અંધારામાં માફિયાઓ રૂંધે છે શહેરીજનોનો શ્વાસ, સ્થાનિકોની અનેક રજૂઆત છતાં તંત્રના આંખ આડા કાન

જે નદીને આપણા દેશમાં માતા તરીકે પૂજવામાં આવે  છે તેની આજે એવી હાલત છે કે નજીકથી નીકળ્યા હોય તો તમારે નાક બંધ કરવાની જરૂર પડે. નદીઓમાં થઇ રહેલા પ્રદૂષણને લઇને તંત્ર દ્વારા અવાર-નવાર શુદ્ધિકરણના કાર્યક્રમ ચલાવવામાં આવે છે પરંતુ હવે લાગે છે કે તે પણ માત્ર કાગળ પર જ રહે છે. રાજ્યની સાબરમતી નદીની જ જો વાત કરીએ તો તે દેશની સૌથી પ્રદૂષિત નદીઓમાં બીજા નંબરે છે. એક તરફ અમદાવાદીઓ પ્રદૂષિત નદીઓથી પરેશાન થઇ રહ્યા છે તો બીજી અમદાવાદના ચંડોળા તળાવમાં અમુક અસમાજીક તત્વો દ્વારા શહેરના લોકોને શ્વાસ લેવામાં પણ તકલીફો પડે તેવા કાર્ય મધરાત્રીએ કરવામાં આવી રહ્યા છે.

ગુજરાત ફર્સ્ટની ટીમ જ્યારે અમદાવાદના ચંડોળા તળાવ પાસે પહોંચી ત્યારે એક એવો નજારો જોવા મળ્યો કે જે સ્થાનિક લોકો માટે મોટી વાત નથી પરંતુ શહેરીજનો માટે તેમની હેલ્થ સાથે ચેડા થઇ રહ્યા હોય તેવી બાબત છે. અમદાવાદનું આ એક સળગતું તળાવ કે જ્યા પ્રદૂષણ માફિયાઓ રોજ કાળુ કામ કરતા હોય છે. વાત અહીં ચંડોળા તળાવની થઇ રહી છે જ્યા રોજ રાત્રિના સમયે વાયરમાંથી કોપર છૂટુ પાડવા માટે લવાય છે. આગના કારણે ધુમાડા શહેરને ઘેરી વળે છે અને રાત્રિના અંધારામાં આ નરાધમો શહેરીજનોનો શ્વાસ રુંધી દે છે. 

વળી અનેક વખત સ્થાનિક લોકો દ્વારા આ બાબતે કોર્પોરેશન, સ્થાનિક પોલીસ અને જીપીસીબીને જાણ કરી છે. તેમ છતા તંત્ર દ્વારા કોઇ પણ પ્રકારના પગલા ભરવામાં આવ્યા નથી. જેના કારણે લોકો હાલાકી ભોગવી રહ્યા છે. બીજી તરફ સ્થાનિકોનું કહેવું છે કે, જે અમે કમાઈએ છીએ તે દવામાં જ ખર્ચ થઇ જાય છે. આ અંગે જવાબદાર અધિકારીઓ પણ સ્થાનિકોની રજૂઆતને ગંભીરતાથી નથી લઇ રહ્યા. તેઓ સરખી રીતે જવાબ પણ આપતા નથી. આખી રાત ચાલતી આ આગ નરી આંખે દેખાઇ આવે છે તેમ છતા પણ જો કોઇ પગલા ન લેવાય તો એ સ્પષ્ટ છે કે તંત્રની રહેમ નજર હેઠળ જ આ નરાધમો પોતાના મનસુબા કાયમ કરી રહ્યા છે.

ગુજરાત ફર્સ્ટની ટીમ મધરાત્રિએ ચંડોળા તળાવ પાસે પહોંચી, જ્યા પ્રદૂષણ માફિયાઓ રોજની જેમ પોતાનું કાર્ય કરી રહ્યા હતા. અહીં આ માફિયાઓ દ્વારા શહેરીજનોના હેલ્થ સાથે ચેડા કરવામાં આવે છે જેનું ગુજરાત ફર્સ્ટના રિપોર્ટર ઉમંગ રાવલ દ્વારા સંપૂર્ણ રિપોર્ટિગ કરવામાં આવ્યું હતું. આપને જણાવી દઇએ કે, આ કોઇ સામાન્ય વાત નથી, અહીં અડધી રાત્રિએ પહોંચવું કોઇ પણને મોટી મુશ્કેલીમાં મુકી શકે છે. ત્યારે ગુજરાત ફર્સ્ટના રિપોર્ટર ઉમંગ રાવલ, કેમેરામેન અંકિત દવે, આ સાથે આતિફ સૈયદ જીવના જોખમે શહેરીજનોના શ્વાસ સાથે ચેડા કરતા માફિયાઓનો પર્દાફાશ કરવા પહોંચ્યા હતા. જ્યા તેમને નજર આવ્યું કે, અહીં આ માફિયાઓ કોઇ જ ડર વિના શહેરને પ્રદૂષિત કરી રહ્યા છે. 

રાજ્યમાં સાબરમતી નદી જ નહીં એ સિવાય CPCB ના રિપોર્ટમાં ગુજરાતની અન્ય 12 નદીઓનો પણ સમાવેશ થયો છે. જેમાં, ભાદર, જેતપુર (258.6 I), અમલખાડી સાથે, અંકલેશ્વર, (49.0 I), ભોગાવો, સુરેન્દ્રનગર (6.0 V), ભુખી ખાદી, વાગરા (3.9 V), દમણગંગા કાચીગાંવ અને ચાણોદ (5.3 V), ધાદર, કોઠાડા (33.0 I), ખારી, લાલી ગામ (195.0 I), માહી કોટના, મુજપુર (12.0 III), મિંધોલા , સચિન (28.0 II), શેઢી, ખેડા (6.2 IV), તાપી , નિઝર (3.4 વી), વિશ્વામિત્રીનો સમાવેશ થયો છે.

આ પણ વાંચો - સાબરમતીના શુદ્ધિકરણની માત્ર વાતો, વાસ્તવિકતા જુદી, દેશની સૌથી પ્રદૂષિત નદીઓમાં સાબરમતી બીજા નંબરે