શું ભાજપ સામે આક્રોશ ઠાલવનાર યુવક એકટર છે? સોશિયલ મીડિયા પર ખુલી પોલ

ગુજરાતમાં વિધાનસભાની ચૂંટણીનો સમય જેમ જેમ નજીક આવી રહી છે તેમ તેમ  આમ આદમી પાર્ટી દ્વારા યેનકેન પ્રકારે પ્રચારને વેગ આપવામાં આવી રહ્યો છે. પંજાબમાં મળેલી સફળતા બાદ અરવિંદ કેજરીવાલે ગુજરાતમાં આંટાફેરા વધારી દીધા છે. પાર્ટી સોશિયલ મીડિયા ઉપર પણ પ્રચારમાં જોડાઈ ગઈ છે. જોકે આ બધા વચ્ચે આમ આદમી પાર્ટી દ્વારા પ્રચાર માટે જાતે માણસો ઉભા કરી, તેમની પાસે સરકાર સામે રોષ વ્યક્ત કરાવવાાં આવી રહ્યો  હોવાના આક્ષેપ પણ થઇ રહ્યા છે. 

આમ આદમી પાર્ટીના રાષ્ટ્રીય સંયોજક અરવિંદ કેજરીવાલ મંગળવારે એક દિવસની ગુજરાતની મુલાકાતે હતા અને કચ્છ જિલ્લાના ભુજમાં એક કાર્યક્રમમાં પણ હાજરી આપી હતી. ભુજમાં આમ આદમી પાર્ટીના જન સંવાદ કાર્યક્રમમાં અરવિંદ કેજરીવાલ સામે ઢોરા ગામના યુવાન શાબાશ ખાને ગામમાં હજુ સુધી સ્કૂલ તેમજ અન્ય અસુવિધાઓને લઇને રોષ વ્યકત કર્યો હતો.જેનો વિડીયો આમ આદમી પાર્ટી દ્વારા વાયરલ કરાયો હતો. જે બાદ સોશિયલ મીડિયા યુઝર્સ દ્વારા આ વીડિયોની પોલ ખોલવામાં આવી હતી. વિડીયોમાં રોષ વ્યક્ત કરી રહેલો યુવક એક્ટિંગનો શોખીન હોવાનું તેના સોશિયલ મીડિયા એકાઉન્ટ્સ પરથી સામે આવ્યું હતું.આ  દરમ્યાન કેટલાક લોકોએ એવો પણ આક્ષેપ કર્યો છે કે આમ આદમી પાર્ટીના કહેવાથી જ આ યુવક જન સંવાદ કાર્યક્રમમાં આવ્યો હતો. અને તેણે જુઠ્ઠાણું ફેલાવ્યું હતું. આ વાત વાયરલ થતા જ રાજકીય બેડામાં હલચલ મચી ગઇ છે. 

ગુજરાત ફર્સ્ટ ન્યુઝની ટીમ એ આજે તમામ હકીકતો જાણવા માટે શાબાશ ખાનની પ્રવૃત્તિઓ અંગે જાત મુલાકાત લીધી હતી શાબાશ ખાનની જો વાત કરીએ તો તે હાજીપીર નજીક આવેલ ઢોરા ગામનો રહેવાસી છે 22 વર્ષીય આ શાબાશખાન છેલ્લા પાંચ મહિનાથી ભુજની હોટલ સેવન સ્કાયમાં વેઈટર તરીકે ફરજ બજાવે છે. આ શાબાશખાન પોતાની નવરાશની પળોમાં જુદા જુદા વિષય પર વિડીયો બનાવવાનો શોખીન છે તેવું અહીંના સ્થાનિકો જણાવી રહ્યા છે ગઈકાલે વિવાદ બાદ તે આજે બપોર સુધી હોટલમાં આવ્યો ન હોવાનું હોટલ માલિક જટુભા રાઠોડે જણાવ્યું હતું. 

આ બાબતે કચ્છ જિલ્લા ભાજપના મીડિયા ઇન્ચાર્જ સાત્વિક દાન ગઢવીનો સંપર્ક સાધતા તેમણે જણાવ્યું હતું કે ગઈકાલે આમ આદમી પાર્ટીના  જન સંવાદ કાર્યક્રમમાં જે શાબાશ ખાન બોલ્યો છે તે આમ આદમી પાર્ટીના કહેવાથી બોલ્યો છે અને આ શાબાશ ખાન પોતે એક્ટર છે તે વાત ખુલ્લી પડી ગઇ છે.