અધૂરી માહિતી પર સીરમ ટીબીની રસીને મંજૂરી નહિ, વેક્સિન માટે હજુ રાહ જોવી પડશે

ટીબીની રસી માટેની સરકારી સમિતિએ સીરમ કંપનીની દરખાસ્તને નકારી કાઢી અને સલામતી અને રોગપ્રતિકારક શક્તિનો ડેટા માંગ્યો. કંપનીએ લગભગ એક મહિના પહેલા ટીબી રસી માટે ઈમરજન્સી ઉપયોગની પરવાનગી માટે અરજી સબમિટ કરી હતી. જે પછી સેન્ટ્રલ ડ્રગ્સ સ્ટાન્ડર્ડ કંટ્રોલ ઓર્ગેનાઈઝેશન (CDSCO)ની એક્સપર્ટ એક્શન કમિટી (SEC)ની બેઠકમાં તેને નકારી કાઢવામાં આવી હતી.

દેશમાં દર વર્ષે ટીબીના દર્દીઓ અને મૃત્યુની સંખ્યા લાખોની સંખ્યામાં નોંધાય છે. વર્ષ 2021માં 19.33 લાખ નવા દર્દીઓ મળી આવ્યા હતા. જે વર્ષ 2020 કરતા લગભગ 19% વધુ છે. તેવી જ રીતે, 2019 અને 2021ની વચ્ચે ટીબી મૃત્યુ દરમાં પણ લગભગ 11% નો વધારો નોંધવામાં આવ્યો હતો. વર્ષ 2020માં ટીબીના ચેપને કારણે 4.93 લાખ લોકોના મોત થયા હતા. તેથી મોટી વસ્તીને ટીબીથી બચાવવા માટે અભ્યાસ કરવામાં આવી રહ્યો છે.

નવી દિલ્હી સ્થિત ઈન્ડિયન કાઉન્સિલ ઓફ મેડિકલ રિસર્ચ (ICMR) અને પુણે સ્થિત સીરમ ઈન્સ્ટિટ્યૂટ ઓફ ઈન્ડિયા (SII)ની ટીમો રિસર્ચ કરી રહી છે. થોડા દિવસો પહેલા જ  ICMRએ નિવેદન આપ્યું હતું કે આ રસી પર ટ્રાયલનો ત્રીજો તબક્કો દેશના છ રાજ્યોમાં 12,000 લોકો પર શરૂ થશે, જે પૂર્ણ થવામાં લગભગ બે વર્ષ લાગી શકે છે.

સમિતિના સભ્ય અને વરિષ્ઠ વૈજ્ઞાનિકે જણાવ્યું હતું કે 28 માર્ચે સીરમ કંપનીની અરજી મળી હતી, જેમાં છ વર્ષ કે તેથી વધુ વયના લોકો માટે દેશમાં ટીબીની રસીના ઈમરજન્સી ઉપયોગની મંજૂરી આપવાની માંગ કરવામાં આવી હતી. જો કે, જ્યારે બેઠકમાં તેના પર વિચારણા કરવામાં આવી ત્યારે તેમાં વૈજ્ઞાનિક પુરાવાનો અભાવ હતો, જેના કારણે તેને સ્વીકારવામાં આવ્યો ન હતો.

સૂત્રોના જણાવ્યા અનુસાર, સીરમ કંપનીએ દક્ષિણ આફ્રિકામાં કરવામાં આવેલા અભ્યાસને ટાંકીને ભારતમાં તેના ઉપયોગ માટે પરવાનગી માંગી હતી. નવજાત શિશુ પર બે ટ્રાયલ થયા છે. જ્યારે ICMR ભારતમાં ત્રીજા તબક્કાના ટ્રાયલ ચલાવી રહ્યું છે.

આ સિવાય દક્ષિણ આફ્રિકામાં બીજા અને ત્રીજા તબક્કામાં બે હજાર લોકોનું અલગથી પરીક્ષણ કરવામાં આવી રહ્યું છે. સમિતિએ અવલોકન કર્યું હતું કે સીરમ કંપનીએ સ્થાનિક સ્તરે આ પ્રકારનું કોઈ પરીક્ષણ કર્યું નથી.

 ICMR સાથેની સીરમ કંપની ટીબી સામે રક્ષણ માટે રસીનો અભ્યાસ કરી રહી છે. ત્યાર બાદ જ પરવાનગી મળી શકશે. આ માટે 2025 સુધી રાહ જોવી પડી શકે છે.