રાહુલ ગાંધીએ 2020થી અત્યાર સુધી 113 વખત સુરક્ષાના નિયમો તોડ્યા: CRPF

કોંગ્રેસ (Congress)ની ભારત જોડો યાત્રા દરમિયાન રાહુલ ગાંધી (Rahul Gandhi)ની સુરક્ષામાં થયેલી ખામીને લઈને CRPFનો જવાબ સામે આવ્યો છે. CRPF દ્વારા કહેવામાં આવ્યું છે કે રાહુલ ગાંધીની સુરક્ષા (Security) માટે સંપૂર્ણ વ્યવસ્થા કરવામાં આવી હતી. CRPFએ કહ્યું છે કે વર્ષ 2020થી અત્યાર સુધી રાહુલ ગાંધીએ 113 વખત સુરક્ષા સૂચનાઓનું ઉલ્લંઘન કર્યું છે. આ સાથે તેમને સમયાંતરે માહિતી પણ આપવામાં આવી છે. 

CRPF એ તેના જવાબમાં કહ્યું છે કે રાહુલ ગાંધી માટે તમામ સુરક્ષા પગલાં જારી કરવામાં આવેલી માર્ગદર્શિકા અનુસાર લેવામાં આવ્યા છે. સેન્ટ્રલ રિઝર્વ પોલીસ ફોર્સે કહ્યું કે સુરક્ષા કાર્ય માટે યોગ્ય રીતે ગોઠવણ ત્યારે જ થાય છે જ્યારે સુરક્ષિત વ્યક્તિ પણ માર્ગદર્શિકાનું પાલન કરે. જોકે, રાહુલ ગાંધી પોતે ક્યારેક સુરક્ષા કોર્ડન તોડીને લોકોને મળીને પોતાની સુરક્ષાને જોખમમાં મૂકે છે. અર્ધલશ્કરી સુરક્ષા દળે કહ્યું કે 2020થી અત્યાર સુધીમાં ખુદ રાહુલ ગાંધી વતી 113 વખત સુરક્ષા કોર્ડન તોડીને નિયમોનું ઉલ્લંઘન કરવામાં આવ્યું છે. એટલું જ નહીં CRPFએ કહ્યું કે રાહુલ ગાંધીની સુરક્ષામાં સમગ્ર પ્રોટોકોલનું પાલન કરવામાં આવે છે. તેમને Z પ્લસ સુરક્ષા આપવામાં આવી છે અને તેના માપદંડો અનુસાર કોઈ કસર બાકી નથી, પરંતુ રાહુલ ગાંધી પોતે ઘણી વખત સુરક્ષાના નિયમોનું ઉલ્લંઘન કરી ચુક્યા છે અને લોકોને મળવા માટે બહાર નીકળ્યા છે.

સૂત્રોના જણાવ્યા અનુસાર, CRPF દ્વારા કહેવામાં આવ્યું છે કે ભારત જોડો યાત્રામાં રાહુલ ગાંધી માટે સંપૂર્ણ સુરક્ષા વ્યવસ્થા કરવામાં આવી હતી. સંરક્ષિત વ્યક્તિની મુલાકાત અંગેની માર્ગદર્શિકા અનુસાર સીઆરપીએફ દ્વારા રાજ્ય પોલીસ/સુરક્ષા એજન્સીઓ સાથે સંકલનમાં જરૂરી સુરક્ષા વ્યવસ્થા કરવામાં આવે છે. ગૃહ મંત્રાલય દ્વારા રાહુલ ગાંધીની સાથે કોંગ્રેસને રાજ્ય સરકારો સાથેની સુરક્ષા અંગેની સલાહ અને તમામ માહિતી પણ આપવામાં આવી હતી. આ માહિતી ધમકીના મૂલ્યાંકનના આધારે બહાર પાડવામાં આવી હતી.

ગૃહ મંત્રાલયે કોંગ્રેસના પત્ર પર સીઆરપીએફ પાસેથી જવાબ માંગ્યો હતો. આના પર CRPFએ ગૃહ મંત્રાલયને આપેલા જવાબમાં રાહુલ ગાંધી પર સુરક્ષાના નિયમોનું ઉલ્લંઘન કરવાનો આરોપ લગાવ્યો છે. કોંગ્રેસ મહાસચિવ કેસી વેણુગોપાલ તરફથી બુધવારે ગૃહમંત્રી અમિત શાહના નામે એક પત્ર લખવામાં આવ્યો હતો. જેમાં કહેવામાં આવ્યું હતું કે ભારત જોડો યાત્રા દરમિયાન રાહુલ ગાંધી અને અન્ય મુસાફરોની સુરક્ષામાં ઘણી વખત ક્ષતિ રહી છે, એટલું જ નહીં, કોંગ્રેસ નેતા દ્વારા લખવામાં આવેલા પત્રમાં કહેવામાં આવ્યું છે કે એજન્સીઓ પ્રતિષ્ઠિત હસ્તીઓને યાત્રામાં ભાગ લેવાથી રોકી રહી છે. આ ઉપરાંત તેમાં આવતા લોકોની લાંબી પૂછપરછ પણ કરવામાં આવે છે. રાજીવ ગાંધી અને ઈન્દિરા ગાંધીની હત્યાનો ઉલ્લેખ કરતાં કોંગ્રેસે કહ્યું હતું કે આ યાત્રા હવે આગામી તબક્કામાં પંજાબ અને જમ્મુ-કાશ્મીર જેવા સંવેદનશીલ રાજ્યોમાં પહોંચવાની છે. આવી સ્થિતિમાં, વિસ્તૃત સુરક્ષા વ્યવસ્થા કરવી વધુ સારું રહેશે. તેમણે એવી પણ સલાહ આપી કે સરકારે આવી બાબતોમાં બદલાની રાજનીતિથી દૂર રહેવું જોઈએ અને પોતાની ફરજ નિભાવવી જોઈએ.

આ પણ વાંચો--NIAએ કેરળમાં PFIનાં 56 સ્થળોએ પાડ્યાં દરોડા