નવી કિડની હોસ્પિટલ ખાતે ત્રણ મહત્વના વિભાગોની OPD આજથી શરૂ

અમદાવાદની મંજુશ્રી મીલ કંપાઉન્ડમાં નવી શરૂ કરાયેલી કિડની હોસ્પિટલમાં આજે સોમવારના રોજ થી ઓપીડી શરૂ કરવામાં આવી છે. જેનો લાભ રોજના 1200 જેટલા દર્દીઓને મળી શકશે. મહત્વનું છે કે અત્યાધુનિક સુવિધાઓ અને ટેકનોલોજીથી યુક્ત આ હોસ્પિટલ દર્દીઓ માટે આશીર્વાદરૂપ બની રહેશે. કિડની હોસ્પિટલની નવી બિલ્ડિંગમાં નેફ્રોલોજી, પિડિયાટ્રિક નેફ્રોલોજી અને હાઈ રિસ્ક પ્રેગનન્સીની ઓપીડી શરૂ કરવામા આવી છે.. મહત્વનું છે કે મંજુશ્રી મીલ કમ્પાઉન્ડ માં નવ નિયુક્ત આ હોસ્પિટલનું લોકાર્પણ ત્રણ મહિના પહેલા વડાપ્રધાનના હસ્તે કરવામા આવ્યુ હતુ. 

સિવિલ કેમ્પસ સ્થિત ઈન્સ્ટીટ્યૂટ ઓફ કિડની ડિસીઝ એન્ડ રિસર્ચ સેન્ટર (IKDRC)ની નવી બિલ્ડિંગનું વડાપ્રધાનના હસ્તે લોકાર્પણ કરાયુ હતુ. અને ત્યારથી દર્દીઓ માટે તેને ખુલ્લી મૂકવામાં આવી હતી. છેલ્લા બે મહિનાથી ડાયાલિસિસ સુવિધાનું શિફ્ટિંગ કરવામાં આવ્યું હતું અને દર્દીઓનું ડાયાલીસીસ પણ શરૂ કરી દીધું હતું. જોકે અત્યાર સુધી ઓપીડી ની શરૂઆત કરવામાં આવી નહોતી. આજે સવારથી  નવી બિલ્ડિંગમાં નેફ્રોલોજી, પિડિયાટ્રિક નેફ્રોલોજી અને હાઈ રિસ્ક પ્રેગનન્સીની ઓપીડી શરૂ કરવામા આવી છે.  

કિડની ઈન્સ્ટીટ્યૂટના ડાયરેક્ટર ડૉ. વિનીત મિશ્રાએ જણાવ્યું  કે, રોજના 1200 જેટલા દર્દીઓ ઓપીડીમાં આવે છે. ત્યારે નવી બિલ્ડીંગમાં શરૂ થયેલી ઓપીડીથી લોકોને ઘણી રાહત થશે અને મદદ મળી રહેશે. નવી બિલ્ડિંગમાં કુલ 850 બેડ છે જેમાં આઈસીયુ અને ટ્રાએજના 125 બેડનો સમાવેશ થયો છે. જુદાજુદા વિભાગોમાં દાખલ દર્દીનું ડાયાલિસિસ થઈ શકે તે માટે વિવિધ એરિયામાં 120 જેટલા ડાયાલીસીસ મશીન પણ મૂકવામાં આવ્યા છે. અન્ય વિભાગો પણ અહીં એક બાદ એક શીફ્ટ કરાશે અને આ અદ્યતન વિશાળ હોસ્પિટલની સંપૂર્ણ સુવીધા લોકોને મળી રહેશે.. 

મંજુશ્રી મીલ કંપાઉન્ડમાં અગાઉ સિવિલ આઈ હોસ્પિટલ ની અત્યાધુનિક સુવિધાઓ સાથેનું બિલ્ડીંગ શરૂ કરાયુ હતુ અને આઈ હોસ્પિટલમાં હાલ લોકો અત્યાધુનિક સેવાઓ નો લાભ લઈ રહ્યા છે.  ત્યારે હવે કિડની હોસ્પિટલની પણ અત્યાધુનિક સેવાઓની ઓપીડી શરૂ કરવામાં આવતા લોકોને મોટી રાહત મળી રહેશે.. 

આ પણ વાંચો :  BSFએ હરામી નાળામાંથી 03 પાકિસ્તાની માછીમારોને ઝડપી લીધા