મોરબીની દુઃખદ ઘટનામાં એક જ પરિવારના ચાર લોકોના મોત, એક સાથે ઉઠી અર્થી

રાજ્યના મોરબીમાં થયેલી દુઃખદ ઘટનામાં અત્યાર સુધીમાં 132 જેટલા લોકોના મોત થયા હોવાના અહેવાલ મળી રહ્યા છે. નોંધનીય છે કે, મચ્છુ નદીમાં બનેલો કેબલ બ્રિજ તૂટવાને કારણે અહીં અનેક લોકો નદીમાં પડી ગયા હતા. આ દુઃખદ ઘટનામાં એક પરિવારના ચાર લોકોના મોત થયા છે. સૌથી ચોંકાવનારી વાત એ છે કે, આ પરિવારના માત્ર એક સભ્ય પોતાનો જીવ બચાવવામાં સફળ થયા હોવાનું સામે આવી રહ્યું છે.

મોરબીની આ દુઃખદ ઘટનામાં ઘણા એવા લોકો છે કે જેઓ પોતે બચી ગયા પરંતુ તેમના સગા સંબંધી ઘટનામાં બચી ન શક્યા. આવી જ એક વ્યક્તિ રૂપેશભાઈ ડાભી કે જેઓ પોતાના પરિવાર સાથે આ ઝૂલતા પુલ પર ફરવા ગયા હતા. જ્યા આ દુર્ઘટના ઘટતા તેમના પરિવારના ચાર લોકો મોતને ભેટી ગયા. જેમા ત્રણ સંતાનો અને તેની માતાનું મોત થયું છે. એક જ પરિવારના ચાર-ચાર લોકોની આજે એક સાથે અર્થી ઉઠી છે. પરિવારના સભ્યોમાં માતા હંસાબેન ડાભી, પિત્ર તુષાર કે જે 8 વર્ષ, શાયમ કે જે 5 વર્ષ અને માયા કે જે 2 વર્ષની છે તેમના મોત નિપજ્યા છે. સમગ્ર ઘટનામાં રૂપેશભાઇ કે જેઓ તરીને બહાર આવી ગયા હતા જેથી તેઓ બચી ગયા હતા. પરંતું અન્ય તરી શક્યા નહીં અને આ દુર્ઘટનાનો ભોગ બનતા મોતને ભેટી ગયા.

મોરબીની બ્રિજ દુર્ઘટના બાદ ઘણા લોકોએ પોતાના સ્વજનને ગુમાવી દીધા છે. મોરબીની કરુણ હોનારતથી અનેક લોકોના જીવ ગયા છે. જેમા એક 7 વર્ષની બાળકી પણ છે કે જે પોતે તો આ દુર્ઘટનામાં બચી ગઇ છે પરંતુ તેણે પોતાના માતા-પિતાને ગુમાવ્યા છે. અમદાવાદમાં રહેતી હસ્તી જે આજે રડતી જોવા મળી રહી છે. કારણ કે જે માતા-પિતા એક દિવસ પહેલા તેની સાથે હતા તેઓ આજે તેનાથી એટલા દૂર થઇ ગયા છે જ્યાથી તે હવે પાછા નહીં આવી શકે. મળી રહેલી માહિતી અનુસાર, હસ્તી અમદાવાદની શારદા મંદિર સ્કૂલમાં અભ્યાસ કરે છે. 

ઉલ્લેખનીય છે કે, આ ઘટના રવિવારે સાંજે બની હતી, જ્યારે લોકો છઠની ઉજવણી કરી રહ્યા હતા. પ્રાપ્ત માહિતી અનુસાર કેબલ બ્રિજ પર સેંકડો લોકો હાજર હતા અને અચાનક આ બ્રિજ તૂટી પડ્યો. રાહત કાર્ય માટે બચાવ ટીમ સતત કામ કરી રહી છે. ઘાયલોને હોસ્પિટલમાં લઈ જવામાં આવી રહ્યા છે.

આ પણ વાંચો - કેવી રીતે તૂટ્યો મોરબીનો બ્રિજ? જુઓ આ વિડીયોમાં