જાણો પેપરલીક કાંડના આરોપી કેતન બારોટની ક્રાઇમ કુંડળી

ગુજરાતમાં રવિવારે યોજાનારી જુનિયર ક્લાર્કની પરીક્ષાનું પેપર ફૂટવાની ઘટનામાં ગુજરાત એટીએસ દ્વારા 15 આરોપીની વડોદરાથી ધરપકડ કરવામાં આવી છે. આ આરોપીઓમાં કેતન બારોટ નામનો આરોપી પણ છે જે અગાઉ પણ બોગસ એડમિશનના મામલે દિલ્હીની તિહાડ જેલમાં રહી ચુક્યો છે અને ફરી એક વાર પેપરલીક કાંડમાં પોલીસના હાથે પકડાયો છે. 

પેપરલીક કાંડમાં ગુજરાત એટીએસ દ્વારા અત્યાર સુધીમાં 15 આરોપીની ધરપકડ કરાઇ છે જેમાં 5 આરોપી ગુજરાતના વતની છે જ્યારે  10 આરોપી ગુજરાત બહારના છે.  આ કેસના મુખ્ય બે આરોપી હજુ પોલીસ પકડથી દૂર છે. તપાસમાં બહાર આવ્યું કે હૈદરાબાદના પ્રિન્ટિંગ પ્રેસમાંથી  પેપર લીક થયું હતું અને  આરોપી પ્રદીપ નાયક હૈદરાબાદથી પેપર વડોદરા  લાવ્યો હતો. વડોદરાના સેન્ટર પર કેટલાક ઉમેદવારોને જવાબ બતાવવાના હતા.  પોલીસે કેતન બારોટ નામના આરોપીને પણ પકડ્યો છે.  આરોપી કેતન બારોટ અને ભાસ્કર ચૌધરી 2019માં CBI દ્વારા પકાડાયા હતા.

દરમિયાન જુનિયર ક્લાર્ક પેપર લીક મામલે મોટો ઘટસ્ફોટ થયો છે. આ કેસનો મહત્વના આરોપી બાયડના આરોપી કેતન બારોટની કુંડળી સામે આવી છે. કેતન બારોટ વૈભવી કારોનો શોખીન છે અને  ૯ વર્ષથી એડમિશનની દુનિયામાં તેનું મોટું નામ છે. અગાઉ તે ભાસ્કર ચૌધરીની સાથે 2019માં CBI દ્વારા પકડાયો હતો અને  તે બોગસ એડમિશન મામલે દિલ્હીની તિહાડ જેલમાં પણ રહી ચુક્યો છે.

કેતન બારોટ દિશા એજ્યુકેશન કન્સલ્ટન્સી ચલાવે છે અને તેના નામે તે  એડમિશન અપાવવાના અને સ્પર્ધાત્મક પરીક્ષામાં પાસ કરાવવાના ગોરખધંધા ચલાવે છે.  બાયડ અને અમદાવાદ ખાતે તે સંપત્તિ ધરાવે છે. હાલ પોલીસ તેની કડક પુછપરછ કરી રહી છે. 

આ પણ વાંચો--વડોદરામાં પેપર ફૂટવાની ઘટનામાં રાત્રે શું થયું? જાણો ચોંકાવનારી માહિતી