શુભમન ગિલે ન્યૂઝીલેન્ડના છોડાવ્યા છક્કા, ફટકારી શાનદાર સદી

વિશ્વના સૌથી મોટા ક્રિકેટ સ્ટેડિયમમાં ભારત અને ન્યૂઝીલેન્ડ વચ્ચે T20 સીરીઝની અંતિમ મેચ રમાઈ રહી છે. આ મેચમાં ભારતીય ટીમના કેપ્ટન હાર્દિક પંડ્યાએ ટોસ જીતીને પ્રથમ બેટિંગ કરવાનો નિર્ણય કર્યો હતો. બેટિંગમાં શુભમન ગીલે ન્યૂઝીલેન્ડના તમામ બોલરોના છક્કા છોડાવી દીધા છે. તેણે 54 બોલમાં તેની T20 આંતરરાષ્ટ્રીય કારકિર્દીની પ્રથમ સદી ફટકારી છે. ગિલની આ છઠ્ઠી T20 ઈન્ટરનેશનલ મેચ છે, જેમાં તેની આ સર્વશ્રેષ્ઠ ઈનિંગ છે. આ પહેલા તેની સર્વશ્રેષ્ઠ ઈનિંગ 46 રનની હતી.

ભારતને પહેલો ફટકો ઈશાન કિશનના રૂપમાં શરૂઆતમાં લાગ્યો હતો, પરંતુ તે પછી પાવરપ્લેમાં શુભમન ગિલ અને રાહુલ ત્રિપાઠીએ જોરદાર રમત બતાવી હતી. પાવરપ્લેમાં ભારતે 1 વિકેટ ગુમાવીને 58 રન બનાવ્યા હતા. રાહુલ ત્રિપાઠી 44 રનની ધમાકેદાર ઇનિંગ રમીને આઉટ થયો હતો. સૂર્યાએ પણ ઝડપી ઇનિંગ્સ રમી હતી. વળી, શુભમન ગિલે તેની T20I કારકિર્દીની પ્રથમ સદી બનાવી. આ દરમિયાન ગિલના બેટથી સતત રન નિકળી રહ્યા હતા. તેણે મેદાનની ચારે દિશામાં રન ફટકાર્યા હતા. આ દરમિયાન ગિલ માટે ચોક્કા અને છક્કા મારવા જાણે આસાન બની ગયા હોય તેેવું દેખાઇ રહ્યું હતું.