ચીનના સોશિયલ મીડિયા પર અફવા, રાષ્ટ્રપતિ શી જિનપીંગ પદ છોડી શકે છે

ચીનના સોશિયલ મીડિયા પર એવી અફવા ઝડપથી ફેલાઈ રહી છે કે આકરા કોવિડ-19 લોકડાઉનના ગેરવહીવટને કારણે પેદા થયેલી આર્થિક મંદીના લીધે રાષ્ટ્રપતિ શી જિનપિંગ રાજીનામું આપી શકે છે. પાર્ટી પોલિટ બ્યુરોની સ્ટેન્ડિંગ કમિટીની બેઠક બાદ શી જિનપિંગના પદ છોડવાની અફવાઓ શરૂ થઈ હતી.બ્લોગર દ્વારા બનાવવામાં આવેલ એક વીડિયો ચીન દ્વારા સેન્સર કરવામાં આવે તે પહેલા સોશિયલ મીડિયા પર હેડલાઇન્સ બની રહ્યો હતો.

બ્લોગરના જણાવ્યા મુજબ વર્તમાન વડા પ્રધાન શી જિનપિંગ વતી પાર્ટી અને સરકારના રોજિંદા સંચાલનને સંભાળશે. કોવિડ 19 વાયરસનું સંક્ર્મણ વધુ ના ફેલાય અને સંક્ર્મણ રોકવા માટે ચીનના રાષ્ટ્રપતિએ આકરા લોકડાઉનનો  આદેશ આપ્યો હતો. લોકડાઉનને કારણે દેશભરના ધંધા-રોજગારોને ભારે નુકસાન થયું છે. ચીનના એક વરિષ્ઠ અધિકારીના જણાવ્યા અનુસાર, "મહામારી  આર્થિક અને સામાજિક વિકાસ માટે ખૂબ જ નુકસાનકારક છે."

ચીની કમ્યુનિસ્ટ પાર્ટીની નાણાકીય અને આર્થિક બાબતોની સેન્ટ્રલ કમિટીના કાર્યાલયના ડેપ્યુટી ડાયરેક્ટર હાન વેનસીયુએ જણાવ્યું હતું કે અર્થતંત્રને સ્થિર કરીને અને દેશના વિકાસને સુરક્ષિત કરવાને બદલે રોગચાળાને વૈજ્ઞાનિક ચોકસાઈથી નિયંત્રિત કરવો જોઈએ.સખત કોવિડ પ્રતિબંધોએ ઔદ્યોગિક ઉત્પાદન પણ અટકાવ્યું છે જેના પરિણામે પુરવઠામાં વિક્ષેપ આવે છે.

આ સાથે, મેન્યુફેક્ચરિંગ પ્રવૃત્તિમાં સતત ઘટાડો નોંધાયો હતો, જે ફેબ્રુઆરી 2020 પછીના સૌથી નીચા સ્તરે પહોંચી ગયો હતો. તદુપરાંત, શાંઘાઈમાં લોકડાઉન લંબાવવાનું ચાલુ હોવાથી, વિવિધ રોકાણ બેંકોના વિશ્લેષકોએ પણ દેશના આર્થિક વિકાસ દર માટે તેમના અનુમાનમાં ઘટાડો કર્યો હતો. એપ્રિલ મહિનામાં, ચીનની યુઆન ચલણમાં 4 ટકાથી વધુનો ઘટાડો થયો, જે 28 વર્ષમાં સૌથી મોટો માસિક ઘટાડો છે.