દરેક ક્ષેત્રમાં ભારતનો દબદબો, આપણા યુવાનોએ દેશના સામર્થ્યને સાબિત કર્યુ : મોદી

વડાપ્રધાન નરેન્દ્ર મોદીના ગુજરાત પ્રવાસનો આજે બીજો દિવસ છે. ગઇ કાલના શ્રેણીબદ્ધ કાર્યક્રમો બાદ આજે પણ ભવ્ય રોડ શો યોજાયો હતો. આજે સવારે ગાંધીનગરથી દહેગામ સુધી વડાપ્રધાનનો રોડ શો યોજાયો હતો. ત્યારબાદ નરેન્દ્ર મોદીએ દહેગામ તાલુકાના લવાડ ગામે રાષ્ટ્રીય રક્ષા યુનિવર્સિટીના પ્રથમ પદવીદાન સમારોહમાં મુખ્ય અતિથિ તરીકે હાજરી આપી હતી. ત્યારબાદ તેમણે સરદાર પટેેલ સ્ટેડિયમ ખાતે જઇને 11મા ખેલ મહાકુંભનો પ્રારંભ કરાવ્યો હતો. 

ભારત જેવા યુવા દેશને દિશા આપવામાં તમારી ભૂમિકા મહત્વપૂર્ણ છે. આજે આ ખેલ મહાકુંભમાં ગુજરાતના અલગ અલગ વિસ્તારમાંથી યુવાનો આવ્યા છે. જેઓ પોતાના સ્વપ્ન પુરા કરવા મહેનત કરે છે. હું તમારા સ્વપ્નમાં તમારા ક્ષેત્ર અને જિલ્લાનું ભવિષ્ય જોઉં છું. હું તમારા સ્વપનમાં આખા ગુજરાત અને દેશનું ભવિષ્ય જોઉં છું. માટે આજે સ્ટાર્ટ અપ ઇન્ડિયાથી લઇને સ્ટેન્ડઅપ ઇન્ડિયા સુધી, મેક ઇન ઇન્ડિયાથી લઇને આત્મનિર્ભર ભારત અને વોકલ ફોર લોકલ સુઘધી નવા ભારતના દરેક અભિયાનની જવાબદારી દેશના યુવાનોએ લીધી છે. આપણા યુવાનોએ દેશના સામર્થ્યને સાબિત કર્યુ છે. આજે સોફ્ટવેરથી લઇને સ્પેસ પાવર સુધી. સંરક્ષણથી લઇને એઆઇ સુધી દરેક ક્ષેત્રમાં ભારતનો દબદબો છે. દુનિયા ભારતને મોટી શક્તિ તરીકે જુએ છે. ભારતની આ શક્તિને ખેલદિલિ અનેક ગણી વધારી શકે છે. આ જ તમારી સફળતાનો મંત્ર છે. માટે જે રમે તે જ ખિલે. જે ખેલે તે જ ખિલે. મારી તમને બધાને સલાહ છે કે સફળતા માટે કોઇ શોર્ટકટ નથી હોતો. 

ભારતે પહેલી વખત સાત મેડલ જિત્યા છે. આ જ રેકોર્ડ ભારતના દીકરા દીકરીઓએ પેરાલિમ્પિકમાં પણ બનાવ્યો. ભારતે ટોકયો પેરાલિમ્પિકમાં 19 મેડલ જિતયા. આ તો શરુઆત છે. ના હિન્દુસ્તાન રોકાશેના થાકશે. મને મારા દેશની યુવા શક્તિ પર વિશ્વાસ છે, યુવા ખેલાડીઓની તપસ્યા પર વિશ્વાસ છે. મને મારા દેશના ખેલાડીઓના સ્વપ્ન, સમર્પણ અને સંકલ્પ પર વિશ્વાસ છે. એ દિવસ દૂર નથી જ્યારે એક સાથે અનેક ગોલ્ડ મેડલ જિતવા વાળા દેશમાં ભારતનું નામ પણ હશે. ભારતનો ત્રિરંગો પણ લહેરાતો હશો. આ વખતે યુક્રેનથી જે યુવાનો પરત આવ્યા છે. યુદ્ધના મેદાનમાંથી આવ્યા છે. પરંતુ આવીને તેમણે શું કહ્યુ? તેમણે કહ્યું કે ત્રિરંગાની આન બાન અને શાનનો અનુભવ અમને ત્યાં થયો છે. હું એક અન્ય દ્રશ્ય તરફ લઇ જવા માંગુ છું. જ્યારે આપણા ખેલાડીઓ મેડલ મેળવીને પોડિયમ પર ઉભા રહેતા ત્યારે ત્રિરંગો ઝંડો દેખાતો ત્યારે આપણા ખેલાડીઓની આંખોમાંથી ગૌરવના આંસુ વહેતા હતા. આ છે દેશભક્તિ.

11મા ખેલમહાકુંભના ઉદ્ઘઘાટન પહેલા વડાપ્રધાનના હસ્તે ગુજરાતની ખેલ-કૂદ નીતિ -2022નું ડિજિટલ અનાવરણ કરવામાં આવ્યું છે. આ સિવાય તયારબાદ નરેન્દ્ર મોદીએ 11મા ખેલ મહાકુંભનો પ્રારંભ પણ કરાવ્યો હતો. 

વડાપ્રધાન નરેન્દ્ર મોદી સરદાર પટેલ સ્ટેડિયમ પહોંચી ગયા છે. જ્યાં તેમણે હાજર લોકો અને ખેેલાડીઓનું આગવા અંદાજમાં અભિવાદન ઝીલ્યું હતું. સ્ટેજ પર હાજર રાજ્યના રાજ્યપાલ આચાર્ય દેવવ્રત, મુખ્યમંત્રી ભુપેન્દ્ર પટેલ, ગૃહમંત્રી હર્ષ સંઘવી, સીાર પાટીલના લોકોએ તેમનું સ્વાગત કર્યુ હતું.

સરદાર પટેલ સ્ટેડિયમની અંદર વડાપ્રધાનના કાર્યક્રમને લઇને વિવિધ તૈયારીઓ કરવામાં આવી છે. જેમાં અનેક કલાકારો પણ ત્યાં ઉપસ્થિત છે. સરદાર પટેલ સ્ટેડિયમમાં લોકો આવી ચુક્યા છે. જનમેદની અત્યારે હકડેઠઠ ભરી છે. અત્યારે ત્યાં હાજર કલાકારો દ્વારા વિવિધ પ્રસ્તુતિ થઇ રહી છે. ગીત, સંગીત અને રાસ ગરબા સાથેનો રંગારંગ કાર્યક્રમ પણ શરુ થઇ ચૂક્યો છે.

વડાપ્રધાન સરદાર પટેલ સ્ટેડિયમ પહોંચે તે પહેલા વધુ એક રોડ યોજાનાર છે. ઇન્દિરા બ્રિજથી સરદાર પટેલ સ્ટેડિયમ સુધી આ ભવ્ય રોડ શો યોજાશે. ત્યારે અત્યારે એવી માહિતિ પણ સામે આવી રહી છે કે આ રોડ શો પહેલા નરેન્દ્ર મોદી સાબરમતી આશ્રમની મુલાકાત લઇ શકે છે. ગાંધી આશ્રમ ખાતે અત્યારે ચૂસ્ત પોલીસ બંદોબસ્ત ગોઠવવામાં આવ્યો છે. ઉપરાંત ડોગ સ્કોવડ અને બોમ્બ સ્કોવડ દ્વારા ચેકિંગ કરવામાં આવ્યું છે.  ઉલ્લેખનીય છે કે આજે ઐતિહાસિક દાંડી યાત્રાની 92મી વર્ષગાંઠ છે. આવી સ્થિતિમાં તેઓ સાબરમતી આશ્રમની મુલાકાત લે તેવી શક્યતા છે.

નરેન્દ્ર મોદી આજે સાંજે 6:30 કલાકે સરદાર પટેલ સ્ટેડિયમ ખાતે 11મા ખેલ મહાકુંભનો પ્રારંભ કરાવશે. આ કાર્યક્રમને લઇને ઘણા દિવસોથી તડામાર તૈયારીઓ ચાલી રહી હતી. તેવામાં અત્યારે સરદાર પટેલ સ્ટેડિયમમાં લોકો, ખેલાડીઓ અને કલાકારો ગોઠવાઇ ગયા છે અને વડાપ્રધાનના આવવાની રાહ જોઇ રહ્યા છે. કાર્યક્રમને લઇને ભાજપના તમામ મોટા નેતાઓ પણ ત્યાં પહોંચી ગયા છે. લોકોનો પણ ભારે ધસારો છે. આવી સ્થિતિમાં સ્ટેડિયમ ખાતે ચૂસ્ત સુરક્ષા વ્યવસ્થા પણ ગોઠવાઇ છે.

રાજ્યના ગૃહમંત્રી હર્ષ સંઘવીએ સરદાર પટેલ સ્ટેડિયમ પર જઇને તમામ વ્યવસ્થા અને સુરક્ષાનું નિરીક્ષણ પણ કર્યુ હતું. જે અંગે તેમણે ટ્વિટ પમ કર્યુ છે. સાથે જ અન્ય એક ટ્વિટમાં તેમણે જણાવ્યું કે બધી તૈયારીઓ થઇ ગઇ છે અને લોકો વડાપ્રધાનની રાહ જોઇ રહ્યા છે.