મંત્રી કુંવરજી બાવળીયા એક્શનમાં, જળ વ્યવસ્થાપન મામલે ઉચ્ચ અધિકારીઓ સાથે યોજી બેઠક

ગુજરાત રાજ્યમાં હાલમાં જ વિધાનસભાની ચૂંટણી પૂર્ણ થયા બાદ બાદ જળ સંપત્તિ અને પાણી પુરવઠા વિભાગનો પદભાર સંભાળતા જ મંત્રીશ્રી કુવરજીભાઈ બાવળીયાએ તુરંત એક્શન મોડમાં આવી સૌરાષ્ટ્રના વિવિધ જિલ્લાઓમાં જળ વ્યવસ્થાપન , વિવિધ સિંચાઇ યોજનાઓની સમીક્ષાર્થે રાજકોટ સર્કિટ હાઉસ ખાતે ઉચ્ચ અધિકારીઓ સાથે  બેઠક યોજી હતી. 

રાજકોટ ખાતે આયોજિત આ બેઠકમાં મંત્રીશ્રીએ રાજકોટ, સુરેન્દ્રનગર, મોરબી, જુનાગઢ, ગીર સોમનાથ, જામખંભાળિયા, પોરબંદર સહિતના વિવિધ જિલ્લાઓમાં નાની મોટી સિંચાઈ યોજનાઓ, નિર્માણાધિન ચેક ડેમો અને કેનાલોમાં હાલ ચાલી રહેલ કામગીરી  ઝડપથી પૂર્ણ થાય તેમ જ ગુણવત્તા સભર કામગીરી થાય તે માટે ખાસ તાકીદ કરી હતી. 

આ ઉપરાંત મંત્રીશ્રીએ વિવિધ કેનાલની કામગીરી, ડી શીલ્ટીન્ગ અને ચેકડેમોની મરામત, મિકેનિકલ વર્ક સહિતની કામગીરીની જાણકારી અધિકારીઓ પાસેથી મેળવી હતી. મંત્રીશ્રી કુવરજીભાઈએ કેનાલ તેમજ અન્ય સરકારી જળ સ્ત્રોત પર કોઈ પણ પ્રકારની પાણી ચોરી ન થાય તેમ જ તેની યોગ્ય જાળવણી થાય તે માટે પણ અધિકારીઓને યોગ્ય પગલાં લેવા જણાવ્યું હતું. સૌરાષ્ટ્રની જીવાદોરી સમાન "સૌની" યોજનાની વિવિધ લીંકોના કામો હાલ પ્રગતિ હેઠળ છે, તેના સંદર્ભે પણ મંત્રીશ્રીએ અધિકારીઓ સાથે પરામર્શ કર્યો હતો. 

સર્કિટ હાઉસ ખાતે યોજાયેલી બેઠકમાં ક્ષાર અંકુશ વર્તુળના અધિક્ષક ઇજનેર શ્રી એચ.સી ચૌધરી તેમજ રાજકોટ સિંચાઈ યોજના વર્તુળના ઇન્ચાર્જ અધિક્ષક ઇજનેર શ્રી કે. એચ. મહેતાએ સિંચાઈ યોજના કામગીરી સંદર્ભે વિવિધ ટેકનિકલ પ્રશ્નોની ચર્ચા મંત્રીશ્રી સાથે કરી હતી. આ તકે રાજકોટ પંચાયત સિંચાઈ વર્તુળના અધિક્ષક ઇજનેર શ્રી પરમાર તેમજ વિવિધ જિલ્લાઓમાંથી કાર્યપાલક ઇજનેરશ્રીઓએ તેમના જિલ્લાની પ્રવર્તમાન પરિસ્થિતિનો ચિતાર પૂરો પાડ્યો હતો..

આ પણ વાંચોઃ  રાજ્યના કૃષિમંત્રી રાઘવજીભાઈ પટેલે માં આશાપુરાના મંદિરના દર્શન કર્યા