નીતિન ગડકરી અને શિવરાજસિંહ ચૌહાણને સંસદીય બોર્ડમાંથી હટાવાયા

ભારતીય જનતા પાર્ટીના સંસદીય બોર્ડમાં મોટા ફેરફારો કરવામાં આવ્યા છે. કેન્દ્રીય મંત્રી નીતિન ગડકરીને પાર્ટીના સંસદીય બોર્ડમાંથી હટાવી દેવામાં આવ્યા છે. ગડકરી ઉપરાંત મધ્યપ્રદેશના મુખ્યમંત્રી શિવરાજ સિંહ ચૌહાણને પણ સંસદીય બોર્ડમાંથી હટાવી દેવામાં આવ્યા છે. આ બંને નેતાઓને ભાજપની કેન્દ્રીય ચૂંટણી સમિતિમાંથી પણ બહાર કરી દેવામાં આવ્યા છે.

કેન્દ્રીય મંત્રી નીતિન ગડકરી અને મધ્યપ્રદેશના મુખ્યમંત્રી શિવરાજ સિંહને બોર્ડમાંથી હટાવી દેવામાં આવ્યા છે, જ્યારે બીએસ યેદિયુરપ્પા, સુધા યાદવ, ઈકબાલ સિંહ લાલપુરા, સર્બાનંદ સોનોવાલ, કે. લક્ષ્મણને સંસદીય બોર્ડમાં નવા સભ્યો તરીકે સામેલ કરવામાં આવ્યા છે.

સંસદીય બોર્ડમાં જગત પ્રકાશ નડ્ડા (પ્રમુખ), નરેન્દ્ર મોદી, રાજનાથ સિંહ, અમિત શાહ, બીએસ યેદિયુરપ્પા, સર્બાનંદ સોનોવાલ, કે લક્ષ્મણ, ઈકબાલસિંહ લાલપુરા, સુધા યાદવ અને બી.એલ.સંતોષ (સચિવ)નો સમાવેશ થાય છે. 

આ સાથે ભારતીય જનતા પાર્ટીની કેન્દ્રીય ચૂંટણી સમિતિની પણ જાહેરાત કરવામાં આવી છે. આ સમિતિમાં મહારાષ્ટ્રના ડેપ્યુટી સીએમ દેવેન્દ્ર ફડણવીસ, કેન્દ્રીય મંત્રી ભૂપેન્દ્ર યાદવ અને ઓમ માથુરને સ્થાન મળ્યું છે. કેન્દ્રીય મંત્રી નીતિન ગડકરીને પણ આ સમિતિમાં સ્થાન મળ્યું નથી.

કેન્દ્રીય ચૂંટણી સમિતિના સભ્યોમાં જગત પ્રકાશ નડ્ડા (પ્રમુખ) નરેન્દ્ર મોદી, રાજનાથ સિંહ, અમિત શાહ, બીએસ યેદિયુરપ્પા, સર્બાનંદ સોનોવાલ,કે લક્ષ્મણ, ઈકબાલસિંહ લાલપુરા, સુધા યાદવ,સત્યનારાયણ જાતિ, ભૂપેન્દ્ર યાદવ, દેવેન્દ્ર ફડણવીસ ,બી.એલ.સંતોષ (સચિવ) , વી શ્રીનિવાસ (પદાધિકારી)નો સમાવેશ થાય છે. 

તાજેતરમાં મહારાષ્ટ્રમાં ભાજપે શિવસેનાના શિંદે જૂથ સાથે મળીને સરકાર બનાવી છે. આ સરકારમાં એકનાથ શિંદેને મુખ્યમંત્રી બનાવવામાં આવ્યા છે જ્યારે ભાજપના નેતા દેવેન્દ્ર ફડણવીસને ડેપ્યુટી સીએમ પદથી સંતોષ માનવો પડ્યો હતો. ફડણવીસ ડેપ્યુટી સીએમ પણ બનવા માંગતા ન હતા, પછી અચાનક તેમણે કેન્દ્રીય નેતૃત્વના આદેશ પર શપથ લીધા. હવે મહારાષ્ટ્રના રાજકારણના સૌથી મોટા ચહેરા નીતિન ગડકરીને સંસદીય બોર્ડ અને ચૂંટણી સમિતિમાંથી હટાવી દેવામાં આવ્યા છે અને દેવેન્દ્ર ફડણવીસનું કદ વધાર્યું છે.

બીજી તરફ ભાજપે પણ કર્ણાટકના સમીકરણને ઉકેલવાનો પ્રયાસ કર્યો છે. બીએસ યેદિયુરપ્પાને કેન્દ્રની રાજનીતિમાં લાવીને ભાજપે 2023ની વિધાનસભા ચૂંટણી પહેલા રાજ્યની રાજનીતિ કેળવવાનો પ્રયાસ કર્યો છે.

શાહનવાઝ હુસૈન એક સમયે ભાજપના કેન્દ્રીય રાજકારણનો હિસ્સો હતા. 2020 માં, જ્યારે ભાજપે બિહારમાં JDU સાથે સરકાર બનાવી, ત્યારે શાહનવાઝ હુસૈનને દિલ્હીથી પટના મોકલવામાં આવ્યા અને તેઓ કેબિનેટમાં મંત્રી બન્યા. હવે જેડીયુએ ભાજપ સાથેના સંબંધો તોડીને આરજેડી સાથે મળીને સરકાર બનાવી છે, તો ભાજપના મંત્રીઓને પણ પોતાની બેઠકો ગુમાવવી પડી હતી. મંત્રીની ખુરશી બાદ હવે શાહનવાઝ હુસૈન પણ ભાજપની કેન્દ્રીય ચૂંટણી સમિતિમાંથી બહાર ફેંકાઈ ગયા છે.