લવ જેહાદની ઘટનાથી નિર્ણયનગર વિસ્તારમાં લોકોનો આક્રોષ, સ્વયંભૂ બંધ

રાજ્યભરમાં લવ જેહાદની બનતી ઘટનાઓ અવાર નવાર પ્રકાશમાં આવતી રહે છે. અમદાવાદના પશ્ચિમ વિસ્તાર નિર્ણયનગરમાં પણ લવ જેહાદનો બનાવ બહાર આવતાં લોકોમાં ભારે રોષ જોવા મળી રહ્યો છે. આ મુદ્દે બુધવારે નિર્ણય નગર વિસ્તારના વેપારીઓએ સ્વયંભૂ બંધ રાખી વિરોધ કર્યો હતો. 

નિર્ણયનગરમાં બહાર આવેલી લવ જેહાદની ઘટનાથી સમગ્ર વિસ્તારમાં ભારે રોષ જોવા મળી રહ્યો છે. 20 દિવસ પહેલાં સોની સમાજની યુવતી શાહિબાગના વિધર્મી યુવક સાથે ફરાર થઇ ગઇ હતી. આ મામલે વાડજ પોલીસ સ્ટેશનમાં યુવતીના પરિવારે પોતાની પુત્રી ગુમ થઇગઇ હોવાની અરજી પણ આપી હતી. ત્યારબાદ યુવતીએ કોર્ટ મારફતે વાડજ પોલીસ સ્ટેશનમાં પોતાની મરજીથી વિધર્મી યુવક સાથે લગ્ન કર્યા હોવાની અરજી આપી હતી. યુવતીએ અરજીમાં મનમરજીથી ઘરપરિવારનો ત્યાગ કરી વિધર્મી યુવક સાથે લગ્ન કર્યાનો ઉલ્લેખ પણ કર્યો છે. 

બીજી તરફ આ ઘટનાના પગલે નિર્ણયનગર વિસ્તારના લોકોમાં ભારે રોષ જોવા મળી રહ્યો છે. ઘટનાના પગલે બુધવારે નિર્ણયનગર વિસ્તારના સોની સમાજના વેપારીઓ અને સ્થાનિક રહિશોએ સ્વયંભૂ બંધ પાળ્યો હતો અને વિરોધ વ્યકત કર્યો હતો. આ મામલે ઉચિત કાર્યવાહી કરવામાં આવે તેવી માગ પણ કરવામાં આવી હતી.