશ્વાસની પુનઃપુષ્ટિ કર્યાના એક દિવસ બાદ, કોંગ્રેસના વરિષ્ઠ નેતા કપિલ સિબ્બલે સોમવારે કહ્યું કે, હવે સમય આવી ગયો છે કે ગાંધી પરિવાર નેતૃત્વની જવાબદારીમાંથી અલગ થઇ જાય અને બીજા કોઈને તક આપે.

પાંચ રાજ્યોની વિધાનસભા ચૂંટણીમાં કારમી હાર બાદ હવે કોંગ્રેસમાં મંથન ચાલી રહ્યું છે. પક્ષમાં સંસ્થાગત પરિવર્તનને લઈને કાર્યકરો અને આગેવાનો બે જૂથમાં વહેંચાઈ ગયા છે. કેટલાક લોકોનું માનવું છે કે, પાર્ટી હાઈકમાન્ડમાં ફેરફાર થવો જોઈએ અને ગાંધી પરિવારને બદલે કોઈ અન્ય નેતાને જવાબદારી સોંપવી જોઈએ. સાથે જ કેટલાકનું માનવું છે કે, કોંગ્રેસની કમાન ગાંધી પરિવારના હાથમાં હોવી જોઈએ. તેમના વિના પાર્ટીને પુનર્જીવિત કરવી મુશ્કેલ છે. આ વચ્ચે કપિલ સિબ્બલે પણ પોતાની પ્રતિક્રિયા આપી દીધી છે. પાંચ રાજ્યોની વિધાનસભા ચૂંટણીમાં પાર્ટીના પરાજય બાદ 'ચિંતન શિબિર' યોજવાના પક્ષના નિર્ણયની ટીકા કરતા સિબ્બલે કહ્યું કે, જો નેતૃત્વ આઠ વર્ષ પછી પણ પક્ષના પતનના કારણોથી જાણીતું ન હોય તો તે બીજી જ દુનિયામાં જીવે છે. વધુમાં કહ્યું કે, તેઓ ન તો વિધાનસભાની ચૂંટણીમાં પાર્ટીની હારથી આશ્ચર્ય પામ્યા છે કે ન તો સોનિયા ગાંધીના નેતૃત્વમાં વિશ્વાસ વ્યક્ત કરવાના CWCના નિર્ણયથી. તેમણે કહ્યું કે, CWCની બહાર મોટી સંખ્યામાં નેતાઓનો દ્રષ્ટિકોણ સંપૂર્ણપણે અલગ છે.

CWC એ કોંગ્રેસ પાર્ટી અંગે નિર્ણય લેનારી સર્વોચ્ચ સમિતિ છે. પક્ષના બંધારણની જોગવાઈઓના અમલીકરણ અંગે CWCનો મત અથવા નિર્ણય અંતિમ છે. સમિતિમાં પાર્ટી અધ્યક્ષ, સંસદમાં કોંગ્રેસના નેતા અને અન્ય 23 સભ્યોનો સમાવેશ થાય છે. આ 23 સભ્યોમાંથી 12ની નિમણૂક ઓલ ઈન્ડિયા કોંગ્રેસ કમિટી (AICC) દ્વારા કરવામાં આવે છે અને બાકીની પાર્ટી અધ્યક્ષ દ્વારા પસંદ કરવામાં આવે છે. CWC પાસે પક્ષના પ્રમુખની નિમણૂક કરવાની અને અધ્યક્ષને પદ પરથી દૂર કરવાની સત્તા પણ છે.